بے وقوف زمین دار

اک دفعہ دا ذکر اے کہ چار پاگل بازار وچ ٹرے جا رہے سن۔ اوہناں دی نظر حلوہ کدو اتے پئی۔ اوہناں آکھیا ایہہ گھوڑے دا انڈہ اے۔ جے ایس نوں اسیں اپنے کھیت وچ بیج لئے تاں گھوڑے اُگن گے۔ اوہناں دکان دار کولوں چار وڈے وڈے حلوہ کدو خریدے تے اپنے پنڈ پرت آئے۔

اگلے دن چاروں اپنے کھیت ول جاندے نیں۔ اوہناں بہت محنت نال ہل چلایا تے کدو بیج دتے۔ اوہناں کھیت اندر کھاد وی پائی تے پانی وی لایا۔ کجھ دناں پچھوں کھیت وچ ہری ہری گھاہ اگ آئی۔

اوہناں دے کھیت دے نال ای اک وڈے زمین دار دا ڈیرہ سی۔ اک دن اوس دے گھوڑے کھل کے گھاہ چرن لئی اوہناں دے کھیت وچ آ گئے۔ اوہناں چاراں جدوں گھوڑے ویکھے تاں آکھیا کہ ساڈے کھیت وچ گھوڑے اگ آئے نیں۔ اوہناںگھوڑیاں نوں پھڑ کے بنھ لیا۔ شام نوں زمین دار نوں پتہ لگا کہ اوہدے گھوڑے گوانڈھیاں بنھ لے نیں۔ اوہ گھوڑے لین لئی اوہناں کول گیا۔ اوہناں چاراں آکھیا کہ اساں اپنے کھیت وچ گھوڑے دے انڈے بیجے سن۔ ایہہ گھوڑے اگے نیں۔ ایس لئی ایہہ ساڈے گھوڑے نیں۔ زمین دار نوں پتہ لگا کہ ایہہ چاروں پاگل نیں۔ اوہ ایہناں نوں نال لے گیا تے اوہناں نوں ملازم رکھ لیا۔

زمین دار نے پہلے نوں آکھیا کہ توں ہل واہ کے پکان لئی گوشت لے کے آنا ایں۔ دوجے نوں آکھیا کہ توں بھیڈ بکریاں لے کے جانیاں ایں۔ تیجے نوں آکھیا کہ توں ریڑھی تے توڑی لے کے آنی ایں۔ چوتھے نوں آکھیا کہ جدوں میری ماں سوں جاوے توں اوہدے منہ توں مکھیاں اڈانیاں نیں۔ پہلا ہل لے کے کھیت چلا جاندا اے۔ ہل واہن توں بعد اوس اک بیل نوں ذبح کیتا تے گوشت گھر لے آیا۔ دوسرا بھیڈبکریاں کھوہ اتے پانی لئی لے گیا۔ کھوہ وچوں اوس اک ڈوڈو دے بولن دی آوازسنی۔ اوس سمجھیا کہ کھوہ وچ کوئی بلا اے تے اوہ بھیڈ کھان نوں منگ رہی اے۔ اوس بلا توں بچن لئی اک بھیڈ کھوہ وچ سٹ دتی۔ ایس توں بعد دوجا ڈوڈو بولیا اوس دوجی بھیڈ کھوہ وچ سٹی تے انج اوہ ساریاں بھیڈاں کھوہ وچ سٹ کے گھر آ گیا۔ تیسرے  نے ریڑھی اتے توڑی لدی تے دریا پار کرن لگا۔ دریا دا تیز پانی ریڑھی نوں روڑھ کے لے گیا۔ چوتھا اوہدی ماں دا مکھیاں مارن لئی مرچاں گھوٹن والا ڈنڈا لے آیا۔ جدوں اوہدی ماں سوں گئی تے اوہدی منہ اتے اک مکھی آ کے بہہ گئی۔ اوس مکھی مارن لئی ڈنڈا زور دی اوہدے منہ اتے ماریا جو اوہدے سر وچ وی جا لگا۔ انج اوہدی ماں تھاں تے ای مر گئی۔ جدوں شام نوں زمین دار گھر آیا تاں اوس مری ماں ویکھی تے اپنا سر پھڑ کے بہہ گیا۔ تے فیر اوس چاراں نوں نوکری توں کڈھ دتا۔