عقل مندی دی گل

پرانے وقتاں دی گل اے کہ اک ملک اتے اک بڈھا بادشاہ حکمران سی۔ اوس دا اکو اک پتر سی جو بہتا لائق نہ سی۔ بادشاہ دے اک وزیر دے پتر دی بادشاہ دے پتر نال بہت گہری دوستی سی۔ دونویں اک دوجے نال بہت محبت کردے سن۔ بادشاہ پریشان سی کہ اوہدے مرن توں بعد بادشاہ وزیر دا پتر بن جاوے گا کیوں جے اوہ زیادہ ہوشیار تے عقل مند اے۔ بادشاہ نے ایہناں نوں اک دوجے توں وکھ کرن دا منصوبہ بنایا۔ ایہہ کم کروان لئی اوس اک چالاک عورت نوں سدیا تے آکھیا اوہ اپنی چالاکی نال دونواں نوں اک دوجے توں وکھ کر دیوے۔ اوس عورت نے حامی بھر لئی تے اوتھوں چلے گئی۔

اگلے دن پروگرام دے مطابق اوس عورت نے وزیر دے منڈے نال محل توں باہر کھڑے ہو کے گلاں شروع کر دتیاں۔ دربار وچ آون والا ہر بندہ اوہناں نوں گلاں کر دے ویکھ رہیا سی۔ بادشاہ دے پتر نے وی اوہناں نوں گلاں کردے ویکھیا۔ اوس عورت نے کوئی وی چنگی گل اوس نال نئیں کیتی صرف بادشاہ دے پتر دے دل وچ نفرت پیدا کرن لئی اوہدے کول کھلوتی رہی۔ جدوں اوہ چلے گئی تے بادشاہ دے پتر نے اوس نوں بلا کے ہوون والیاں گلاں بارے پچھیا۔ اوس جواب دتا کہ کوئی گل تیرے بارے نئیں ہوئی۔ پر اوہنوں ایس اتے غصہ بہت سی تے بادشاہ نے اوہنوں قتل کرن دا حکم جاری کر دتا۔ فوجی جدوں اوہنوں قتل کرن لے کے جا رہے سن۔ اوس ویلے بادشاہ دا پتر وی آ گیا۔ پر اوہ اپنے باپ دے حکم دے سامنے بے بس سی۔ سپاہی اوس نوں پھڑ کے لے جا رہے سن کہ اوہنے سپاہیاں نوں آکھیا کہ بادشاہ نوں اصل حقیقت داپتہ نئیں۔ جدوں اوس نوں حقیقت دا پتہ لگے گا تاں اوہ تہانوں حکم دیوے گا کہ میرے دوست نوں میرے کول لے کے آئو۔ فوجی اوس دیاں گلاں وچ آگے۔ فوجیاں اوس کولوں پچھیا کہ اوہ بادشاہ نوں کیہ دسن؟ اوس اک ککڑ منگوایا تے اوس نوں حلال کر کے خون اپنے کپڑیاں اتے لاہ لیا۔ تے آکھیا کہ ایہہ کپڑے بادشاہ نوں دے دینا۔

کجھ دناں مگروں اوہ عورت اک جرم وچ گرفتار ہوئی تاں بادشاہ نوں وزیر دے پتر دا خیال آیا۔ اوہنوں اوس دی بے گناہی دا وی پتہ چل گیا پر ہن اوس نوں افسوس ہو رہیا سی کہ اوس اک بے گناہ بندے نوں قتل کرن دا حکم نامہ جاری کیتا اے۔ اوس سپاہیاں نوں پچھیا تے سپاہیاں نے خون والے کپڑے بادشاہ نوں ویکھا دتے۔ بادشاہ نے ایہہ جانن لئی کہ اوس نوں سپاہیاں قتل کیتا اے کہ نئیں اک عجیب قسم دے میلے دا انتظام کیتا، اوس آکھیا کہ میلے وچ بکریاں دی لڑائی کروائی جاوے گی۔ لڑائی توں پہلاں بکرے دا وزن ہووے گا۔ فیر لڑائی تے مڑ اُٹھ دناں پچھوں فیر وزن کرایا جاوے گا۔ جے بکرے دا وزن لڑائی توں پہلے والا ہویا تاں اوس نوں انعام دتا جاوے گا۔ بہت سارے لوکاں نے قسمت آزمائی کیتی پر ناکام رہے۔ جدوں ایہہ خبروزیر دے پتر تائیں اپڑی تاں اوس اک سپاہی نوں آکھیا کہ اکو وزن دے دو بکرے لے۔ اک نوں لڑائی لئی تے دوجے نوں لڑائی توں بعد پیش کرن لئی۔ اوس انج ای کیتا تے انج اوہ شرط جت گیا۔ ہن بادشاہ نوں یقین ہو گیا کہ اوہ زندہ اے۔ کیوں جے اینی سوچ اوس توں وکھ کسے دی نئیں سی ہو سکدی۔ اوس بکرے دے مالک تے اوہدے ساتھیاںنوں گرفتار کر لیا تے اوس منڈے بارے پچھیا۔ اوہناں پہلے تاں نہ دسیا۔ بعد وچ ہور انعام دے لالچ وچ دس دتا۔ اوہناںنوں خوف سی کہ بادشاہ ہن اوس نوں قتل کر دیوے گا۔ بادشاہ اوہناں دے نال اوس کول آیا تے اپنی غلطی دی معافی منگی۔ انج وزیر نوں اوہدا پتر مل گیا تے بادشاہ دے پتر نوں اپنا سمجھدار بیلی۔