چور دی مدد

اک دفعہ دا ذکر اے کہ اک شہر وچ اک عورت رہندی سی۔ اچا لماں تے گورا رنگ تے چنگی موٹی۔ اوہ بیوٹی پارلر دا کم کردی سی تے اکثر رات نوں لیٹ دکان بند کر دی سی۔

اک رات اوس گیاراں وجے اپنی دکان بند کیتی تے اپنا بیگ موہڈیاں تے پاء کے اپنے گھر ول جا رہی سی۔ سڑک اتے اک تھاں اتے ہنیرا سی۔ جس دا فائدہ چکدے ہویا اک پندراں سالاں دے منڈے نے اوس کولوں بیگ کھوہن دی کوشش کیتی۔ اوہ منڈ اپنی کوشش کامیاب ہو گیا پر نس دے ہوئے ٹھیڈا لگن نال اوہ ڈگا تے اوس زنانی نے اوس نوں گریبان توں پھڑ لیا۔ اوس نوں کافی جٹکے دتے جس پاروں اوہدیاں اکھاںباہر آگئیاں۔ اوس نوں اپنا ساہ گھٹ دا ہویا لگا تے اوہ نڈھال ہو گیا۔ اوہ بہت ڈر گیا سی۔ لوک اوس نوں ویکھ رہے سن پر عورت دے غصے سامنے کسے نوں جرأت نئیں سی پے رہی کہ اوہ چھڈن دا آکھن۔

عورت اوس نوں گھسیٹ دی ہوئی زبردستی اپنے نال گھر لے آئی۔ اوس منڈے کولوں پچھیا کہ تیری کیہڑی مجبوری اے جس تینوں ایہہ حرکت کرن تے مجبور کیتا اے۔ اوس آکھیا کہ میرا تعلق اک غریب گھرانے نال اے۔ میرا والد پنج سال پہلے فوت ہو گیا تے ماں لوکاں دے گھر کم کر کے اساڈا ڈھڈ بھر دی اے۔ میرے کول جیہڑے بوٹ سن اوہ ٹٹ گئے نیں۔ جس پاروں میرے پیراں نوں ٹھنڈا بہت لگدی اے۔ میں جس دکان اتے کم کردا آں۔ مالک نوں آکھیا مینوں نویں بوٹ لے دے۔ اوس مینوں ماریا تے آکھیا کہ ہن توں نویں بوٹ لین لئی میری دکان توں چوری کریں گا۔ ایس لئی تینوں نوکری توں جواب اے۔ اوس میری تنخواہ دے پیسے وی نئیں دتے۔ میں کئی وار ماں نوں نویں بوٹ لین دا آکھیا۔ پر ماں ہر وار اگلے مہینے دا آکھ کے ٹال دیندی اے۔ اج جدوں مینوں نوکری توں جواب ہویا تاں نویں بوٹ لین دی میری امید ختم ہو گئی تے میں سوچیا کسے دا پرس کھو کے نس جاواں گا تے نویں بوٹ خریداں گا۔ پر میری قسمت وچ نویں بوٹ نئیں ہن۔ مینوں معافی دے دیو۔ ایہہ آکھ کے اوس اچی اچی رونا شروع کر دتا۔

اوس عورت نوں جدوں حقیقت معلوم ہوئی تاں اوس نوں بہت افسوس ہویا کہ اوس بغیر سوچے اوس نوں تکلیف دتی بچے توں منہ ہتھ دھو، کھانا کھا تے میرے نال بازار چل میں تینوں نویں بوٹ لے کے دیوانگی۔ ایہہ سن کے بچہ پریشان ہو گیا تے ہور اچی اچی رون لگ پیا۔ عورت دے حوصلہ دیون تے اوہ چپ ہو گیا۔ ایس توں بعد اوس نے اوہنوں کھانا دتا تے سون دا آکھیا۔ بچہ آکھن لگا کہ جے میں گھر نہ گیا تاں میری ماں پریشان ہووے گی۔ ایس لئی مینوں گھر جاون دیو۔ اوس نے اوس نوں لیا تے اوہدے گھر چھڈ آئی تے مڑ سویرے آون دا آکھیا۔ بچے دی ماں نے اوس دا شکریہ ادا کیتا۔

اگلے دن دسے ہوئے وقت تے اوہ عورت اوس بچے دے گھر گئی تے رات والا سارا واقعہ اوس دی ماں نوں دسیا۔ ساری گل سن کے ماں دیاں اکھاں وچ اتھرو آ گئے۔ اوس بچے ولوں معافی منگی، عورت نے معاف کردے ہوئے آکھیا کہ میں ایس نوں نویں بوٹ لے کے دیندی آں تے اج توں ایہہ میرے کول کم وی کرے گا۔ میں ایس نوں اپنے پتراں وانگوں رکھاں گئی تے اوس کولوں وعدہ لیا کہ اوہ پوری زندگی اجہی حرکت انہیں کرے گا۔ بچے نے وعدہ کیتا تے خوشی خوشی نویں بوٹ لین لئی اوس عورت نال بازار چلا گیا۔