1688708404765_56116494
Open/Free Access
71
عقل مند بادشاہ
کسے شہر وچ اک غریب بندہ رہندا سی۔ انتہائی نیک تے محنتی، سارا دن محنت کردا تے جو کجھ ملدا اوس اتے ربّ دا شکر ادا کردا۔ بچت کر کے اوس دس ہزار روپے جمع کر لئے سن۔ اچانک اوس نوں ضروری کم لئی دوجے شہر جانا پیا۔ اوس پیسے نال لے جاون دیبجائے اپنے گوانڈھی کول امانت رکھوا دتے۔ پر امانت دیندے ویلے کوئی گواہ نئیں سی موجود تے نہ ای اوس امانت دی کوئی رسید لئی۔
چھ مہینیاں پچھوں جدوں اوہ بندہ واپس آیا تاں اوس نے گوانڈھی کولوں اپنی امانت منگی۔ تاں گوانڈھی صاف مکر گیا۔ الٹا اوس دی بے عزتی وی کیتی۔ اوہ ہر روز امانت لین جاندا پر گوانڈھی اوس دی کوئی گل نہ سندا۔ شام نوں اوہ تھک کے گھر واپس آ جاندا۔ آخر کار اوس نے فیصلہ کیتا کہ اوہ اپنا مقدمہ بادشاہ دی عدالت وچ لے کے جاوے گا۔ اوہ بادشاہ دی عدالت وچ اپڑیا تے بادشاہ نوں دسیا کہ اوس کولوں غلطی ہوئی اے کہ اوس بغیر کسے گواہ تے رسید دے دس ہزار روپے گوانڈھی کول امانت راکھوے سن پر ہن اوہ اوس دی امانت واپس نئیں کردا۔ ایس لئی میرے پیسے مینوں واپس لے کے دیو۔
بادشاہ نے اوس نوں آکھیا کہ بناں ثبوت دے میں اوس نوں گرفتار نئیں کر سکدا۔ پر اک تجویز اے کہ میں کل عصر دی نماز توں بعد سیر کردا اوس بندے دی دوکان اتے آوے گا۔ توں وی اوتھے آ جاویں۔ میں تینوں جھک کے سلام کراں گا۔ توں بڑی لاپرواہی نال اوس دی جواب دیویں ایسے طرں میں تیرے نال جو وی گلاں کراں توں انتہائی لاپرواہی نال اوہناں دا جواب دینا ایں۔
بادشاہ دے دسے ہوئے منصوبے دے تحت اگلے اوہ بندہ عصر دی نماز توں بعد اوہدی دکان تے جا بیٹھا۔ اینے وچ بادشاہ دی سواری آئی تاں دکاندار پریشان ہو گیا۔ بادشاہ نے اوس نوں جھک کے سلام کیتا جس دا اوس نے بہت لاپرواہی نال جواب دتا۔ بادشاہ نے اوس دا ہتھ چم کے آکھیا کہ میرے کول کدوں تشریف لیائو گے۔ اوس جواب دتا کہ میں اک مسئلے وچ پھسیا ہویا ہاں، جدوں اوہ حل ہو جاوے گا میں تہاڈے کول ضرور آئو گا۔ بادشاہ نے آکھیا اگر کوئی کم ہووے تاں مینوں ضرور آکھنا۔ جے کتے میری مدد دی ضرورت ہووے تاں دسنا مینوں تہاڈی مدد کر کے خوشی ہووے گی۔ اوس بڑی لاپرواہی نال جواب دتا تے آکھیا جدوں ضرورت محسوس ہوئی تہانوں ضرور دساں گا۔ ایس توں بعد بادشاہ اجازت لے کے اوتھوں چلا گیا۔
بادشاہ دے جاون توں بعد دکاندار بہت ڈر گیا۔ اوس نوں ڈر پیا گیا کہ ایہہ بندہ میری بادشاہ اگے شکایت کر دیوے گا تے جے بادشاہ نوں پتہ لگ گیا تاں اوہ مینوں سزا دیوے گا۔ ایس ڈر توں اوس نے اوہدے پیسے واپس کر دتے۔ انج بادشاہ دی عقل مندی پاروں مقدمے توں بغیر اوس نوں پیسے مل گئے۔
ID | Chapters/Headings | Author(s) | Pages | Info |
ID | Chapters/Headings | Author(s) | Pages | Info |