ہیرا چوری دی سزا

پرانے وقتاں دی گل اے کہ اک ملک اتے بہلول نامی بادشاہ حکومت کردا سی۔ بادشاہ اپنی رعایا دا بہت زیادہ خیال رکھدا تے ہر قسم دیاں سہولتاں اوہناں نوں فراہم کرن دی کوشش کردا۔ ساری رعایا اوس توں بہت خوش سی۔ اوہ اک وڈے خزانے دا مالک وی سی۔ رعایا وچوں جدوں کسے کوئی لوڑ پیندی یاں مسئلہ ہوندا تاں اوہ بادشاہ نال رابطہ کردا۔ بادشاہ نوں ہر طریقے نال اوس مدد کردا۔ ساری رعایا بہت خوشحال سی۔ ملک وچ امن دا مان وی حالت بہت بہتر سی۔

بادشاہ کول روپے پیسے توں وکھ اک قیمتی ہیرا وی سی۔ جس دا اوس توں وکھ ملکہ تے اک وزیر نوں پتہ سی۔ بادشاہ اپنے وزیر اتے بہت اعتماد کردا سی۔ ہر کم وچ اوہدے نال مشورہ کردا۔ اوس نے ہیرا اپنے خزانے توں وکھ اک کمرے وچ رکھیا ہویا سی تے ایس کمرے دی حفاظت دو سکیورٹی والے کردے سن۔ اوہناں نوں پتہ نئیں سی کہ کمرے دے کیہہ پیا ہویا اے۔ اک دن کمرے دی صفائی کردے ہویاں سکیورٹی والیاں نوں ہیرے دا پتہ لگ گیا۔

سکیورٹی والیاں ایہہ گل اپنے کچھ دوستاں نوں دسی تے فیر ایہہ گل سارے ملک وچ پھیل گئی کہ بادشاہ کول اک قیمتی ہیرا اے۔ ایہ گل اوتھوں دے وڈے وڈے خطرناک چوراں نے وی سنی تے ہیرا چوری کرن دا منصوبہ بنایا۔ سویرے اوہناں پنج بندیاں نوں محل دی سیر دے بہانے محل اندر گھلیا۔ جنہاں پورے محل دا گیڑا لایا تے اوہ تھاواں ویکھیاں جتھوں رات نوں محل دی کندھ ٹپ کے محل دے اندر آیا جا سکدا اے۔ رات ویلے سکیورٹی دی صورت حال وی بخوبی جائزہ لیا۔ چوراں دے سردار نوں ایہہ سن کے خوشی ہوئی کہ ہیرے دے نال بادشاہ کول اک وڈا خزانہ وی اے۔ اوہ چوری کر کے امیر ہو جاون گے۔ سردار نے چوری دا پروگرام ایس طرح بنایا کہ پنج بندے محل دے اندر جاون گے، پنج بندے اوہناں دی حفاظت لئی ہتھیاراں دے نال اوہناں پچھے رہن گے تے سکیورٹی والیاں اتے نظر رکھن گے تے پنج بندے محل دیاں کندھاں دے نال تازہ دم گھوڑیاں نال کھڑے ہوون گے تاں خزانہ چوری کر کے چھیتی نال ایتھوں نکلیا جاوے۔

رات ویلے اوہ سارے منصوبے کے تحت محل اندر داخل ہو گئے۔ تاں سب توں پہلاں خزانے والے کمرے ول گئے۔ اوہناں اوتھے دے سکیورٹی والیاں نوں بنھ دتا تے کمرے اندر وڑ کے خزانے نوں تھیلیاں وچ بھرن لگ پئے۔ اوہناں ایہہ تھیلے اوہناں لوکاں نوں دتے جنہاں کول ہتھیار سی۔ ہن اوہناں تلاش سی اوس کمرے دن جس وچ ہیرا پیا ہویا سی۔ پر اوہناں نوں اوہ کمرے مل نئیں سی رہیا۔ جس پاروں اوہ پریشان ہو گئے۔ جنہاں نوں خزانے والے تھیلے دتے سن اوہ انتظار کر رہے سن کہ بادشاہ تے محل دے دوسرے سکیورٹی والے جاگ گئے اوہناں دوڑن دی بہت کوشش کیتی پر ناکام رہے۔ سکیورٹی والیاں پنج نوں کمرے وچ بند کر کے باہر والے پنج چوراں نوں خزانے سمیت پھڑ لیا۔ فیر اوہناں دی نشاندہی اتے محل توں باہر کھڑے گھڑ اسواراں نوں بمعہ سردار دے گرفتار کر لیا۔ سویرے دربار وچ سارے چوراں نوں پیش کیتا گیا۔ بادشاہ نے پنج چوراں توں وکھ سارے چوراں نوں اوسے ویلے قتل کرن داحکم دے دتا۔ کمرے والے پنج چوراں دی سزا ایہہ رکھی کہ اوہناں دے ہتھ پیر اک وڈے مجمع دے سامنے کئے جاون گئے تے اوس توں بعد اوہناں نوں پھانسی دے کے اوہناں دیاں لاشاں تن دن تک شہر دے چوراہے وچ لٹکدیاں رہن گئیاں۔ فیر اک تاریخ مقرر کر کے سارے شہر وچ منادی کروائی گئی تے لوکاں دے سامنے اوہناں نوں سزا دتی گئی۔ انج کرن دا مقصد ایہہ سی کہ کوئی وی ہیرا چوری کرن توں پہلاں کئی وار سوچے۔