شہزادے دے تن دوست

پرانے وقتاں دی گل اے کہ کسے ملک اتے اک بادشاہ حکومت کردا سی۔ اوس دے تن پتر تے اک دھی سی۔ دو پتر اوس دے بڑے فرمانبردار سن۔ اپنے پیو دی ہر گل مندے تے پوری محنت نال اوہناںنوں جو کم دتا جاندا اوہ کردے سن۔ ایس وجہ کر کے بادشاہ دونواں پتر نوں بہت پیار کر دا سی۔ بادشاہ دا تیجا پتر انتہائی نکما تے کاہل سی۔ کسے کم وچ دھیان نہ لیندا۔ سارا دن شکار کھیڈ دا تے روٹی کھا کے سوں رہندا۔ بادشاہ نے ہر طرح کوشش کیتی کہ اوہ کم وچ دھیان دیوے۔ پر اوہدی ہر کوشش ناکام رہی۔ تنگ آ کے اوس نے اوہنوں محل وچوں کڈھ دتا۔

ہن اوہ مایوسی دے عالم وچ ان ڈٹھی منزل ول ٹرویندا اے۔ رستے وچ اوس نوں اوہدا اک سجن ملدا اے۔ اوس دے پچھن تے شہزادہ اوس نوں دسدا اے کہ اوہدے پیو نے اوہنوں گھروں کڈھ دتا اے۔ اوہ آکھدا اے کہ میں وی تیرے نال چلدا آں۔ شہزادے نے اوہنوں پچھیا کہ توں کیہ کرسکدا ایں؟ اوہنے جواب دتا کہ میں ادھ اسمان وچوں تیر دا نشانہ لاہ کے کوئی وی شے دھرتی اتے سٹ سکدا آں۔ شہزادہ اوہنوں اپنے نال جاون دی اجازت دے دیندا اے۔

جدوں اوہ دونویں اگانہہ ٹرے جاندے نیں تاں اوہناں نوں اک ہور بندہ ملدا اے۔ اوہدے پچھن تے شہزادہ دسدا اے کہ اوہدے پیو نے اوہنوں گھروں کڈھ دتا اے۔ ہن میں اپنے ایس دوست نال روزی دی تلاش وچ جا رہیا آں۔ ایس شخص اک لت توں معذور ہوندا اے۔ اوہ آکھدا اے کہ شہزادہ سلامت مینوں وی نال لے چلو۔ شہزادہ اوس کولوں پچھدا اے کہ توں کیہ کر سکدا ایں؟ اوہ آکھدا اے کہ میں ڈیڑھ منٹ وچ سمندر پاروں جا کے آسکدا آں۔ شہزادہ اوہنوں دی نال لے لیندا اے۔

اگانہہ جا کے اوہناں نوں اک نابینا شخص ملدا اے۔ اوہدے پچھن تے وی شہزادہ گھروں کڈھن والی گل اوس نوں دسدا اے۔ اوہ شہزادے نوں نال جاون لئی آکھدا اے۔ شہزادہ اوہدے کولوں پچھدا اے کہ توں کیہ کر سکدا ایں؟ اوہ آکھدا اے کہ میں سمندر پار دے حالات آسانی نال ہوا نوں سنگھ کے دس سکدا آں۔ شہزادہ اوہنوں وی اپنی جماعت وچ شامل کر کے اگانہہ سفر شروع کر دیندے نیں۔

اوہ چاروں ٹرے جاندے دوجے ملک وچ اپڑ جاندے نیں۔ اوتھے دا بادشاہ اعلان کر دا اے کہ جو اوہدیاں شرطاں پوریاں کرے گا۔ اوہ اپنی دھی دا نکاح اوہدے نال کر دیوے گا۔ شہزادہ اوہدے کولوں شرطاں پچھدا اے۔ بادشاہ آکھا اے کہ میری پہلی شرط ایہہ وے کہ اک مکی مار کے ہاتھی نوں ماریا جاوے دوسرے شرط اک دن وچ سمندر پار کر کے وڈے درخت نوں ہتھ لاہ کے واپس آیا جاوے۔ شہزادے نے ایہہ شرطاں منظور کر لئیاں۔

شہزادے نے پورے زور نال ہاتھی نوں مکا ماریا تے اوہ تھاں تے ای مر گیا۔ اوس لنگڑے نوں سمندر پار درخت نوں ہتھ لاون لئی گھل دتا۔ جدوں اوہ ڈیڑھ منٹ تک واپس پرت دا نئیں۔ تاں شہزادہ بہت پریشان ہوندا اے۔ شہزادہ نابینے نوں آکھدا اے کہ اوہ ہوا نوں سنگھ کے اصل صورت حال بارے دسے، نابینا آکھدا اے کہ شہزادہ سلامت لنگڑا اک درخت تھلے ستا ہویا اے تے اوس درخت اتوں اک خطرناک سپ اوہدے ول اتر رہیا اے۔ شہزادہ دا اک یار اوہنوں آکھدا اے کہ توں اوہدے ہتھ کر میں نشانہ لاندا آں۔ جدوں نابینے نے اوس درخت ول اشارہ کیتا تاں اوس نے اپنی کمان وچوں تیر کھچ کے اوہدر چلایا۔ جہڑا سپ دے سر وچ وجیا تے سپ مر کے اوس لنگڑے دے کول ڈگا۔ اوس دی اکھ کھلدی اے تے اوہ اپنے یاراں دیاں نشانیاں ویکھ کے چھیتی پرت آندا اے۔ انج شہزادہ بادشاہ دیاں شرطاں پوریاں کر دیندا اے۔ اوس توں پچھوں اوہ اپنی حکومت وی اوہنوں دے دیندا اے۔ انج شہزادہ اوس ملک دا بادشاہ بن جاندااے تے اوہ اپنے دوستاں نوں وزیر بنا لیندا اے۔ انج اوہ سارے اپنی نویں زندگی دا آغاز کردے نیں۔