نیکی دا صلہ

کسے پنڈ وچ اک بہت وڈی فیملی رہندی سی۔ دادا، دادی، بیٹا، بہو، پنج پوتے تے تن پوتیاں۔ سارا ٹبر اپنی محنت، چنگے اخلاق تے مذہب نال محبت کرن دی وجہ توں سارے پنڈ کیہ علاقے وچ مشہور سن۔ گھر دے سارے جی اپنا اپنا کم بہت محنت نال کردے۔ جس پاروں گھر وچ خوشحال وی بہت سی۔ گھر وچ چیزاں وافر ہوون پاروں اوہ کسے سوالی نوں خالی نئیں سن موڑ دے۔ دادا اپنے پتر تے پوتیاں نال کھیت وچ کم کردا تے شام نوں سارے جی گھر آ جاندے۔ گھر آ کے دادا اپنے پتر نال گھر وچ بنائی گئی دکان تے بہہ کے لوکاں دے زرعی آلاات دی مرمت دا کم وی کر دے سن۔ جس پاروں سارے لوک اوہناں نوں جاندے تے اوہناں دی عزت کردے سن۔ انج ای چنگے اخلاق پاروں اوہناں دی شہرت علاقے وچ دور دورتک پھیلی ہوئی سی سارے جی وڈیاں دی عزت تے نکیاں نال پیار کردے۔ ہر کوئی ایہناں دی تعریف کردا۔ رج کے ایمان دار تے مہمان نواز سن۔ کوئی اوپرا بندہ وی ایہناں کول آ جاندا تاں ایہہ اوس دی رج سیوہ کردے۔ نماز روزے دے پابند سن۔ نماز فجر توں بعد تلاوت قرآن مجید کردے۔ جھوٹ توں بچدے تے دوجیاں نوں بچن دی تلقین کردے۔

پنڈ وچ رہندے اوہناں نوں کئی سال ہو گئے سن۔ پر اوہناں بارے کسے نوں بہت گھٹ معلومات سن۔ ایس لئی کہ اوہ اپنے کم نال کم رکھدے دوسریاں دے معاملے وچ مداخلت نہ کردے۔ نہ آپس وچ کدے لڑے تے نہ ای گھر والے کسے نال۔ اوہناں کدے کسے نوں گالی گلوچ نئیں سی کیتی۔ آندے جاندے جو وی ملدا اوس نوں سلام کردے۔ ادب نال پیش آندے تے جنے جوگے ہوندے اوس دی خدمت وی کردے ہر کوئی اوہناں دی تعریف کردا۔ بزرگ اولاد دی تعریف سن کے بہت خوش ہوندے۔

وقت گزرن دے نال نال اوہناں نوں کئی مشکلات دا سامنا کرنا پیا۔ جویں پہلاں اوہناں دے دادا تے دادی بیمار ہوئے۔ گھر وچ جو جمع پونجی سی، اوہناں دے علاج اتے لگ گئی۔ فاقیاں دی نوبت آئی پر اوہناں دے روپے وچ کوئی تبدیلی نہ آئی۔ اخیر اوہناں دے مرن تے اوہناں نے انتہائی صبر دا مظاہرہ کیتا۔ اک دن گھر دا وڈا بیمار ہو جاندا اے۔ اوس نوں ہسپتال وچ داخل کروایا جاندا اے۔ دو پتر تیمارداری لئی باپ کول موجود نیں کہ اچانک نرس اوہناں نوں دسدی اے کہ اک مریض نوں خون دی بہت لوڑ اے۔ جے تسی خون دیو تاں اوس دی جان بچائی جا سکدی اے۔ جدوں اوہ خون لئی گئے تاں اوہناں نے ویکھیا کہ زخمی حالت وچ پئے جوان دے والدین اوہناں دیاں منتاں کر رہے نیں۔ اوہناں خون دتا۔ جوان بچ گیا تے اوہناں نوں بہت ساریاں دعاواں ملیاں۔ اک دن ڈاکٹر نے دوائی دی پرچی دتی تے دوائی لیاون دا آکھیا۔ وڈا بھرا دوائی لین میڈیکل سٹور اتے گیا تاں دوائی لین توں بعد اوس کول پیسے گھٹ گئے۔ اوہ بڑا پریشان ہویا۔ دوجے بھرا کولوں پیسے لین لئی گیا۔ واپس آ کے پیسے دیون لگا تاں مالک نے آکھیا کہ تہاڈے پیسے مل گئے نیں۔ ایہہ دوائی لو تے آئندہ ایتھوں ای تساں دوائی لینی ایں تے تہاڈے کولوں پیسے وی نئیں لینے۔ اوہ بہت پریشان ہویا کہ ایہہ ماجرہ اے۔ میڈیکل سٹور والے توں پچھن تے اوس نوں پتہ لگا کہ اوہناں خون دے کے جس بچے دی جان بچائی سی۔ ایہہ اوہناں دا ای سٹور اے۔ اوس بچے دے والد نے اپنے نال کیتی نیکی دا صلہ اوہناں دی مدد دی صورت دتا۔