بولدے درخت

کسے پنڈ وچ اک بہت ای سمجھ دار خاندان رہندا سی۔ اوس خاندان دے وڈے تاں اک پاسے بچے وی بہت سمجھ داری دیاں گلاں کردے سن، اوس خاندان دا اک بچہ جس دا ناں ’’ننھا‘‘ سی، ہر کسے نال بہت عقل مندی نال گل کروا تے لوک اوس دیاں گلاں سن کے حیران رہ جاندے تے اوس نال پیار کردے۔

اک دن اوہ پنڈ دے نیڑے جنگل وچ گیا۔ اوہنوں جنگل دی حالت ویکھ کے بہت دکھ ہویا کہ جنگل دے سارے رستیاں اتے گھاہ اُگیا ہویا اے۔ کئی درخت سک کے ڈگ پے نیں تے کئی سک دے جا رہے نیں۔ اوس نے تہیہ کیتا کہ اوہ جنگل دی صفائی ستھرائی ضرور کرے گا تے ایس لئی اوہ بادشاہ تک جاون لئی تیار ہو گیا۔

اک سویر اوہ بادشاہ دے دربار اندر پہنچ جاندا اے تے سب توں پہلاں اپنے پنڈ دا تعارف کروا ندا اے۔ اوس دسیا کہ میرا پنڈ بہت سوہنا اے تے پنڈ دے نال لگدا جنگل اوہناں ای گندا اے۔ مینوں ایہہ دسو تہاڈے دل وچ جنگل دی صفائی دا کدے خیال نئیں آیا۔ ایہہ گل سن کے بادشاہ سوچیں پے گیا تے سپاہیاں نوں بہت غصہ آیا۔ اوہناں ننھے نوں دربار وچوں کڈھن لئی پھڑیا۔ بادشاہ نے ایہہ ویکھ  کے سپاہیاں نوں روکیا تے آکھیا بچے نوں بولن دیو۔ بادشاہ نے اوس کولوں اوہدا ناں پچھیا۔ اوس دسیا کہ میرا ناں ننھا ایں۔ میرا گھر ایسے پنڈ وچ اے تے میرے والد فوج وچ نوکری کر دے نیں۔ بادشاہ نے پچھیا توں کیہ چاہنا ایں؟ اوس جواب دتا کہ میری خواہش اے کہ میں جنگل دی صفائی کراں۔ تسی مینوں ایس کم دی اجازت دیو۔ کیوں جے ایہہ کم میں اکلا نئیں کر سکدا ایس لئی کجھ سپاہیاں نوں ایس کم لئی میرے نال مقرر کرو۔ تاں جے میں اوہناں دی مدد نال جنگل دی صفائی کر سکاں، بادشاہ ننھے دی ایس سوچ توں بہت متاثر ہویا تے اوس نے 60 سپاہیاں دی ڈیوٹی لائی ننھے نال جنگل دی صفائی کرن لئی۔

ننھا اپنے سپاہیاں دے نال کئی دن پہلاں جنگل دے رستیاں دی صفائی کردا پیا۔ جدوں اوس ویکھیا کہ رستے صاف ہو گئے نیں تے جان وچ سہولت ہو گئی اے تاں اوس نے ایس توں بعد ڈگے سکے درختاں نوں جنگل توں باہر لیاون دا کم شروع کیتا۔ ایس کم دے مکمل ہوون توں بعد اوس اوہناں درختاں دی تھاواں اتے نویں درخت لگوائے۔ جیہڑی زمین جنگل دی صاف ہوئی اوتھے کئی قسم دے درختاں دے بی کھلار دتے۔ تے پانی دی دتا۔ ایس توں وکھ کئی قسم دے پھل والے پودے وی لائے۔ لوکاں دے بیٹھن لئی تھاواں وی بنایاں تے انج جنگل پہلاں نالوں بہت سوہنا ہو گیا۔ ہن لوک جنگل دی سیر کرن تے جنگل دی صفائی ویکھ کے بہت خوش ہوندے۔

اک دن ننھا جنگل دی صفائی ویکھن لئی جنگل اندر دور تک گیا۔ اوس ہر تھاں صفائی ویکھی تے بہت خوش ہویا۔ واپس آندے ہویاں اوہ تھک کے اک درخت تھلے بہہ گیا۔ تھکاوٹ پاروں اوس نوں نیند آ گئی۔ اچانک اوس نوں محسوس ہویا کہ جس درخت تھلے اوہ بیٹھا اے اوہ اوس نال گلاں کر رہیا اے۔ ننھا بولدے ہوئے درخت نوں ویکھ کے بہت حیران ہویا۔ درخت اوس نوں کہہ رہیا سی کہ تیرا بہت شکریہ۔ تیری وجہ توں ساہنوں نویں زندگی ملی اے۔ جے توں کوشش نہ کردا تاں پانی دی تھوڑ پاروں کجھ دناں بعد اساں وی سک جانا سی۔ تیری وجہ توں اسیں اک وار فیر ہرے بھرے ہو گئے آں۔ ننھا ایہہ سن کے بہت خوش ہویا۔ اگلے دن اوس دربار وچ جا کے ایہہ گل دسی تے بادشاہ دا شکریہ ادا کیتا۔ ننھے دی تجویز تے بادشاہ نے جنگل دی صفائی دا انتظام لئی پنجاہ (50) سپاہی مستقل مقرر کر دتے۔