جھوٹ دی سزا

اک دفعہ دا ذکر اے کہ کسے پنڈ وچ اک چغل خور رہندا سی۔ پنڈ والے اوس دی ایس عادت توں تنگ سن۔ چغلی کرنا اوہدی عادت بن گئی سی تے ایس وجہ توں اوہدی بہت سارے لوکاں نال لڑائی وی ہوئی اوہ روٹی پانی تے چھڈ سکدا سی پر چغلی چھڈنا اوہدے لئی بہت اوکھا سی۔ لوک اوہدیاں گلاں اتے یقین نئیں سن کردے پر فیر وی اوہ اپنی چرب زبانی نال لوکاں نوں اپنے پچھے لاہ لیندا تے لوکاں وچکار لڑائی کروا دیندا۔ اک دن اوس جھوٹ بول کے دو بھراواں دی لڑائی کروا دتی تے مڑ اصلیت سامنے آون تے سارے پنڈ نے رَل کے اوس نوں کٹیا تے پنڈوں کڈھ دتا۔

ہن اوہ رہن لئی دوجے پنڈ اپڑیا تے رہن لئی کرائے دا مکان لیا۔ کیوں جے ایس پنڈ والے اوس دی عادت توں واقف نئیں سی ایس لئی اوس نے فیصلہ کیتا کہ اوہ ہن کسے دی چغلی نئیں کرے گا تے شریف بن کے رہے گا۔ روٹی کماون لئی اوس نے کئی لوکاں نال نوکری کرن دی گل کیتی۔ اوس نوں پتہ لگا کہ وڈے زمیندار نوں نوکر دی لوڑ اے۔ اوہ نوکری لئی اوہدے کول گیا تے نوکری دی منگ کیتی۔ کیوں جے زمیندار نوں نوکر دی لوڑ سی ایس لئی اوس اوہدے کول پچھیا کہ دس کنی تنخواہ لویں گا۔ اوس جواب دتا کہ روٹی، کپڑا تے چھ مہینیاں بعد اک چغلی تے اک جھوٹ۔

زمیندار نوں اک چغلی تے اک جھوٹ دی سمجھ نہ آئی پر فیر وی اوس نے اوہنوں نوکری دے دتی۔ سارے کم اوس نوں سمجھا دتے۔ ہن چغل خور روز کھیتاں ول جاندا۔ اپنا کم بہت محنت کردا تے شام نوں گھر آ کے گھر دے کم وی کردا۔ زمیندار اوس دے کم توں بہت خوش سی۔ اک مہینہ بیتن توں مگروں زمیندار نے اوس نوں کپڑیاں توں وکھ کجھ پیسے وی دتے جس نوں لے کے اوہ بہت خوش ہویا۔ اوس ہور محنت نال کم کیتا تے زمیندار نے اگلے مہینے اوس نوں کجھ ودھ پیسے دتے۔ انج ہولی ہولی وقت گزدا گیا تے چھ مہینے لنگھ گئے پر چغل خور نے کسے دی کوئی چغل نہ کیتی۔ اچانک اوس نوں یاد آیا کہ اوس چھ مہینیاں مگروں زمیندار نال اک چغلی کرنی تے جھوٹ بولنا ایں۔سب توں پہلاں اوس زمیندار نال اوہدی گھر والی دی چغلی کیتی کہ اوہ اوس نوں چنگا نئیں سمجھدی تے رج کے جھوٹ بولیا۔ کیوں جے اوس نے چھ مہینے بہت محنت نال کم کیتا سی۔ ایس لئی زمیندار نے اوس دی گل اتے یقین کر لیا، جدوں اوس نے ویکھیا کہ زمیندار نے اوس دی گل اتے یقین کر لیا اے تاں اوس نے اوہدی گھر والی اگے زمیندار دیاں کئی برائیاں بیان کیتیاں۔ جس پاروں اوس نوں اپنے گھر والے اتے غصہ آ گیا۔ اک دن معمولی جیہی گل توں دونویں جی لڑ پئے۔ جدوں لڑائی دا بابے ہوراں نوں پتہ لگا تاں اوہناں نوں بیٹھ کے اک دوجے کولوں گلاں دی تصدیق کرن دا آکھیا۔ دونواں جیاں نوں وڈی حیرت ہوئی کہ اوہناں اک دوجے دے خلاف اوہ گلاں کیتیاں ای نئیں سن چو اوہناں نوں دسیاں گئیاں نیں۔ انج اصلیت معلوم ہوون تے اوہناں چغل خور نوں جھوٹ دی سزا دیون لئی اوس نوں پولیس دے حوالے کر دتا۔