ٹونی دی قربانی

کسے پنڈ وچ اک کسان رہندا سی۔ بہت ای محنتی تے ہر کم شوق نال کرن دا عادی سی۔ اوس دے گھر والے تے سجن اوس نوں محنت نال کم کردے ویکھدے تاں بہت خوش ہوندے۔ واہی کرن دے نال نال اوس نوں مختلف جانور پالن دا شوق وی سی۔ اوہ روز سویرے اُٹھدا، نماز پڑھدا تے خود ناشتہ کرن توں پہلاں چڑیاں، کاواں تے طوطیاں لئی دانہ لے کے اپنے گھر دی چھت اتے چلا جاندا۔ اوس دے چھت اپر جاون دی دیر ہوندی سی کہ بہت سارے پرندے دانہ چگن لئی اوتھے آ جاندے۔ اوہ پرندیاں نوں دانہ پاندا تے پانی والا بھانڈا روز بھر کے رکھدا۔ کئی وارانج ہوندا کہ پرندیاں نے اوہدے چھت اپر چڑھن توں پہلاں شور مچایا ہوندا سی۔ انج جاپدا کہ پرندے اوہدے نال گلاں کردے نیں۔ اوہ بہت خوش ہوندا خاص کر اوس ویلے جدوں اوہ کسے زخمی پرندے دی مرہم پٹی کردا۔ اوس دا بالاں وانگ خیال رکھدا تے صحت یاب ہوون تے اوس نوں آزاد کر دیندا۔ اوہ بیمار جانوراں دی تلاش وچ روز جنگل وی جاندا۔ پر اوس نوں کوئی جانور نہ ملیا تے اوہ گھر مایوس پرتدا۔ ایس توں بعد اوہ ناشتہ کردا تے کھیتاں وچ کم تے ٹر جاندا۔ سارا دن رج کے محنت کردا تے شام نوں گھر واپس آندا۔ اوہدے والدین اوہدی محنت توں بہت خوش سن۔

ایس کسان دے گھر وچ صرف چار جی سن۔ اوس دا باپ، ماں، وڈا بھرا تے اوہ۔ گھر وچ اوہدا چوتھا نمبر سی۔ اوہ اپنے  والد دی ہر گل مندا۔ جس پاروں اوس دا والد اوہدے نال رج کے پیار کردا۔ اوہدی سالگرہ دادن آیا، پر اوس نوں سالگرہ اتے وکھری قسم دا تحفہ دیون دا سوچیا۔ الماری وچوں پیسے لے تے اپنی گھر والی نوں دس کے اپنے وڈے پتر نال شہر آ گیا۔ اوہدا وڈا بھرا سوچ رہیا سی کہ ابا جی نے نکے  لئی کیہڑا وکھری قسم دا تحفہ خریدنا ایں۔ اوس اپنے والد کولوں پچھیا پر اوس دے والد نے اوہنوں چپ کر کے نال چلن لئی آکھیا۔ آخیر اوہ ٹردے ٹردے اک جانوراں والی دکان اتے اپڑ گئے۔ اوس دکان وچ وکھو وکھ پرندیاں توں علاوہ کئی نسلاں دیاں بلیاں تے کتے وی وکن لئی موجود سن۔ اوس دے والد نے اوہدے لئی دکان توں اک نکا جیہا بہت پیارا کتے دا بچہ خریدیا۔ جس دے کن کالے تے باقی دا سارا جسم چٹا سی۔ اوہ قدر وچ بہت اُچا نئیں سی تے اوہدے جسم اتے وڈے وڈے چٹے وال سن۔ ایس دی قیمت 2 ہزار روپے سی۔ اوس دے والد نے قیمت ادا کیتی۔ وڈے بھرا نے اوس نوں بڑے پیار نال چکیا تے شام توں پہلاں اوہ گھر واپس آ گئے۔

گھر آ کے اوہناں نکے نوں سالگرہ دا تحفہ دتا جس نوں ویکھ کے اوہ بہت خوش ہویا۔ کتا گھر دے ویہڑے وچ ڈورن لگ پیا تے نکا اوہدے پچھے پچھے۔ نکے نوں اینی خوش ہوئی کہ اوہ ہر ویلے اوس نوں اپنے نال رکھدا۔ دونویں ویلے اوس نوں دودھ پاندا تے نالے گوشت وی۔ تھوڑے دنا مگروں کتے نے قد کڈھیا تے اوس دی صحت وی پہلے نالوں چنگی ہو گئی۔ نکے نے اوس دا ناں ’’ٹونی‘‘ رکھیا۔ اوہ ہر روز اوس نوں باہر دی سیر کروان لئی لے جاندا، تے اوس نوں چھالاں مارنیاں تے دوڑنا سکھاوندا۔ دونواں دا آپس وچ پیار بہت ودھ گیا سی۔ رات نوں ’ٹونی‘ نکے دی منجی تھلے سوندا تے سویرے اوہدے اُٹھن نال ای اُٹھ جاندا۔ ’ٹونی‘ نکے دے نال ای کھیتاں ول جاندا۔ نکا کھیتاں وچ کم کردا تے ’ٹونی‘ اک پاسے بہہ کے اوس نوں ویکھدا رہندا۔ شام نوں اوہ نکے نال گھر آ جاندا ’ٹونی‘ نے نکے دے سکھاون تے چھالاں مارنیاں۔ چیزاں نوں پھڑ کے لیانا تے دوڑ لانا سکھ لیا سی۔ نکا دور گیند سٹ دا تے ’ٹونی‘ نوں لیاون لئی آکھدا۔ ’ٹونی‘ گیند پچھے بھج دا تے پھڑ کے واپس نکے نوں کر دیندا۔

اک سویرے ’’ٹونی‘‘ نکے  دے نال کھیتاں ول جا رہیا سی کہ رستے وچ اک سپ نے رستہ بند کیتا ہویا سی۔ نکے نے اوس نوں اک سوٹی نال اک پاسے کرن دی کوشش کیتی تے سپ نے نکے اتے حملہ کر دتا۔ نکا پھرتی نال اک پاسے ہو گیا تے سپ دا حملہ ناکام ہو گیا۔ ایہہ سارا کجھ ’’ٹونی‘‘ ویکھ رہیا سی۔ اوہ بہت ہمت والا تے بہادر سی۔ اوہدے دل وچ نکے لئی پیار بھریا ہویا سی۔ جدوں سپ نے دوجی وار نکے اتے حملہ کیتا تاں سپ دے نکے تک اپڑن توں پہلاں ای اوہ سپ دے سامنے آ گیا۔ اوس ڈٹ کے سپ دا مقابلہ کیتا تے اوس نوں اپنے منہ وچ چتھ کے مار دتا۔ سپ دا زہر اوہدے دنداں نوں لگن پاروں اوہدے ڈھڈ اندر وی چلا گیا تے سارے جسم وچ پھیل گیا۔ جدوں ’ٹونی‘ دی حالت خراب ہوون لگی تاں نکا اوس نوں پنڈ دے جانوراں والے ہسپتال لے گیا پر اوس ویلے تائیں بہت دیر ہو چکی سی۔ انج ’’ٹونی‘‘ دے جسم وچ سپ دا زہر پھیلن پاروں موت ہو گئی۔ نکے نوں اوہدی موت دا بہت دکھ ہویا۔ اوہ اوہدی لاش چک کے پنڈ توں باہر گیا تے ٹویا کڈھ کے اوس نوں دب دتا، تے روندا گھر واپس آ گیا۔