اتفاق وچ برکت

اک دفعہ دی گل اے کہ اک پنڈ وچ اک بہت غریب آدمی رہندا سی۔ اوس دے تن پتر سن۔ اوہدے پتر بہت فرمانبردار سن۔ اوہناں دا پیو اوہناں نوں جو کجھ آکھدا اوہ کردے سن۔ اک دن اوہناں کول کھاون نوں کجھ وی نئیں سی۔ اوہناں دے والد نے آکھیا۔ چلو جنگل چلدے آں۔ کجھ جنگلی پھل اکٹھے کر دے آں تے کجھ شکار، اوہناں دے والد نے اپنے وڈے منڈے نوں آکھیا کہ توں جنگل وچ جا کے لکڑیاں اکٹھیاں کر کے لیا۔ دوجے منڈے نوں آکھیا کہ توں اگ لے کے آ۔ جد کہ تیجے منڈے نوں پانی لین لئی گھل دتا۔ اوہ تینوں چلے گئے تے آپ اک درخت تھلے آ بیٹھا۔

اوس درخت اتے ہنساں دا اک جوڑا رہندا سی جو ایہہ سارا کجھ ویکھ رہیا سی۔ ہنس اوہدے کولوں پچھداد اے کہ توں ایہناں چیزاں دا کیہ کرنا ایں۔ تیرے کول پکاون لئی کوئی چیز نہیں۔ ایہہ گل سن کے اوہ جواب دیندا اے کہ اج تہانوں پکانا ایں۔ ہنس آکھدا اے کہ ساہنوں نہ پکا۔ تینوں اک خزانے بارے دسدے آں۔ ایہہ گل سن کے اوہ خوش ہو جاندا اے۔ ہنس آکھدا اے کہ ایس درخت دے تھلے اک بہت وڈا خزانہ دفن اے۔ تسی اوہ کڈھ کے اپنی ضرورت پوری کر لو۔ اوہ بندہ اپنے تنے پتراں نال خزانہ کڈھ دا اے تے بہت سارے پیسے، ہیرے، چاندی تے سونا لے کے گھر آندا اے۔

گھر آ کے اوہ اپنے منڈے نوں آکھدا اے کہ گوانڈھیاں کولوں تکڑی منگ کے لیا تاں جے خزانے نوں تولیا جا سکے۔ گوانڈھی بڑے حیران ہوندے نیں۔ اوہ ویکھنا چاہندے نیں کہ تکڑی وچ کیہ تولیا جا رہیا اے؟ اوہ تکڑی دے تھلے گوند لاہ دیندے نیں۔ خزانہ تولدے ہوئے کجھ پیسے تکڑے دے تھلے نال لگ جاندے نیں۔ خزانہ تولن توں بعد جدوں اوہ تکڑی واپس کرن جاندا اے تاں کجھ پیسے وی تھلے نال لگن پاروں گوانڈھی ول چلے جاندے نیں۔ انج گوانڈھیاں نوں خزانے بارے پتہ لگدا اے۔ جدوں گوانڈھی خزانے بارے پچھدے نیں تے منڈا ساری گل دس دیندا اے۔

اگلے دِن گوانڈھی اپنے تن پتراں نال خزانے دی تلاش وچ جنگل وچ دسی ہوئی تھاں اُتے جاندے نیں۔ اوہناں دا وڈا اپنے وڈے پتر نوں آکھدا اے کہ توں جنگل وچوں اگ لے کے آ۔ اوہ اگوں جواب دیندا اے کہ ابّا توں سڑ کے مرنا ایں۔ دوجے نوں پانی لیاون لئی آکھدا اے۔ اوہ اگوں جواب دیندا اے کہ توں ڈب کے مرنا ایں۔ تیجے نوں آکھدا اے کہ توں لکڑیاں لے کے آ۔ اوہ آکھدا اے کہ میرے کولوں ایہہ کم نہیں ہوندا۔ درخت اتے بیٹھا ہنس اوہدے کولوں پچھدا اے کہ ایہہ ساریاں دا توں کیہ کرنا ایں۔ اوہ آکھدا اے کہ تینوں پکانا اے۔ ہنس ہس کے جواب دیندا اے۔ تسی ایتھوں چلے جاؤ۔ ایس لئی کہ تہاڈے وچ اتفاق نہیں اے۔