ماما چبڑ

اک ہوندا اے ماما چبڑ، اوہنے واہی لئی دو بلد رکھے ہوندے نیں۔ اک دن اوہدے بلد کھل کے راجے دے کھیتاں وچ چلے جاندے نیں تے راجہ اوہناں نوں پھڑ کے بنھ لیندا اے۔ جدوں مامے چبڑ نوں پتہ لگا تاں اوہ اپنے بلد لین گھروں راجے ول ٹردا اے۔

ٹرے جاندے نوں رستے وچ اوہنوں اک شیر ملدا اے۔ شیر اوہدے کولوں پچھدا اے کہ ماما کتھے چلے او؟ اوہ آکھدا اے کہ راجے میرے بلد بنھ لے نیں۔ میں اوہ لین جا رہیا آں۔ شیر اوس نوں آکھدا اے کہ مینوں وی اپنے نال لے چل۔ ماما اوس نوں آکھدا اے کہ میرے کن وچ وڑھ جا۔ شیر مامے دے کن وچ وڑھ جاندا اے۔ ماما جدوں تھوڑا جیہا ہور آگانہہ جاندا اے۔ تاں اوس نوں اک بھونڈ ملدا اے۔ اوہ اوس کولوں پچھدا اے کہ ماما کتھے چلے او؟ ماما اوس نوں شیر والا جواب دیندا اے۔ بھونڈ اوس نوں نال لے جاون دا آکھدا اے ماما اوہنوں وی اپنے کن وچ واڑھ لیندا اے تے راجے دے محل ول سفر شروع کر دیندا اے۔ سفر کردے ہوئے اوس دریا پار کرنا ہوندا اے۔ دریا پچھدا اے کہ ماما کتھے چلے او؟ ماما پہلے والا جواب دیندا اے؟ دریا نال جاون دا آکھدا اے تے ماما اوس نوں اپنے کن اندر واڑھ کے راجے دے محل اپڑ جاندا اے۔

راجے نوں جدوں پتہ لگا کہ ماما اپنے بلد لین آیا اے تاں اوہ اوس نوں بکریاں والے واڑے وچ بند کر دیندا اے۔ رات نوں ماما اپنے کن وچوں شیر نوں کڈھ دا اے جو راجے دیاں ساریاں بکریاں کھا جاندا اے۔ اگلے دن راجہ مامے نوں مرغیاں دے کھڈے وچ بند کر دیندا اے۔ ماما اپنے کن وچوں بھونڈ نوں کڈھ کے چھڈ دیندا اے۔ اوہ مرغیاں نوں ڈنگ مار مار کے مار دیندا اے۔ راجے نوں ایہہ دیکھ کے بہت غصہ آیا۔ تیجے دن اوس مامے نوں اپنی منجی نال بنھیا تے آپوں سوں گیا۔ مامے نے اپنے کن وچوں دریا نوں کڈھیا جو راجے دی بہت ساری جائیداد روڑھ کے لے جاندا اے۔ جدوں راجے نے اپنی تباہی ویکھی تاں اوس مامے کولوں معافی منگی تے اوہدے بلد واپس کر دتے۔ مامے نے شیر، بھونڈ تے دریا نوں مڑ توں اپنے کن وچ رکھیا تے بلد لے کے گھر پرت آیا۔