وزیر دی عقل مندی

اک ملک دی گل اے جتھے اک نیک تے سمجھ دار بادشاہ دی حکومت سی۔ اوس دی رعایا اوہدے کولوں بہت خوش سی۔ بادشاہ حکومتی معاملیاں وچ اپنے وزیر نال مشاورت کردا سی۔ بادشاہ تے وزیر دا اک اک پتر سی۔ دونواں دا آپس وچ بہت پیار سی۔

بادشاہ نے اک دن سوچیا کہ وزیر دے مرن توں بعد اوہدا منڈا وزیر بنے گا۔ جو اپنے باپ توں زیادہ سمجھ دار اے۔ کتے ایہہ نہ ہووے کہ اوہ اوہدے کولوں حکومت ای کھو لوے۔ بادشاہ تے وزیر اکٹھے سن تے اوہناں دے پتر وی۔ بادشاہ نے اک چالاک عورت نوں دونواں منڈیاں وچکار پھٹ پاون دا آکھیا۔ جدوں عورت نے بادشاہ تے وزیر تے دونواں منڈیاں نوں اکٹھا ویکھیا تاں وزیر دے منڈے نوں آواز دتی۔ جدوں اوہ اوس چالاک عورت دے کول گیا تاں اوس اوہدے کن دے کول منہ کر کے منہ پھیر لیا۔

بادشاہ دے منڈے نے وزیر دے منڈے نوں پچھیا کہ اوس زنانی تینوں کیہ آکھیا اے؟ اوس آکھیا کہ کجھ نہیں۔ شہزادے نے آکھیا کہ اوس تیرے کن وچ کوئی گل کیتی اے؟ جو توں مینوں دسنا نہیں چاہندا۔ ایس گل توں اوہ اوہدے خلاف ہو جاندا اے تے اپنے باپ نوں آکھدا اے کہ مینوں وزیر دے پتر دا خون چاہی دا اے۔ بادشاہ وزیر دے پتر نوں قتل کرن دا حکم جاری کر دیندا اے۔

وزیر بڑا سیانا ہوندا اے۔ جدوں جلاد اوس نوں قتل کرن لئی لے جارہے ہوندے نیں تاں اوہ جلاد پیسے دے کے اپنے منڈے دے کپڑیاں اتے بکرے دا خون لوا کے کپڑے بادشاہ دے پتر کول گھل دیندا اے تے اپنے پتر نوں لکا لیندا اے۔ بادشاہ ایہہ ویکھ کے بہت خوش ہوندا اے۔

کجھ دناں بعد بادشاہ تے اوہدے پتر نوں اصل گل دا پتہ چلدا اے تاں شہزادہ ضد کردا اے کہ مینوں میرا دوست چاہی دا اے۔ جتھوں مرضی لیا کے دیو، بادشاہ ایہہ گل سن کے بہت پریشان ہوندا اے۔ جدوں وزیر نے بادشاہ دی ایہہ حالت ویکھی تاں ساری اصل گل اوس نوں دس دتی۔ بادشاہ بہت شرمندہ ہویا تے اوہدی عقل مندی تے اوس نوں بہت وڈا انعام دتا۔