بھیڑیا تے بھیڈ

اک جنگل وچ اِک خون خوار بھیڑیا رہندا سی۔ اوہ بہت ظالم سی تے جانوراں دے بچے کھا جاندا سی۔ اوسے جنگل وچ اک بھیڈ اپنے پنج بچیاں نال رہندی سی۔ اوس دے بچے بہت شرارتی سن۔ بھیڑیے دی اوہناں بچیاں اتے نظر سی۔ اوس نوں کھاون دا کوئی موقع نئیں سی مل رہیا۔

بھیڈ سویرے اپنے بچیاں نوں روٹی کھوا کے کم تے ٹر جاندی۔ اوہ اپنے بچیاں نوں آکھدی کہ گھر دے اندر ای کھیڈنا ایں۔ شرارتاں نئیں کرنیاں تے جے کوئی بوہا کھڑکاوے تاں تصدیق کرن توں پہلاں بوہا نئیں کھولنا۔ ایہہ آکھ کے بھیڈ کم تے چلے جاندی۔

اک دن بھیڈ دے کم اتے جاون توں بعد بھیڈ دے بچے شرارتاں کردے ہوئے گھروں باہر آ گئے۔ باہر بھیڑیا بیٹھا اوہناں نوں ویکھ رہیا سی۔ جدوں بھیڑیا اوہناں اتے حملہ آور ہویا تاں اوہ ڈور کے اندر آ گئے تے بوہا بند کر لیا۔ بھیڑیا ناکام ہو کے بوہے دے اک پاسے بہہ کے اوہناں نوں کھاون دا کوئی ہور پلان بناون لگ پیا۔ تیسرے پہر اوس نے بوہا کھڑکایا۔ بچیاں نے پچھیا کون؟ بھیڑیے جواب دتا میں تہاڈا ماما۔ تہاڈی ماں نے کھاون پین دا سامان دے کے مینوں تہاڈے ول گھلیا اے۔ ایہہ سامان لے لو۔ اوہناں بوہا کھول دتا تے بھیڑیے نے اندر وڑ دے ای اوہناں اتے حملہ کر دتا تے دو بچے کھا گیا۔ باقی بچیاں لک کے اپنی جان بچائی۔ بھیڑیے جان توں بعد وی بچے لکے رہے تے بوہا کھلا رہیا۔

جدوں شام نوں بھیڈ کم توں واپس آئی تاں گھر دا بوہا کھلا ویکھ کے پریشان ہو گئی۔ اوس گھر داخل ہو کے اپنے بچیاں نوں آواز ماری پہلا اک بچہ اپنی ماں دے سامنے آیا تے مڑ دوسرے وی سامنے آ گئے۔ اوہناں بھیڑیے دی مکاری بارے اپنی ماں نوں دسیا۔ بھیڈ نوں بہت غصہ آیا تے اوس بدلہ لین دا فیصلہ کیتا۔

اوہ بھیڑیے نوں تلاش کرن لئی گھروں باہر آئی تاں اوس نوں جنگل دے اک کونے وچ بھیڑیا ستا ہویا نظر آیا، بھیڈ دے بچے کھاون نال اوس دا ڈھڈ باہر نوں ہویا سی۔ اوس نے پہلاں اک نکا جیہا پتھر ماریا تاں جے پتہ لگے کہ بھیڑیا گہری نیند ستا ہویا اے کہ نئیں۔ پتھر مارن توں بعد اوہ جھاڑیاں وچ لک گئی۔ کافی دیر تک اوس نے بھیڑیے دے ہلن دا انتظار کیتا۔ جدوں اوہ نہ ہلیا تاں اوس نے اپنے دوجے بچیاں تے جانوراں نوں بلایا جو بھیڑیے توں تنگ سن۔ ساریاں نے اپنے ہتھاں وچ وڈے پتھر پھڑے تے رل کے بھیڑیے اتے پتھراں دا مینہ پا دتا۔ اک پتھر اوہدے سر وچ وجا جس پاروں بہت سارا خون نکلیا۔ اوس اُٹھ کے تے حملہ آور ہوون دی کوشش کیتی پر لت زخمی ہوون پاروں اوہدے کولوں اُٹھیا نہ گیا۔ جانوراں نے جدوں اوہدی ایہہ حالت ویکھی تے ہور پتھر مارے۔ انج پتھراں مارن دی وجہ توں اوہدی موت ہو جاندی اے۔ بھیڈ نے اپنے بچیاں دا بدلہ لے لیا تے باقی دے جانوراں وی اوہدے مرن تے خوشی دا اظہار کیتا۔