راجے دے طوطے

پرانے زمانے دی گل اے کہ اک پنڈ وچ راجہ ناں دا اک بندہ رہندا سی۔ اوس نوں پالتو جانور تے پرندے پالن دا بہت شوق سی۔ اوس نے بکری، بھیڈ، مجھ، کتا، بلی تے خرگوش توں وکھ کئی پرندے وی پالے ہوئے سن۔ اوس نوں جتھوں وی کوئی سوہنا جانور یاں پرندا ملدا اوہ خرید لیندا تے فیر بہت محنت تے دل نال اوہناں نوں پالدا۔ پرندیاں وچ بھانویں کہ اوس کول تتر، کبوتر تے چڑیاں وڈی تعداد وچ سن پر اوس دا دل نئیں سی بھردا۔ اوہ پرندیاں دی تعداد وچ آئے دن کوئی نواں پرندیاں خرید کے وادھا کردا رہندا۔ اک دفعہ اوہ ایران دی سیر کرن گیا۔ اوتھے اوس نوں کجھ طوطے پسند آئے جو گلاں کردے سن۔ واپس تے اوس اوہ طوطے خریدے تے بڑی حفاظت نال اپنے گھر لے آیا۔ اوہ ایہناں دے بولن پاروں بہت خوش سی۔ اوہ سارا دن ایہناں نال گلاں کردا رہندا۔ جس پاروں طوطے ایس دے گھل مل گئے سن۔ طوطے بہت تیز ہوگئے سن۔ اوہ ہر روز راجے کولوں کدے چوری منگدے تے کدے کوئی پھل، کدے کھان نوں ہری مرچ یاں سبزی منگدے تے کدے بادام۔ راجہ اوہناں دی ہر خواہش پوری کردا سی۔

اک دفعہ نالدے پنڈ وچ میلہ لگا۔ اوس میلے وچ دوروں دوروں لوک اپنے پالتو جانور تے پرندے نمائش لئی لے کے آئے۔ اکثر لوک بیل، گاواں، مجھاں، کتے، بلیاں، خرگوش، گھوڑے، اونٹ لے کے آئے۔ کجھ لوک نچن والے گھوڑے لے کے آئے۔ ہن میلے دے میدان وچ واری واری لوک اپنے جانور یاں پرندے لے کے آندے تے اوہناں دے کرتب وکھاندے۔ سارے لوک اوہناں دے کرتب ویکھ کے بہت خوش ہوندے تے تاڑی وجا کے داد دیندے تے اپنی خوشی دا اظہار کردے۔

راجہ وی ایس میلے وچ اپنے طوطیاں دے نال اپڑیا۔ اوس نوں یقین سی کہ جدوں اوہ طوطیاں نال گلاں کرے گا تاں لوک حیران رہ جاون گے۔ اوس میدان دے اندر جا کے پہلاں پنجرے وچوں طوطیاں نوں باہر کڈھیا تے اوہناں دے نمائش کیتی۔ کیوں جے طوطے اوس دی ہر گل مندے سن۔ ایس اوس دے آکھن تے اک طوطے نے کلمہ سنایا تے دوجے نے قومی ترانہ، اک طوطے نے گیت سنایا تے دوجے نے وکھ وکھ کرتب کر کے لوکاں نوں خوش کیتا۔ ایہہ سارا کجھ میلے وچ موجود بلیاں وی ویکھ رہیاں سن۔ اک بلی نے جدوں ویکھیا تے اوس دے مالک نے اوس دے گلے وچوں سنگلی اتار دتی اے تاں اوہ تیزی نال اک طوطے اتے حملہ آور ہوئی تے اوہدی گردن اپنے منہ وچ لے کے اوس نوں مار دتا۔ ایہہ سارا کجھ اپنی تیزی نال ہویا کہ کسے نوں وی سنبھلن دا موقع وی نہ ملیا۔ راجہ اپنے طوطے نوں بلی توں بچاون لئی اوہدے پچھے نسیا۔ پر بلی دور جا چکی سی۔ جدوں اوہ اپنے دوجے طوطیاں کول اپڑیا تے دوجی بلی نے حملہ کر کے اک ہور طوطے نوں مار دتا۔ انج راجے نے بڑی مشکل نال اپنے باقی دے طوطے بچائے۔ میلے دی انتظامیہ نے اوس بلیاں دے مالکاں نوں جرمانہ کیتا جس وچوں کجھ پیسے راجے نوں وی ادا کیتے گئے۔ پر راجہ بہت ای ٹٹے ہوئے دل نال باقی دے طوطیاں نوں لے کے گھر پرتیا۔