بیوقوف شخص

اک دفعہ دا ذکر اے کہ کسے پنڈ وچ کسے بندے نے بہت وڈے رقبے وچ تربوز کاشت کیتے ہوئے سن۔ تربوز نوں منڈی تک لے جاون لئی اوہنے اک اونٹ وچ رکھیا ہویا سی۔ اوہ تربوز دی گڈ بھر دے تے اونٹ اوس گڈ نوں کھچ کے منڈی لے جاندا۔ اونٹ بڑا موٹا تازہ سی تے مالکاں اوس دا ناں بلو رکھیا ہویا سی۔ مالکاں نے اپنے اونٹ دی دیکھ بھال لئی اک نوکر رکھیا ہویا سی جو بہت بیوقوف سی۔ کئی وار اوہ اونٹ نوں پٹھے پانا بھل جاندا۔ کئی وار اونٹ نوں پانی پلانا تے چھاویں بنھنا بھل جاندا۔ اوس دے مالک اوس دی ایس عادت توں بہت تنگ سی۔

اک دن نوکر اونٹ نوں اکلا چھڈ کے کتے باہر کم چلا گیا۔ اونٹ تربوز دے کھیتاں اندر وڑ گیا تے تربوز کھانے تے خراب کرنے شروع کر دتے۔ اچانک اک تربوز اونٹ دے گلے وچ پھس گیا۔ جدوں مالک نے ویکھیا تاں بہت پریشان ہویا۔ فیر اوس اک چادر لئی تے اوس نوں اونٹ دی گردن دوالے لوپٹ دتا۔ ایس توں بعد اک ڈنڈا پھڑ کے اونٹ دی گردن اتے زور نال ماریا۔ جس پاروں اونٹ دے گلے وچ پھسیا تربوز ٹٹ گیا۔ اونٹ نے کجھ تربوز نگل لیا تے کجھ منہ توں باہر کڈھ دتا۔ انج اونٹ دا ساہ سوکھا ہویا۔ اوہ بیوقوف بندہ ایہہ سارا کجھ ویکھ رہیا سی۔ مالک نے اوہنوں نوکری توں جواب دے دتا تے اوہ اپنا سامان چک کے نال والے پنڈ اپڑ گیا۔

پنڈ پہنچ کے اوس نوں کئی گلہڑ دے مریض نظر آئے۔ اوس نے اپنے آپ نوں حکیم دسیا تے گلہڑ دا علاج کرن دا دسیا۔ پہلاں پنڈ والیاں اوس اتے اعتبار نہ کیتا۔ فیر کجھ دناں اوہناں نوں یقین ہو گیا کہ اصلی حکیم اتے تے گلہڑ دا علاج کر سکدا اے۔ پنڈ والیاں دسیا کہ پنڈ وچ اک زنانی گلہڑ دی وجہ توں بہت تکلیف اے۔ پہلے اوس دا علاج کرو۔ اوس آکھیا اوس زنانی دے نال اک وڈی چادر تے ڈنڈا لے کے شام نوں میرے کول آئو۔ شام ہوون تے پنڈ والے سامان تے اوس عورت نوں لے کے اوس کول آگئے۔ جدوں اوہنے چادر اوس زنانی دی گردن دوالے لوپٹی تاں پنڈ والیاں نے اوس نوں علاج کرن توں روک دتا تے آکھیا ایس بیماری دا علاج انج نئیں ہوندا۔ اوس آکھیا کہ حکیم تسی او کہ میں؟ فیر آکھیا جے علاج غلط ہووے تاں تسی جو مرضی سزا دینا۔ سارے لوکاں اوس دی گل من لئی۔ اوس زنانی نوں زمین اتے لمے پایا تے اکھاں بند کرن دا آکھیا۔ ایس توں بعد اوس زور نال ڈنڈا اوس زنانی دی گردن اتے ماریا جس نال اوس دی گردن دی ہڈی ٹٹ گئی تے اوہ مر گئی۔ پنڈ والیاں اوس نوں پہلاں بہت ماریا تے فیر پولیس دے حوالے کر دِتّا۔ ایس توں بعد اوس بیوقوف نوں پتہ لگا کہ گلہڑ دی بیماری تے اونٹ دے گلے وچ پھسے تربوز نوں کڈھن دا طریقہ اکو جیہا نئیں وکھو وکھرا اے۔