کواڑی دی کھچڑی

اک وار دی گل اے کہ اک بندہ اپنے پنڈ توں دوجے پنڈ کسے کم نال جا رہیا ہوندا اے۔ ایہہ پنڈ اوس دے پنڈ توں بہت دور ہوندا اے۔ سفر کردے ہوئے اوہنوں اک ویران جگہ اُتے شام پے جاندی اے۔ اوتھے اوہنوں کوئی گھر نظر نئیں آندا۔ جتھے اوہ رات گزار سکے۔ تھوڑا ہور فاصلہ کرن توں بعد اوہنوں دوروں اک گھر وچ روشنی نظر آندی اے۔ اوہ اوس روشنی ول سفر کر کے اوس گھر اپڑ جاندا اے۔ اوہدے بوہے اُتے دستک دیون توں بعد گھر وچوں اک مائی نکلدی اے تے اوس کولوں دستک دیون دی وجہ پچھدی اے۔ اوہ آکھدا اے کہ اوہ اک مسافر اے تے اوہنوں سفر وچ شام پے گئی اے۔ اوہ مائی نوں آکھدا اے کہ اج دی رات مینوں ایتھے سون دی اجازت دیو۔ میں سویر چلا جاواں گا۔ مائی اوس نوں اندر لے آندی اے تے سون لئی اک منجی دے دیندی اے۔

مائی بڑی کنجوس ہوندی اے اوہ اوس نوں کھاون لئی کجھ نئیںدیندی۔ کافی دیر بھکھے رہن توں بعد اوس نوں اک خیال آندا اے تے اوہ مائی نوں آکھدا اے کہ اماں توں کدے کواڑی دی کھچڑی کھاہدی اے۔ مائی آکھدی اے کہ نہیں پترا۔ اوہ مائی نوں آکھدا اے کہ میں اج تہانوں کھچڑی بنا کے کھوانا واں بس توں مینوں کواڑی تے برتن دے۔ مائی اوس نوں برتن دے دیندی اے۔ اوہ کواڑی نوں برتن وچ رکھ کے اوہدے وچ پانی پاندا اے تے برتن نوں چلہے اُتے رکھ دیندا اے۔

کجھ دیر توں بعد اوہ مائی نوں آکھدا اے کہ اماں جے ایہدے وچ تھوڑے جیہے چول تے تھوڑی دال پا دتی جاوے تاں کھچڑی بڑی مزے دار بنے گی۔ مائی اوس نوں چول تے دال دے دیندی اے۔ اوہ چول تے دال پانی وچ پا دیندا اے۔ فیر چالاکی نال اوہ واری واری مائی کول مصالحے لیندا اے تے پانی وچ شامل کردا رہندا اے۔ انج اوہ کھچڑی وچ پین والیاں ساریاں چیزاں شامل کر لیندا اے۔ جدوں کھچڑی پک جاندی اے تاں اوہ کواڑی نوں وچوں کڈھ دیندا اتے تے آپ وی ڈھڈ بھر کے کھاندا اے تے مائی نوں وی کھاون نوں دیندا اے۔