باندر، نقل تے نیکی دا صلہ

اک دفعہ دا ذکر اے کہ اک اﷲ والا ربّ ربّ کرن لئی شہر نوں چھڈ کے نیڑے دے جنگل وچ چلا گیا۔ اوس دا کوئی گھر بار، بال بچہ، سجن یاں رشتہ دار نئیں سی۔ کھان پین دا تھوڑا جیہا سامان تے کپڑے اوس دے کول سی۔ جنگل جا کے اوس اک درخت دے تھلے جگہ صاف کیتی تے ربّ دی عبادت وچ مصروف ہو گیا۔ اوس درخت اتے باندر رہندے سن۔ اوس باندراں نال گلاں کرنیاں تے چالاکی نال اوہناں کولوں سامان لینا۔ انج اوس دا گزارہ ہوندا رہیا۔ اوہناں باندراں وچوں اک باندر اوہدا دوست بن گیا۔ بندے نوں وی اوس نال بہت پیار ہو گیا سی۔ اوہ باندر جنگل وچ طرح طرح دے پھل لے کے آندا دونویں مل کے کھاندے تے اپنا ڈھڈ بھر دے۔ اوس بندے نے اوس تھاں اتے اک کلی بنا لئی سی۔ کدے کدے اوہ باندر وی اوس نال کلی وچ سوں جاندا۔

اوہ اﷲ والا بہت صفائی پسند بندہ سی۔ ہر روز ندی تے جا کے نہاندا، اپنے کپڑے دھوندا تے شیو وی کردا۔ ہمیشہ اپنے آپ تے اپنی کلی نوں صاف رکھدا۔ باندر اوہدی ایس عادت توں خوش وی سی تے حیران وی۔ حیرانی اوہنوں ایس گل دی سی کہ ایہہ جنگل وچ رہ کے وی صفائی دا کناں خیال رکھدا اے۔ اک دن اوہ ندی کنارے کپڑے دھو رہیا سی کہ باندر اوتھے آ گیا۔ اوہدے نال گلاں شروع کر دتیاں۔ ایس توں بعد اوس شیو کیتی تے نہاون لئی ندی وچ اتر گیا۔ باندر دے اوہدی غیرموجودگی وچ اوہدا شیو دا سامان چکیا تے اوہدے وانگوں حجامت کرن لگ پیا۔ جدوں اوہ نہا کے باہر نکلیا تاں اوس ویکھیا کہ باندر نے اپنا چہرہ کئی تھاواں توں زخمی کر لیا اے تے کئی زخماں وچوں خون وی نکلدا پیا اے۔ اوس چھیتی چھیتی پہلے اوس دا منہ دھوتا تے جتھوں بہتا خون نکل رہیا سی اوتھے اپنی چادر پاڑ کے اوہدی پٹی بنا کے بنھ دِتی تے انج خون نکلنا بند ہو گیا۔ اوس کول کوئی دوائی نئیں سی کہ اوہ باندر دے زخماں اتے لاندا۔ اوس نے دم کیتا تے باندر نوں نیند آ گئی۔

سویرے باندر اُٹھیا تے دوست اوہدے کولوں پیڑ دا پچھیا۔ باندر نے آکھیا کہ ہن آرام اے۔ ایس توں بعد باندر نے کھان لئی منگیا اوس نے آکھیا کہ کل توں زخمی ہوون پاروں کجھ وی لے کے نئیں سی آیا۔ میں رات وی بھکھا ستا ساں۔ باندر ایہہ سن کے بہت دکھ ہویا کہ اوس دی بیوقوفی پاروں اوس دا دوست رات دا بھکھا اے۔ اوہ پھل اکٹھا کرن لئی جاون لگا۔ تاں اوس نے آکھیا کہ تیرے زخم ٹھیک نئیں اے۔ توں نہ جا۔ اج میں جنگل دے پھل لیاندا ہاں۔ توں گھر وچ آرام کر لے۔ ایہہ آکھ کے بندہ اوتھوں پھل لین لئی جاندا اے تے باندر چوری چوری اوہدے پچھے لکدا ہویا ٹریا جاندا اے۔

اوہ بندہ جدوں جنگل دے وچکار اپڑیا تاں شیر نے اوہدے اتے حملہ کر دتا۔ باندر نے ایہہ ویکھ کے اک وڈا پتھر شیر دے سر وچ ماریا۔ جس پاروں اوہدا سر پاٹ گیا تے اوہ اوتھوں دوڑ گیا۔ انج باندر نے بندے ولوں کیتی نیکی دا بدلہ چکا دتا۔ تے دونویں جنگل وچوں کھا کے تے لے کے خوشی خوشی گھر واپس آ گئے۔