لومڑی دی چالاکی تے خرگوش

کسے جنگل وچ خرگوشاں دی اک جوڑی رہندی سی۔ بہت سوہنے اک خرگوش تے اک خرگوشنی ہسدے کھیڈدے اوہناں دے دن بہت پیار نال گزر رہے سن۔ دونویں اک دوسرے دا بہت خیال رکھدے سن۔ اک دوسرے دی گل مندے۔ اوہناں وچکار کدے وی کسے گل تے جھگڑا نئیں سی ہویا۔ دونویں مل کے شکار کردے تے مل کے کھاندے سن۔

اک دن اچانک جدوں اوہ گھر دے باہر کھیڈ رہے سن کہ اک بھیڑیا آ گیا۔ اوہنے جدوں موٹے تازے خرگوش ویکھے تاں اوس دی نیت وچ فتور آ گیا۔ اوس خرگوش اتے حملہ کیتا۔ خرگوشنی تے خرگوش رل کے جرأت نال اوس دا مقابلہ کیتا تے بھیڑئیے نوں اوتھوں نسن تے مجبور کر دتا۔ بھیڑیے نوں شکار ہتھ نہ لگن تے ہار اتے بہت غصہ آیا۔ اوہ اوتھوں چلا تے گیا پر جاندے ہوئے آکھن لگا میں تہانوں چھڈاں گا نئیں۔

اک دن اوس چالاک لومڑی نوں اپنے گھر دعوت تے بلایا تے دعوت توں بعد اوس نوں آکھیا کہ توں میرا اک کم کر میں تینوں انعام دیواں گا۔ انعام دے لالچ وچ آ کے اوس کم کرن دی حامی بھر لئی۔ بھیڑیا آکھدا اے کہ جنگل کے اوس نکرے اک موٹا تازہ خرگوش تے خرگوشنی رہندے نیں۔ اوہناں دا آپس وچ بہت پیار اے۔ توں اوہناں وچکار غلط فہمی پیدا کر۔ جدوں اوہ بدظن ہو جاون گے تاں میں وار و واری اوہناں دا شکار کراں گا۔ا نعام دے نال نال اوہناں دا تازہ گوشت وی تینوں دیواں گا۔

اگلے دن خرگوش بیمار ہو جاندا اے تے خرگوشنی اکلے ای شکار کرن لئی آ رہی ہوندی اے۔ لومڑی نے موقع دا فائدہ چک دے ہویاں پہلاں خرگوش تے خرگوشنی دا حال پچھیا جدوں اوس نوں پتہ لگا کہ خرگوش بیمار اے تاں اوس فوری طور تے آکھیا کہ خرگوش بیمار نئیں اے۔ اوس بیماری دا بہانہ کیتا اے۔ اوہ تینوں پسند ای نئیں کردا۔ اوہ بھیڑئیے نال مل کے تینوں نقصان اپڑانا چاہندا اے۔ خرگوشنی ایہہ گلاں سن کے پریشان ہوئی تے روون لگ پئی۔ شکار کرن توں بعد جدوں اوہ گھر اپڑی تاں خرگوش گھر نئیں سی۔ اوس دا شک یقین وچ بدل گیا۔ حالانکہ خرگوش خرگوشنی نوں لبھن گیا سی۔ کیوں جے اج خرگوشنی نے شکار تے کافی دیر لاہ دتی سی۔ اوہ دل وچ سوچدی اے کہ اوہ واقعی بھیڑیے نال مل گیا اے تے اوس نوں ملن لئی گیا اے۔ جدوں لومڑی نے ویکھیا کہ خرگوشنی نے اوس دیاں گلاں دا یقین کر لیا اے تاں اوہ اوتھوں اوس تھاں اتے آ جاندی جتھے خرگوش خرگوشنی نوں تلاش کر رہیا سی۔ اوس موقع ویکھ کے خرگوش دے کن وی خرگوشنی دے خلاف بھرے۔ ایس یقین توں بعد کہ خرگوش نے وی اوس دیاں جھوٹیاں گلاں اتے یقین کر لیا اے۔ لومڑی اوتھوں آ جاندی اے تے ساری کہانی بھیڑیے نوں دسدی اے تے آکھدی اے کہ اوہ سویر دا انتظار کرے۔ کیوں جے اوہ دونوں اک دوجے توں بدظن ہو چکے نیں ہن اکلے اکلے شکار کرن آون گے۔ توں موقع ویکھ کے اوہناں دا شکار کر لویں۔

ساری رات دونواں نے اک دوجے نال کوئی گل نہ کیتی۔ سویرے بہت ای دکھی من تے بوجھل طبیعت نال خرگوشنی اٹھی کے شکار لئی چلی گئی۔ خرگوش نوں یقین ہو گیا کہ اوہ بھیڑیے نوں ملن گئی اے۔ کافی انتظار دے بعد جدوں خرگوشنی واپس نہ آئی تے خرگوش اوس نوں تلاش کرن لئی شکار والی تھاں تے گیا۔ اوس نے ویکھیا کہ اوتھے خرگوشنی دا سر پیا ہویا اے تے دھڑ بھیڑیا کھا لیا اے۔ اوس نوں ایہہ ویکھ کے بہت افسوس ہوندا اے۔ اوس نے خطرہ محسوس کردے ہویاں اوتھوں نسن دی کوشش کیتی۔ پر بھیڑیے نے بھرپور حملہ کر کے اوس نوں قابو کر لیا تے فیر اوس دی گردن مروڑ کے اوس نوں وی مار دتا۔ انج غلط فہمی پاروں اوہناں دا ہسدا وسدا گھر تباہ ہو گیا۔ ایس توں ایہہ گل ثابت ہوندی اے کہ ساہنوں کسے دی گلاں اتے اعتبار نئیں کرنا چاہی دا۔ جے کر تہاڈے ساتھی دے خلاف کوئی گل کرے تاں اعتبار کرن توں پہلاں اوس دی تصدیق کر لینی چاہی دی اے۔