معافی دا اثر

آکھیا جاندا اے کہ کسے پنڈ وچ دو بندے رہندے سن۔ دونویں اکو محلے وچ رہندے سن۔ اکو سکول وچ پڑھدے سن تے آپس وچ دوست وی سن، پر عادتاں دونواں دیاں اک دوسرے توں الٹ سن۔ جس پاروں اک نوں تے لوک پسند کردے سن تے دوجے نوں برا آکھ کے نفرت کردے سن۔ اک دا ناں عامر سی۔ بہت ای نیک، محنتی تے فرماں بردار سی۔ اوس کدے اپنے ماں پیو نوں تنگ نئیں سی کیتا۔ پڑھائی وچ بہت تیز، اخلاق دا چنگا تے ماں باپ دی ہر گل مندا سی۔ پڑھائی وچ چنگا ہوون پاروں سارے استاد اوس نال پیار کردے سن۔ سارے دوست اوس توں خوش تے اوہدی تعریف کردے سن۔ ایس لئی کہ اوہ دوستاں دا خیال رکھدا تے پڑھائی وچ اوہناں دی مدد کردا رہندا۔

جدوں کہ جبار بہت زیادہ لاپرواہ سی، ہر ویلے شرارتاں کردے رہنا تے الٹے سدھے کم کرنے۔ سکول وچ سب توں زیادہ نالائق۔ جس وجہ توں استاد اوس نوں پیار نئیں سی کردے تے نہ کوئی اوہدا جماعتی اوہنوں دوست بناندا۔ سارے محلے والے اوہدیاں شرارتاں توں تنگ سی۔ گلی چوں لنگھدے ہویاں جانوراں نوں چھیڑنا، بزرگاں نال بدتمیزی نال بولنا، بالاں کولوں چیز کھو کے کھا لینا، اوس دی عادت سی، اوہ اپنے والدین دی عزت نئیں سی کردا تے نہ ای اوہنوں کسے دی عزت دا خیال سی۔ اوس دے سکول والے تے والدین اوس کولوں بہت تنگ سی۔ اوہ اکثر سکول نہ جاندا تے آوارہ منڈیاں نال آوارہ گردی کر دا رہندا۔ سکول دے کیفے اتے بہہ کے سگریٹ پیندا تے اک دوجے نوں مذاق کردا، ہر استاد نال بدتمیزی نال بولدا تے کدے کدے کلاس روم دے باہر کھڑا ہو کے اپنی حاضری بولدا تے اوتھوں نسدے ہوئے اپنے آوارہ دوستاں کول آ جاندا۔ اوس دے والدین تے استاداں نے اوس نوں کئی واری منع کیتا۔ پر اوس کسے نوں وی خاطر وچ نہ لیاندا۔

اک دن اوس بدتمیزی دی حد کر دتی۔ سکول کیفے تے بہہ کے اوس اپنے ساتھیاں نال شراب پیتی۔ جدوں عامر تے دوجے استاداں نوں پتہ لگا تاں اوہناں آکے روکیا۔ اگوں اوس نے استاداں نال بدتمیزی کیتی تے عامر نوں مار کے اوہدا سر پاڑ دتا تے بازو دی ہڈی توڑ دتی۔ سکول والیاں اوس نوں پھڑ کے پولیس دے حوالے کر دتا۔ پولیس والیاں اوس نوں گرفتار کر لیا تے تھانے لے جا کے بہت ماریا مار کھا کے اوس دا نشہ اتریا تاں اوس نوں افسوس ہویا کہ اوس نے نشے وچ عامر نوں روکن تے مار کے بازو توڑ دتا اے۔ اوہ رو رو کے پولیس والیاں کولوں معافی منگ رہیا سی۔ ادھر اوس دے گھر والیاں نوں پتہ لگا تاں اوہ عامر دے گھر محلے دے کجھ معزز بندیاں نوں لے گئے تے اپنے ولوں تے پتر ولوں معافی منگی تے علاج دا سارا خرچہ برداشت کرن دی حامی بھری۔ نالے دسیا کہ اوہناں دے پتر نوں اپنی غلطی دا احساس ہو گیا اے۔ اوس توبہ کرلئی اے تے وعدہ کیتا اے کہ اوہ نہ تے کوئی غلط کم کرے گا تے نہ ای آوارہ دوستاں وچ بیٹھے گا۔ محلے والیاں نے وی عامر دے والدین نوں معاف کرن دا آکھیا تے ایس گل ضمانت دتی کہ آئندہ اوہ کوئی غلط کم نئیں کرے گا تے نہ ای کسے نال بدتمیزی کرے گا۔ انج گھر والیاں نے اوہنوں معاف کر دتا۔ پولیس نے اوہنوں چھڈ دتاتے اوہ شریف بن کے رہن لگ پیا۔