بابے دی نیکی تے بندے غلط فہمی

کسے پنڈ وچ اک بزرگ رہندا سی۔ بہت اخلاق والا، نماز دا پابند تے دیانت دار، سارے لوک اوس بزرگ دی عزت کردے سن۔ لوک اوس کول بیٹھدے تے اوہ لوکاں نوں دین دا گلاں سنا کے اوہناں دی سدھے رستے اتے چلن دی راہنمائی کردا۔ اوس بزرگ کول اوہدے بزرگاں دا رسی دا اک ٹوٹا سی۔ جو اوس نوں بہت پیارا سی۔ ایہہ اوس دے والد نے اوہنوں دیندے ہوئے آکھیا کہ اوہدے والد نے اوہنوں دتا اے۔ ایہہ بہت برکت والا اے۔ توں ایس وچ لکڑیاں بنھ کے بازار ویچن لئی جایا کر۔ تیرے روزی وچ بہت برکت ہووے گی۔ بابا ہر ویلے اوس نوں اپنے کول رکھدا۔ جنگل وچوں لکڑیاں ودھ کے اوہ ایس رسّی وچ بنھدا تے شہر جا کے لکڑیاں ویچ آندا۔ اوس دیاں لکڑیاں چھیتی وِک جاندیاں تے گھر آ کے اوہ فیر لوکاں نوں وعظ نصیحت کرن لگ جاندا۔

اک دن اوس نوں نالے دے پنڈ چوں شادی دا سدا آیا۔ تے اوہ شادی والے گھر اپڑ گیا۔ بھیڑ وچ اک امیر آدمی دا پرس چوری ہو گیا جس وچ بہت سارے پیسے، کاغذات تے کجھ ہور چیزاں وی سن، سارے لوک اک دوجے اتے شک کرن لگ پئے۔ بزرگ نے شادی والیاں نوں پیسے دیون لئی جیب وچ ہتھ پایا تاں رسی دا اوہ ٹوٹا زمین تے ڈگ پیا۔ جدوں اوہ اوس نوں چک رہیا سی تاں اک بندے نے اوس نوں زمین اتوں کوئی چیز چکدے ویکھ لیا۔ اوس گھر دے مالک نوں دسیا کہ اوس بابے کول پرس اے۔ مالک نے بابے توں پچھن توں بغیر ای تھانے جا کے ساری گل تھانے دار نوں دس دتی۔

کجھ ای چر مگروں پولیس شادی والے گھر آ گئی۔ اوہناں بزرگ نوں پھڑ لیا تے اوس دی پنڈ والیاں سامنے بہت بے عزتی کیتی۔ بابے دی صفائی لئے بغیر اوہ اوس نوں تھانے لے گئے۔ تھانے لے جا کے اوہناں بابے نوں آکھیا کہ چپ چاپ پرس ساڈے حوالے کردے۔ نئیں تاں سارے پنڈ دے سامنے تیری چھترول ہوئے گی۔ بابا ڈر گیا۔ اوس آکھیا میں چور نئیں آں۔ میری تلاشی لے لو۔ پولیس والیاں آکھیا کہ چور توں ای ایں۔ تینوں زمین توں پرس چکدے اک بندے نے ویکھیا اے۔ بابے نے آکھیا کہ اوس بندے نوں بلا لو۔ میں کوئی پرس نہ چوری کیتا اے تے نہ چکیا اے۔ اوس بندے نوں بلایا گیا تاں اوس نے دسیا کہ میں ایس بزرگ نوں زمین توں کوئی چیز چکدے ویکھیا اے۔ اوس پرس سی یاں کوئی دوسری چیز۔ ایس بارے مینوں کجھ پتہ نئیں۔ تھانے دار نے اوس بندے کولوں پچھیا جد تینوں چنگی طرح یاد نئیں کہ پرس بابے نے ای چکیا اے تاں توں ایس بزرگ اتے الزام کیوں لایا۔ ایس توں بعد اوہنے بابے دی تلاشی لئی تے اوہدی جیب وچوں کجھ پیسے تے رسی دا ٹوٹا نکلیا۔ تھانے دار نے الزام لاون والے بندے نوں آکھیا کہ اوہ بابے کولوں معافی منگے۔ جدوں اوہ معافی منگن لگا تاں تھانے دار نے آکھیا کہ جنہاں لوکاں دے سامنے توں بابے اتے الزام لایا اے۔ اوہناں دے سامنے معافی منگ۔ تاں جے تینوں جھوٹ بولن تے سزا ملے تے ایس بزرگ دی ایمان دار دا وی لوکاں پتہ لگ جائے۔ تھانے دار اوس بزرگ تے بندے نوں لے کے شادی والے گھر آیا تے ساریاں دے سامنے اوس بزرگ کولوں معافی منگی۔ سارے لوکاں نوں اصلیت دا پتہ لگا۔ ایس توں مگروں بابا نے اوس معاف کر دتا تے بغیر روٹی کھادے واپس اپنے گھر آ گیا۔