اپنی مدد آپ

معاشرے وچ ان گنت قسم دے لوک رہندے نیں۔ بُرے وی چنگے وی۔ رحم دل وی تے ظالم وی۔ پر کدے کدے انج ہوندا اے کہ چنگا آدمی وی ماحول دی وجہ توں برا بن جاندا اے۔ اج گل کردے آں اک اجیہے پنڈ جس دی آبادی باقی دے پنڈاں توں بہت زیادہ سی۔ آبادی دے کجھ بندے بُرے کماں وچ پھسے ہوئے سن۔ اوہناں دا سارے پنڈ والیاں اتے ایناں رعب سی کہ چنگا آدمی وی اوہناں دے خلاف گل نئیں سی کر سکدا۔ ایتھوں کہ جدوں اوہناں دے ظلم دے خلاف کوئی بندہ تھانے شکایت درج کروان جاندا تاں پولیس والے شکایت درج کردے سگوں الٹا اوس نوں ڈرایا جاندا کہ ہن اوہناں بُرے لوکاں کولوں تیری جان نوں خطرہ اے۔ نشے دا بیوپار۔ چوری تے ڈاکے مسافراں نوں لٹتا تے زنانیاں نال چھیڑ چھاڑ ایتھوں دیاں عام برائیاں سن تے کوئی وی ایہناں دے خلاف بولن دی جرأت نئیں سی کر سکدا۔ شام نوں ہنیرا پھیلن توں بعد پورے پنڈ وچ سناٹا پھیل جاندا، لوک گھراں اندر وی اپنے آپ نوں محفوظ نئیں سمجھدے سن۔ ہر روز کسے نہ کسے گھر چوری ہو جانا یاں ڈنگراں دا کھلنا عام جیہاں گلاں سن۔

پنڈ دی وڈی گنتی ایس ماحول توں تنگ سی۔ اک دن پنڈ والیاں رل کے سوچیا کہ ایس برائی توں چھیتی توں چھیتی جان چھڑوائی جاوے۔ پنڈ دے بزرگاں نے ایہہ فیصلہ کیتا کہ سارے پنڈ والیاں کولوں تھوڑے تھوڑے پیسے جمع کیتے جاون تے فیر اوس توں اسلحہ خرید کے ہر گھر والے نوں دتا جاوے، جدوں ایہہ لوک کسی نوں تنگ کرن تاں بندہ اسلحہ چلاوے تے سارے پنڈ والے اوس اسلحہ چلاون والے بندے دی مدد وی کرن گے۔ سارے پنڈ والیاں برائی دے خاتمے لئی اسلح ہ خریدن لئی پیسے جمع کروا دتے۔ اخیر چوری چوری اسلحہ خرید کے ہر گھر والے نوں دے دتا گیا تے نالے چلاون لئی حوصلہ وی۔

ایہناں بھیڑیے لوکاں وچوں کجھ لوک پنڈ دے کسے چوک وچ کھڑے ہو جاندے تے لنگھدیاں زنانیاں اتے آوازاں کسے دے تے چھیڑ دے۔ کئی وار اوہناں دے گھر والیاں دے منع کرن تے اوہناں گھر والیاں نوں ماریاں تے زنانی نال بہتی بدتمیزی کیتی۔ اک دفعہ پنڈ دی اک کڑی کسے کم لئی گھروں باہر نکلی تے اک بدمعاش نے اوس نوں تنگ کرنا شروع کر دتا۔ پنڈ دا اک نوجوان کھڑا ایہہ سارا کجھ ویکھ رہیا سی۔ اوس نے روکیا پر بدمعاش نہ ٹلیا۔ اوہ اپنے گھر گیا تے پستول لے کے اوس نوں گولی مار کے زخمی کر دتا۔ بدمعاش زخمی ہو کے اپنے ساتھیاں کول اپڑیا تے ساری گل دسی۔ ساریاں نوں ودی حیرانی ہوئی اوہ رل کے اوس جوان نوں مارن لئی آئے۔ پر جدوں اوہناں اگوں بہت سارے لوکاں دے ہتھ وچ پستول ویکھے تاں ڈر کے اوتھوں واپس آ گئے۔ انج پنڈ والیاں نوں حوصلہ ملیا۔

کجھ مہینیاں بعد پنڈ دے بزرگ فیر رل بیٹھے تے اوہناں فیصلہ کیتا کہ پنڈ چوں ویہہ (20) بہادر منڈے چنے جاون جو رات نوں اسلحہ لے کے چوکیداری کرن تے کسے وی ہنگامی صورت حال دا مقابلہ کرن لئی اوہناں دی مدد واسطے اپنے ای منڈے تیار رہن۔ ویہہ بہادر منڈیاں دی چون توں بعد اوہناں نوں اک اک پستول تے ٹارچ دتی گئی تے آکھیا گیا کہ جے اوہ بھیڑے بندے رات نوں کسے نوں لٹن، چوری کرن یاں کسے نوں چھیڑن تاں اوس نوں گولی مار دیو ایس دے نال نال چوراں دا کھرا لبھن لئی اوہناں کھوجی کتے وی دتے گئے۔ رات نوں پنڈ وچ لوکاں دی پچھان تے آمد و رفت نوں بہتر بناون لئی ہر گلی وچ روشنی دا انتظام وی کیتا گیا۔ ایس انتظام توں بعد پنڈ والیاں سکھ دا ساہ لیا۔

اک رات جدوں منڈے چوکیداری کر رہے سن کہ اوہناں نوں پنڈ دی اک نکر نوں گولیاں چلن دی آواز آئی۔ کجھ منڈے اوس پاسے دوڑے تاں پتہ لگا کہ تن بندے چوری کرن لئی اک گھر وچ داخل ہوئے نیں۔ گھر والیاں دی اکھ کھلن تے شور پاون تے اوہ دوڑے تے چوکی دار نے اوہناں اتے گولی چلا دتی جس پاروں اک چور ڈگ پیا تے باقی نس گئے۔ چوکی داراں اوہناں دا پچھا کیتا تے گولی مار کے اوہناں وچوں اک نوں زخمی کر دتا تے دوجے نوں مار دتا۔ زخمی چوراں نوں پنڈ والیاں پھڑ کے سویرے پولیس دے حوالے کر دتا۔ انج ای کجھ دناں بعد مسافر نوں لٹن تے چوراں تے چوکی داراں وچ گولیاں دے تبادلے وچ اک چور ماریا گیا تے باقی دے نس گئے۔ پنڈ والیاں پولیس نوں پنڈ وچ چوکی قائم کرن تے اوہناں دی حفاظت دا انتظام کرن دا وعدہ کیتا۔ پولیس جو پہلے اوہناں کولوں ڈردی سی۔ ہن پنڈ والیاں نال مل کے برائیاں دا خاتمہ کرن لگ پئی۔ اوہناں دی کوشش پاروں بہت سارے بھیڑے لوکاں دی گرفتاری ہوئی تے کجھ پنڈ چھڈ کے چلے گئے۔ انج لوکاں نے اپنی مدد آپ دے تحت پنڈ نوں برائیاں تے برے لوکاں توں پاک کیتا۔