کبوتر، گدھ تے سَپ دی دوستی

کسے جنگل وچ کبوتر تے کبوتری اک درخت اتے آہلنا پے کے رہندے سن۔ دونویں بہت خوش سن۔ کسے وی قسم دا اوہناں نوں فکر نہ سی۔ جنگل وچوں اوہ دانہ چگدے تے آرام نال زندگی گزار رہے سن۔ حالانکہ اوتھے کئی ہور پرندے تے جانور وی رہندے سن۔ پر ایہناں دا کسے نال کوئی میل جول نہ سی۔ اک دن کبوتری نے کبوتر نوں آکھیا کہ ساہنوں ایتھے رہندے کئی سال ہو گئے ساڈا کوئی دوست نئیں۔ تسی نال دے درخت اتے رہ رہے گدھ نال دوستی کرلو تاں جے کدے ساہنوں اوہناں دی مدد دی لوڑ پوے یاں اوہناں نوں ساڈی مدد دی لوڑ پوے تاں اک دوجے دی مدد کر سکیے۔ کبوتر نوں کبوتری دی اک گل پسند آئی تے اگلے دن اوہ دوستی دا پیغام لے کے گدھ دے گھر گیا تے اوس دے سامنے ساری رکھی۔ گدھ نے کبوتر دی گل نال اتفاق کیتا۔ دوست بنن مگروں کبوتر نے گھر آ کے ساری گل کبوتری نوں دسی تے اوہ سن کے بہت خوش ہوئی۔

کجھ دناں پچھوں کبوتری نے کبوتر نوں سپ نال دوستی لاون لئی گھلیا جو نالے والے درخت دی جڑاں وچ رہندا سی۔ اوس نال دوستی توں بعد اوہ دونویں بے فکر ہو گئے۔ کبوتر، گدھ تے سپ کدے کدے اک دوجے دے گھر جاندے، خیر خیریت پچھدے تے اپنے گھر واپس آ جاندے۔ انج اوہناں دی زندگی بہت چنگی لنگھ رہی سی۔

اک رات انج ہویا کہ جنگل وچ کجھ شکاری آئے۔ رات ہوون پاروں اوہ جنگل توں باہر جاون دا رستہ بھل گئے۔ اوہناں رات جنگل وچ ٹھہرن دا فیصلہ کیتا تے ڈیرے اوس درخت لائے جتھے کبوتر دا آہلنا سی۔ رات دے ہنیرے توں بچن لئی اوہناں سکے پتے تے ٹہنیاں اکٹھیاں کیتیاں تے اوہناں نوں اگ لا دتی۔ روشنی ہوون دی وجہ توں اک شکاری نوں ایس درخت اتے کبوتر دا آہلنا نظر آیا جس وچ دو بہت ای پیارے بچے سن۔ اوہ بچیاں نوں آہلنے وچوں کڈھن لئی درخت اپر چڑھنا شروع کردا اے۔ کبوتر تے کبوتری ایہہ ویکھ کے گھبرا جاندے نیں۔ کبوتر کبوتری نوں آکھدا اے کہ ساہنوں اگ بجھاون دی کوشش کرنی چاہی دی اے تاں ہنیرے پاروں شکاری نوں کجھ نظر نہ آوے۔ اوہ دونویں اپنی جان خطرے وچ پا کے کول وگدی نہر اتے جاندے نیں تے چونجاں وچ پانی بھر کے لیاندے تے اگ اتے سٹ دیندے نیں۔ کئی وار انج کرن تے اگ بجھ جاندی اے۔ دوجی وار وی اگ نوں بجھاون لئی اوہناں رل کے کوشش کیتی تے کامیاب رہے۔ تیجی وار شکاریاں بہت سارے پتے تے ٹہنیاں نوں اکٹھا کر کے اگ لائی۔ اگ پہلے نانوں زیادہ سی۔ اوس نوں بجھانا اوہناں نوں مشکل لگ رہیا سی۔ ایس لئی اوہناں گدھ توں مدد لین دا فیصلہ کیتا۔ کبوتری نہر وچوں پانی لیا کے اگ اتے سٹ دی رہی تے کبوتر نے ساری گل گدھ نوں دسی۔ گل سن کے گدھ تے اوہدے گھر والی کبوتر دے نال نہر اُتے گئے ایہناں چونجاں نوں پانی نال بھریا تے پراں نوں پانی گلا کیتا تے فیر سارا پانی اگ اتے آ کے سٹ دتا۔ جدوں بہت سارا پانی اگ اتے پیا تاں اگ بجھ گئی تے شکاری مایوس ہو گئے تھلے اتر آیا تے ہنیرے پاروں اوس سویرے کوشش کرن دا سوچیا۔ اوس اوسے درخت تھلے چادر وچھائی تے سوگیا۔ گدھ تے اوہدی گھر والی اوتھوں چلے گئے۔ کبوتر تے کبوتری نے اوہناں دا شکریہ ادا کیتا۔ کبوتر تے کبوتری بھانویں اپنے بچیاں نال اپنے آہلنے وچ سن پر رات اوہناں بری بے چینی تے خوف وچ لنگھائی۔ سویرے اُٹھ کے اوہناں سب توں پہلاں سپ کولوں مدد لین دا فیصلہ کیتا۔

شکاری دے اُٹھن توں پہلاں کبوتر مدد لین لئی سپ کول جاندا اے۔ گھر کبوتری بچیاں دی دیکھ بھال کردی اے۔ کبوتر نے پہلاں سارا رات والا واقعہ سپ نوں دسیا۔ سپ نے ساری گل سن کے آکھیا تسی اپنے بچے لے کے میرے گھر آ جائو۔ میں تہاڈے آہلنے وچ بیٹھ جاواں گا۔ کبوتر چھیتی چھیتی سپ تے سپنی دے نال اپنے آہلنے ول گیا۔ ساریاں مل کے کبوتر دے بچیاں نوں اوتھوں کڈھیا تے سپ سپنی دے نال اوہناں دے آہلنے وچ بہہ گیا۔ شکاری نے جدوں اکھ کھولی تاں کبوتری دے بچے چکن لئی چھیتی چھیتی درخت اتے چڑھن لگا۔ جدوں اوہ آہلنے دے کول اپڑ گیا تاں اوس نوں ایہہ ویکھ کے وڈی حیرت ہوء ی کہ اوتھے کبوتر دے بچیاں دی تھاں سپ تے سپنی بیٹھے ہوئے نیں۔ اوس ڈر دے مارے اپروں چھال ماری جس نال اوہنوں ٹنگ اتے سٹ وی لگی۔ پر اوہ ایناں کو خوف زدہ ہو چکیا سی کہ زخمی ہوون دے باوجود اوس نے اپنا سامان چکیا تے اوتھوں نس گیا۔ انج گدھ تے سپ نے اپنی دوستی دا حق ادا کیتا۔