غلط فہمی دا نتیجہ

اک دفعہ دا ذکر اے کہ کسے جنگل وچ دو بکریاں رہندیاں سن۔ جنہاں دا آپس وچ بہت پیار سی تے اوہ اک دوجے اتے اعتبار وی کردیاں سن۔ دونویں جنگل دے پھل تے گھاہ کھا کے بہت موٹیاں تے سوہنیاں ہو گئیاں سن۔ جدوں اوہناں وچوں کسے اک اتے وی کوئی مصیبت آندی تاں اوہ رل کے اک دوسرے دی مدد کر دیاں تے انج اوہ مصیبت کولوں جان چھڑا لیندیاں سن۔ روز اوہ چرن لئی دوسرے جنگل جاندیاں۔ رستے وچ اوہناں نوں ہر ویلے خطرہ رہندا سی۔ کیوں جے بہت سارے خون خوار جانور اوہناں نوں کھانا چاہندے سن۔ پر اوہناں دے آپسی پیار پاروں اوہ حملے دی جرأت نئیں سی کردے، جویں کہ اک وار شیر نے اک بکری اتے حملہ کیتا۔ دوسری نے شیر دے ڈھڈ وچ سنگھ مارے تے شیر نوں زخمی کر دتا۔ شیر زخمی حالت وچوں اوتھوں دوڑ گیا۔ شیر دی سارے جانوراں سامنے بہت بے عزتی ہوئی تے اوہنے بے عزتی دا بدلہ لین لئی سوچنا شروع کیتا۔ پر کوئی وی حل اوس دے ذہن وچ نہ آیا۔

اک دن شیر نے لومڑی نوں سدیا تے اپنے پروگرام بارے اوس کولوں رائے منگی۔ لومڑی نے آکھیا کہ جدوں تائیں اوہناں وچکار غلط فہمی پیدا نہ کیتی جاوے۔ ایہہ کم ممکن نئیں ہونا۔ غلط فہمی پیدا کرن دا ذمہ اوس چکیا تے اوہ بکریاں ول چلے گئی۔

اک بکری چر رہی سی تے دوجی پانی پین ندی اتے گئی سی۔ اوس نے ایس موقع توں فائدہ چکدے ہوئے پہلاں بکری دی خیر خیریت پچھی تے بعد وچ آکھیا کہ اوس نوں پیاس نئیں سی لگی، اوہ بہانہ بنا کے تیرے کول جان چھڑوا کے گئی تاں جے شیر تیرے اتے حملہ کرے تے اوس دی جان بچی رہے۔ ایناں آکھ کے لومڑی اوتھوں ندی اتے آ گئی تے دوجی دی خیریت معلوم کرن توں بعد آکھن لگی کہ دوجی بکری تیرے نال پانی پین ایس لئی نئیں آئی کہ جدوں شیر تیرے اتے حملہ کرے تاں اوس دی جان بچی جاوے۔ اینی گل آکھ کے لومڑی اپنے گھر آ گئی تے دونویں بکریاں اپنے گھر ول ٹرپئیاں، دونویں بہت اداس سن تے غصے وچ وی۔ پورے رستے اوہناں کسے نہ کوئی گل نہ کیتی تے رات نوں کوئی گل کیتے بغیر ای سو گئیاں۔

اگلی سویر اوہناں دے جنگل وچ جاون توں پہلاں ای لومڑی نے ساری گل شیر نوں دس دتی تے شکار کرن دی تیاری دا آکھیا۔ شیر تیاری کر کے اوس رستے اتے بہہ گیا جتھوں دی بکریاں لنگھدیاں سن۔ اوس دوروں اک بکری نوں آندے ویکھیا تے پوری تیاری نال اوہ جھاڑیاں وچ لک گیا۔ جدوں بکری نیڑے آئی تاں اوس نے اوہدے اتے حملہ کر دتا۔ بکری نے اپنے آپ نوں بچاون لئی بہت زور لایا پر شیر دے نال دوجے جانور وی سن جنہاں رل کے اوس نوں مار دتا تے اوہدا گوشت کھا گئے۔ کجھ دیر پچھوں دوجی بکری اوتھوں دی لنگھی تاں اوس نوں اپنی دوست دی کھل تے ہڈیاں نظر آئیاں۔ اوس نوں اوہدی موت دا بہت دکھ ہویا۔ اوہ جانوراں کولوں ڈر دے ہوئے گھاہ کھاہدے بغیر گھر واپس آ گئی تے کئی دناں تائیں گھاہ چرن نہ گئی۔ شیر روز اوس رستے اتے دوجی بکری دا انتظار کردا رہندا۔ آخر کئی دناں دی بھکھ توں تنگ آ کے دوجی بکری گھاہ چرن لئی جاندی اے۔ شیر اوس نوں آندا ویکھ کے جھاڑیاں اندر لک جاندا اے۔ نیڑے آون تے اوہ بکری اتے حملہ کر دیندا اے۔ بکری بھکھ پاروں نڈھال سی ایس لئی اوہ شیر دا مقابلہ نہ کر سکی۔ شیر نے اوس دی گردن منہ وچ لے اوس نوں مار دتا۔ انج غلط فہمی پاروں دونویں بکریاں نوں اپنی جان توں ہتھ دھونا پیا۔