لومڑ دی مکاری تے چالاکی

پرانے زمانے دی گل اے کہ اک شیر کسے جنگل وچ راج کردا سی۔ سوچ چنگی دا مالک ہرکسے نال پیار و محبت نال گل کردا۔ جس پاروں جنگل دے سارے جانور اوس توں بہت خوش سن تے اوس دی عزت کردے سن۔ شیر نے اپنے دیس دا کم چلاون لئی کئی جانوراں نوں اپنا وزیر بنایا ہویا سی۔ لومڑ شیر دے دوسرے جانوراں نالوں بہت نیڑے سی۔ شیر جنگل دے ہر معاملے وچ لومڑ نال مشورہ کردا۔ اوہ اوس نوں بہت سیانا سمجھدا سی تے اوس دے مشورے اتے عمل وی کردا سی۔ لومڑ ایہہ گل جان دا سی کہ شیر اوہدے اتے بہت اعتبار کردا اے۔ ایس پاروں اوہ کسے ہور جانور نوں شیر دے نیڑے نئیں سی آون دیندا۔ جے کوئی شیر نوں ملنا چاہندا تاں اوہ کوئی نہ کوئی بہانہ بنا کے اوس نوں ٹال دیندا۔

کجھ سالاں پچھوں شیر بیمار ہو گیا۔ بیماری ودھ دی گئی جس پاروں اوس دی اک لت وی کمزور ہو گئی۔ جس پاروں اوہ ہن بہتا شکار نئیں سی کر سکدا، شیر نے اک دن سارے جانوراں نوں اکٹھا کیتا تے آکھیا کہ اوہدے لئی کسے چنگے حکیم کولوں دوائی لیاو تاں جے میں ٹھیک ہو جاواں، کیوں جے اوہ سارے شیر نال پیار کرد سن ایس لئی دوائی لیاون لئی تیار ہو گئے۔ لومڑ بہت چالاک سی۔ اوہ جان دا سی کہ جے شیر مر گیا تاں حکومت اوس نوں ملنی ایں۔ اوس نے شیر نوں مارن دا سوچیا۔ سارے جانور چنگے چنگے حکیماں کولوں دوائی لے کے آئے۔ پر لومڑ نے آکھیا کہ تسی جائو میں آپ شیر نوں کھاوا دیواں گا۔ جدوں جانور چلے جاندے تاں اوہ اوہناں دی دوائی دیواں دی تھاں اپنی نیند والی دوائی شیر نوں دیندا۔ جس پاروں شیر ستار ہندا تے انج دن بدن اوہ کمزور ہوندا گیا۔

جنگل دے جانوراں وچ اک چیتا وی رہندا سی۔ اوہ وی شیر نوں بہت پیار کردا سی۔ اوہ لومڑ دی چالاکی نوں چنگی طرح جانو سی تے اوہدے کولوں چڑ کھاندا سی۔ چیتے نے کئی وار کوشش کیتی کہ اوہ آپ شیر نوں دوائی دیوے پر لومڑ نے اوس دی ہر کوشش ناکام بنا دتی۔ ہن چیتے نے لومڑ دی جاسوسی شروع کر دی کہ آخر لومڑ کیوں نئیں کسے نوں ملن دیندا۔ اک دن اوہ رنگے ہتھوں پھڑیا گیا۔ لومڑ باندر نوں کہہ رہیا سی کہ میں کسے جانور دی دوائی شیر نوں نئیں دیندا۔ سگوں زہر دے رہیا آں۔ تاں جے شیر مر جاوے تے حکومت مینوں مل جاوے، جے انج ہو گیا تاں میں تینوں اپنا وزیر بنا لواں گا۔ توں ایہہ گل کسے نوں نہ دسی۔ چیتے نے ایہہ ساریاں گلاں سن لئیاں تے شیر نوں شکایت کرن دا سوچیا۔ لومڑ نے جدوں ویکھیا کہ چیتے نے ایہہ ساریاں گلاں سن لئیاں نیں تاں اوہ چیتے توں پہلاں ای شیر کول اپڑ گیا تے آکھیا بادشاہ سلامت میں تہاڈے لئی دوائی لین گیا تاں حکیم نے آکھیا کہ جے کر بادشاہ سلامت کسے موٹے تازے چیتے دا شکار کرن تے اوس دل کھا لین تاں تندرست ہو سکدے نیں۔ اینی دیر وچ چیتا وی اوتھے آ گیا۔ اوس نوں آندے ویکھ کے اوہدے دل وچ خیال آیا کہ جے میں ایس دا شکار کر کے ایس دا دل کھالواں تاں چھیتی ٹھیک ہو جاواں گا۔ اوس سوچیا کہ ربّ نے میری دوائی خود میرے کول گھل دتی اے۔ چیتے دے نیڑے آون تے ایس توں پہلاں کہ اوہ لومڑ دی سازش بارے کجھ دسدا۔ شیر نے اوہدے اتے حملہ کر دتا تے اوس مار کے اوہدا دل کھا لیا۔ لومڑ ایہہ سب کجھ ویکھ کے ہس رہیا سی تے اپنی مکاری اتے خوش ہو رہیا سی۔