کرنی دا بدلہ

اک دفعہ دا ذکر اے کہ اک جنگل وچ بہت سارے جانور ہنسی خوشی رہ رہے سن۔ اوہ اک دوسرے نال پیار کردے، مدد کردے تے اک دوجے دے دکھ سکھ وچ شریک ہوندے۔ جویں سیانے آکھدے نیں کہ جتھے پیار ہووے اوتھے ویر وی ہوندا اے۔ انج ایس جنگل وچ اک سارس تے لومڑ گوانڈھی سن۔ دونویں اک دوجے دے ویری سن تے اک دوجی دی بے عزتی دا کوئی موقع ہتھوں نئیں سی جان دیندے۔

اک دن سارس نے لومڑ دی بے عزتی کرن لئی سارے جانوراں دی دعوت کیتی۔ جنگل دے بادشاہ شیر نوں دعوت دتی تے لومڑ نوں وی دعوت تے بلایا۔ لومڑ وی سارے جانوراں نال آ گیا۔ سارس نے ساریاں نوں جی آیاں نوں آکھیا تے بہت اخلاق نال سب نال گل بات کیتی۔ اوس ساریاں نوں کھانا پیش کیتا تے لومڑ نوں اوس دا پسندیدہ سوپ اک ’’صراحی‘‘ وچ پا کے پیش کیتا۔ لومڑ نے جدوں اپنا منہ صراحی اندر کرن دی کوشش کیتی تاں اوس دا چہرہ صراحی دا منہ تنگ ہوون پاروں زخمی ہو گیا۔ اوس نوں سارس تے بہت غصہ آیا تے اوس فیصلہ کیتا کہ اوہ سارے جانوراں دے سامنے سارس کولوں بدلہ لوے گا۔

بدلہ لین لئی اوس اک دن سارے جانوراں دی دعوت کیتی۔ شیر سمیت اوس نے سارس نوں وی دعوت دے بلایا۔ سارے جانور ویلے سر دسی ہوئی تھاں اتے اپڑ گئے۔ لومڑ نے ساریاں دا استقبال کیتا تے گپ شپ توں بعد روٹی کھوائی گئی۔ لومڑ دے نوکراں سارس نوں شوربہ اک پلیٹ وچ پا کے دتا۔ جیہڑا اوس کولوں لمبی چنج ہوون پاروں پی نئیں سی ہورہیا۔ سارس نوں بہت شرمندگی ہوئی۔ انج لومڑ نے اپنی بے عزتی دا بدلہ لے لیا۔ سارس نوں احساس ہو گیا کہ اوس نے لومڑ نال بھیڑا سلوک کیتا سی تے بدلے وچ اوس نال وی بھیڑا سلوک ہویا اے۔