بیوقوف بلی تے سیانے چوہے

پرانے زمانے دی گل اے کہ اک گھر وچ بلی رہندی سی۔ اوس دے تن بچے وی سن۔ بلی انتہائی بدمزاج تے لڑاکی سی۔ چھوٹی چھوٹی گل تے لڑنا اوس دی عادت سی۔ جس پاروں اوس نوں کوئی وی پسند نئیں سی کردا تے نا ای دوستی۔ جے کر اوہدے کولوں کوئی چیز منگن آندا تاں بلی اوس دی بے عزتی کردیندی۔ انتہائی کنجوس بلی ہر ویلے اپنے کول اک تھیلا رکھدی سی۔ اوس تھیلے وچ اوہنے اپنے بچیاں لئی کھان دا سامان رکھیا ہوندا۔ جے کر کوئی اوس کول کھان لئی کوئی شے منگدا تاں بلی اوس نوں نئیں سی دیندی۔ تھیلے وچ کیہ کجھ اے ایس بارے صرف بلی ای جاندی سی کہ ایس نے تھیلے وچ کوئی قیمتی شے لکائی ہوئی اے۔ ایس لئی اوس محلے دے سارے جانور خاص طور تے چوہے ایس ٹوہ وچ رہندے کہ ویکھیا جاوے کہ تھیلے وچ بلی نے کیہ کجھ لکویا اے ایس بارے صرف بلی ای جاندی سی۔ باقی دے جانوراں نوں ایہو پتہ سی کہ بلی نے ایس تھیلے وچ کوئی قیمتی شے لکائی ہوئی اے۔ پر بلی تھیلا ویکھن دا کوئی وی موقع کسے نوں نہ دتا۔

اک دن محلے دے سارے چوہے اکٹھے ہوئے تے پروگرام بنایا کہ بلی نوں اپنے بچیاں نال بہت پیار اے۔ جدوں رات نوں بلی سوں جاوے گی تاں اسیں اوس دے بچیاں دے کپڑے پاء کے آرام نال تھیلے دی تلاشی لے لواں گے۔ ایس دران جے بلی دی اکھ کھل وی گئی تاں اوہ اپنے بچے سمجھ کے ساہنوں کجھ وی نئیں آکھے گی۔

پروگرام دے مطابق جدوں ادھی رات نوں بلی تے اوہدے بچے گہری نیند سوں گئے تاں کجھ چوہے بلی دے کمرے وچ داخل ہوئے پہلاں اوہناں بلی دے بچیاں دے کپڑے پائے تے فیر تھیلے دی تلاش شروع کیتی۔ اوہناں ویکھ کے حیرت ہوئی کہ بلی نے اپنے بچیاں دے کھاون لئی گوشت توں علاوہ کئی شیواں تھیلے وچ جمع کیتیاں ہوئیاں نیں۔ اوہ تھیلے وچوں گوشت کڈھ کے کھا رہے سن کہ بلی دی اکھ کھل گئی۔ اوس اوہناں اتے غور نئیں کیتا۔ ویکھیا کہ اوس دے بچیاں نوں بھکھ لگی اے تے اوہ روٹی کھا رہے نیں۔ چوہیاں لالچ کیتی اوہ سامان چکن دی بجائے اوتھے ای بہہ کے کھاندے رہے۔ تھوڑی دیر پچھوں بلی دی مڑ کے اکھ کھلی تاں اوس نے ویکھیا کہ اوس دے بچے تاں اوس دے نال ستے ہوئے نیں۔ جدوں اوہنے غور کیتا تاں اوس نوں پتہ لگا کہ ایہہ چوہے نیں جنہاں اوہدے بچیاں دے کپڑے پا کے اوس نوں دکھوکہ دے رہے نیں۔ بلی اوہناں نوں سزا دیون لئی ڈنڈا پھڑ لیائی تے سارے چوہے ڈردے مارے اوتھوں نس گئے۔ صرف چوہے دا اک بچہ جس بہتا کھا لیا سی اوس کولوں نسیا نہ گیا تے اوہ کول پئی بوتل اندر وڑ گیا۔

بلی نے اوس نوں کھاون لئی بوتل دے اندر اپنا منہ واڑن دی کوشش کیتی۔ پر کامیاب نہ ہوئی۔ اوس نے اپنے ہتھ نال اوس پھڑن لئی ہتھ بوتل اندر پاون دی کوشش کیتی پر ایہہ کوشش وی اوس دی ناکام رہی۔ چوہا ڈر دے مارے بوتل دی اک نکرے بہہ گیا۔ بلی نوں اوس اتے بہت غصہ آ رہیا سی۔ اوس نے سزا دیون لئی اک سوٹی دی تلاش شروع کیتی تاں اوس نوں بوتل اندر واڑ کے اوس دی پیٹائی کیتی جا سکے۔ جدوں اوہ سوتی لین لئی دوجے کمرے وچ گئی تاں باقی دے چوہے اوتھے آ گئے۔ اوہناں بلی دے آون توں پہلاں اک چوہے نے اپنی پوچھل بوتل اندر واڑی تے نکے چوہے نوں پوچھل پھڑن دا آکھیا۔ جدوں اوس پوچھل پھڑ لئی تے وڈے چوہے نے زور لاہ کے اوس نوں بوتل وچوں کڈھ لیا تے اوتھوں سارے چوہے دوڑ گئے۔ جدوں بلی سوٹی لے کے آئی تاں ایہہ ویکھ کے حیران رہ گئی کہ نکا چوہا بوتل وچوں نکل کے فرار ہو چکیا اے۔ انج بلی نوں بہت شرمندگی دا سامنا کرنا پیا۔