طوطے تے گالڑ دی دوستی

اک واری دی گل اے کہ اک جنگل وچ اک طوطا رہندا سی۔ طوطا بہت خوش سی کہ اوس نوں جنگل وچوں کھاون لئی وافر پھل مل جاندے نیں۔ اوہ ایہناں نوں کھاندا تے جنگل دی سیر کردا۔ اک دن اوہ امرود دے درخت اتے بیٹھا امرود کھا رہیا سی کہ اک گالڑ وی اوس درخت اتے چڑھ آندا اے۔ پہلاں اک دوجے دے یار بن جاندے نیں۔ طوطا گالڑ نوں امرود کھواوندا اے تے اپنے گھر آون دی دعوت دیندا اے۔ ایس توں بعد طوطا تے گالڑ اپنے اپنے گھر آ جاندے نیں۔

کئی دناں توں بعد اک دن ہلکے ہلکے بدل آئے ہوئے سن۔ ٹھنڈی ہوا چل رہی سی۔ گالڑ گھر وچ ویہلا سی۔ اوس دے من وچ خیال آیا کہ کیوں نہ اج طوطے دے گھر پھیرا پایا جاوے۔ ایس خیال دے آوندیاں ای اوہ تیار ہو کے طوطے دے گھر اپڑ جاندا اے۔ طوطا اوہنوں اپنے گھر ویکھ کے بہت خوش ہوندا اے تے جی آیاں نوں آکھدا اے۔ جنگل وچوں ہر طرح دے پھل اکٹھا کر کے اوہدی مہمان نوازی کر دا اے۔ گالڑ سب کجھ کھا کے طوطے کولوں گھر واپسی دی اجازت لیندا اے۔ واپسی تے گالڑ طوطے نوں اپنے گھر آون دی دعوت دیندا اے۔ جو طوطا قبول کر لیندا اے۔

کجھ دناں بعد طوطا گالڑ دے گھر جاون دا پروگرام بناندا اے۔ اوہ تیار ہو کے اوہدے گھر جاندا اے۔ اوہدا گھر اک سکی ٹاہلی اتے ہوندا اے۔ گالڑ طوطے نوں خوش آمدید آکھدا اے تے خوشی دا اظہار کردا اے۔ گالڑ کدی ٹاہلی دے اپر چڑھدا اے تے کدی تھلے اتر دا اے۔ طوطا اوہدا ایہہ عمل ویکھ کے ڈاڈا حیران ہوندا اے۔ جدوں بہت وقت لنگھ گیا تاں طوطے نے سوچیا کہ جدوں ایہہ میرے کول آیا سی تاں میں ایس دی رج کے مہمان نوازی کیتی سی۔ پر ایہہ میرے نال کیہو جیہا سلوک کر رہیا اے۔ اوس گالڑ نوں آکھیا کہ مینوں بھکھ لگی اے۔ کجھ کھان دا انتظام کر۔ اوہ طوطے نوں جواب دیندا اے کہ کھان پین نوں چھڈ۔ توں میریاں آنیاں جانیاں ویکھ۔