بولیاں دا ٹبر

اک وار دی گل اے کہ کسے پنڈ وچ بولیاں دا ٹبر رہندا سی۔ اوہناں دے منڈے دا نواں نواں ویاہ ہویا سی۔ منڈے دے سوہریاں نے واہی لئی اپنی دھی دے داج وچ اک ڈھگا دتا سی۔ اک ڈھگا اوہدے کول پہلے توں موجود سی۔

ویاہ توں کجھ دناں بعد اوہ زمین واہن لئی اپنے کھیت جاندا اے۔ ہل چلاون لئی دونویں ڈھگے اوہدے کول نیں۔ جدوں اوہ ہل چلا رہیا ہوندا اے تاں دو پولس والے راہ بھل گئے اوہدے کول آ جاندے نیں۔ اوہ اوہدے کول راہ پچھدے نیں تے اوہ سمجھدا اے کہ اوہ آکھ رہے نیں کہ ڈھگے کتھوں لے نیں۔ اوہ جواب دیندا اے کہ اک میرا اپناتے دوجا مینوں سوہریاں نے دتا اے۔ اوہناں اوہدے کولوں تین چار واری ایہو سوال پچھیا تے اگوں اوہنے پہلے والا ای جواب دتا۔ جواب سن کے پولیس والیاں نوں بہت غصہ آیا۔ اوہناں اوس نوں بہت کٹیا تے اوہنوں چھڈ کے چلے گئے۔ جاندے ہوئے آکھدے نیں کہ ایہہ پاگل ہو گیا اے۔ جو ساڈی گل نئیں سمجھدا۔

اوہناں دے جاون مگروں اوہدے گھر والی روٹی لے کے آندی اے۔ اوہ روٹی نوں اک پاسے رکھ کے اوہنوں مارنا شروع کر دیندا اے تے آکھدا اے کہ تیرے ماں پیو نے مینوں چوری دا ڈھگا دتا اے۔ جس کارن مینوں پولیس نے بہت ماریا۔ اوہدی بیوی گھر آ کے اپنی سس نوں آکھدی کہ توں مینوں اج روٹی دیر نال دتی اے جس کارن میرے گھر والے نے مینوں ماریا اے۔ اوہدی سس بھٹھی اتے دانے بھن رہی ہوندی اے۔ اوہ کڑاہی بھٹھی توں چک کے زمین اتے مار دی اے تے آکھدی اے کہ اج میں پہلی وار بھٹھی تائی اے تے میری نونہہ سڑ گئی اے۔ اوہدی سس ساری گل بات اپنے گھر والے نوں دسدی اے۔ اوس ویلے اوہ وان وٹ رہیا ہوندا اے۔ اوہ گل سن کے وان وٹنا چھڈ دیندا اے۔ تے گاہک نوں آکھدا اے کہ جے تینوں چھیتی اے تے وان کسے ہور کولوں واٹا لے۔ توں میرے کم وچ نقص کڈھ رہیا ایں۔ جیہڑا بندہ میرے توں چنگا کم کردا اے جا اوتھوں کم کروا لے۔ میں تیرا کم نئیں کرنا تے اوہ کم چھڈ کے بہہ جاندا اے۔