گدڑ دی چالاکی

اک دفعہ دا ذکر اے کہ کسے پنڈ وچ اک خرگوش تے اک گدڑ رہندے سن۔ دونویں آپس وچ گہرے دوست سن تے اک دوجے اتے اعتبار کر دے سن۔ گدڑ بہت چالاک تے دھوکہ باز سی۔ اوہ اپنا کم کڈھ کے دوڑ جاندا سی۔ خرگوش بھلا مانس سی، اوہ گدڑ دی چالاکی دے باوجود اوس نال پیار کردا تے کوشش کردا کہ ہر چیز ونڈ کے کھاہدی جاوے۔

خرگوش نے بڑی محنت نال سرنگ پُٹی جو اک بیکری دے اندر جا کے ختم ہو ندی سی۔ خرگوش روز سرنگ راہیں بیکری دے اندر جاندا تے ڈھڈ بھر چیزاں کھا کے واپس آ جاندا۔ خرگوش نوں انج کردیاں کئی دن لنگھ گئے۔ اک دن گدڑ نوں شک پے گیا کہ خرگوش اکلا اکلا کوئی شے کھاندا اے تے خرگوش نے ساری گل دس دتی۔ ایہہ سن کے اوہدے منہ وچ پانی آ گیا تے اوس آکھیا کہ اج مینوں وی نال لے کے جاویں۔ خرگوش تے گدڑ سرنگ راہیں بیکری دے اندر گئے تے ون سونیاں چیزاں ڈھڈ بھر کے کھاہدیاں۔ جدوں گدڑ دا ڈھڈ بھر گیا تاں اوس نے چیکاں مارنیاں شروع کر دتیاں۔ چیکاں سن کے بیکری دا مالک آ گیا۔ خرگوش ڈر دے مارے سرنگ وچ وڑ کے دوڑ جاندا اے تے گدڑ مالک دے قابو آ جاندا اے۔ مالک نے گدڑ نوں رسیاں نال بنھ بہت ماریا۔ اوس نے گدڑ نوں کھاون لئی سکیاں روٹی دتیاں، مالک روز ای گدڑ نوں کٹ دا سی۔

اک دن مالک نوں کجھ دناں لئی اک کم واسطے شہر جانا پیا۔ جاون لگیاں اوس اپنی گھر والی نوں دسیا کہ گدڑ نوں رسیاں نال بنھ کے روز کٹنا ایں تے کھاون نوں سکیاں روٹیاں دیناں نیں۔ مالک ایناں آکھ کے شہر چلا جاندا اے تے اوہدی بیوی گھر دے کماں وچ معروف ہوون یاروں بھل جاندی اے کہ اوس دا گھر والا اوس نوں کیہ آکھ کے گیا سی۔ اوہ گدڑ کول پچھدی اے کہ میرے گھر والے نے تیرے سامنے مینوں تیرے نال کیہو جیہا سلوک کرن دا آکھیا سی۔ چالاک گدڑ نوں پتہ لگا کہ اوس مالک دی بیوی نوں کجھ یاد نئیں تاں اوس چالاکی نال دسیا کہ مینوں رسیاں دی تھاں دھاگے نال بنھنا ایں۔ کھاون پین نوں دودھ تے گوشت دینا ایں نالے پیار وی کرنا ایں۔ اوس خاتون نے گدڑ دی گل اتے یقین کر کے اوس دی خدمت کرنا شروع کر دتی۔ رسّی کھول کے اوس نوں دھاگے نال بنھ دتا۔ روز اوس نوں کھان لئی گوشت تے پین لئی دودھ دیندی۔ کجھ ای دناں بعد گدڑ دی صحت بہت چنگی ہو گئی۔ جدوں مالک گھر آیا تے گدڑ دی صحت ویکھ کے حیران رہ گیاَ اوہ گدڑ مارن لئی کمرے وچوں ڈنڈا چکن گیا۔ پر گدڑ موقع دا فائدہ چکدے ہویاں اوتھوں دھاگہ توڑ کے نس گیا۔ جس دا مالک نوں بہت افسوس ہویا تے اوہ اپنی گھر والی نال وی ناراض ہویا۔