خرگوش تے گدڑ

اک سی خرگوش تے اک سی گدڑ۔ خرگوش گدڑ دا ماما سی۔ دونواں نے اک اک بیری دا رکھ لایا۔ خرگوش اپنی بیری نوں ویلے سر پانی دیندا، دوجے جانوراں توں راکھی کردا تاں جے اوہ ایس نوں کھا نہ جاون۔ گدڑ اپنی بیری ولوں اوناں ای لاپرواہ سی۔ کدے کدے پانی دیندا۔ اوہ وی گندی نالی دا۔ کجھ دناں دے بعد دوہاں دیاں بیریاں وڈیاں ہو گئیاں۔خرگوش دی بیری نوں مٹھے تے گدڑ دی بیری نوں کوڑے بیر لگدے سن۔ جدوں گدڑ نے بیر کھانے ہوندے تاں اوہ خرگوش کولوں منگ لیندا۔ اسرے بیر کھا کے اوہ ہور بیر منگدا تاں خرگوش آکھدا بس بس، سواد پے جاؤ گا۔

اک دن خرگوش تے گدڑ بازار گئے اور ویکھیا کہ اک دکان تے اوہدا مالک موجود نہیں۔ اوہ دونویں دکان اندر وڑ جاندے نیں۔ خرگوش آپ کھنڈ دی بوری اتے بہہ کے مزے نال کھنڈ کھاندا رہندا اے۔ گدڑ نوں اوہ مر چاں والی بوری اتے بہا دیندا اے۔ گدڑ نوں جدوں مرچاں چڑھ دیا نیں تاں اوہ خرگوش کولوں کھنڈ کھاون نوں منگدا اے۔ خرگوش اوہنوں آکھدا اے کہ چپ کر جا۔ تیری آواز سن کے دکان دار نہ آ جاوے۔ اپنے چرنوں دکان دار آ جاندا اے۔ خرگوش چھیتی نال اوتھوں نس جاندا اے تے گدڑ دکان دار دے قابو آ جاندا اے۔ شام نوں اوہ گدڑ نوں اپنے گھر لیا کے بنھ لیندا اے۔ اوہ گدڑ نوں کھاون نوں سکی روٹیاں تے پین نوں گرم پانی دیندا ٓے۔ ایس پاروں گدڑ بہت ماڑا ہو گیا۔

کجھ دناں بعد اوس نوں کسے دوسرے شہر کم لئی جانا پیندا اے۔ اوہ اپنی گھر والی نوں آکھدا اے کہ گدڑ نوں سکی روٹی دینی اے تے پین لئی گرم پانی۔ اوہدے گھر والی بولی ہوندی اے۔ اوہنوں کجھ سمجھ نہیں لگدی جدوں اوہ چلا جاندا اے تاں اوہ گدڑ کولوں پچھدی اے کہ تیرے بارے میرا گروالا کیہ آکھ کے گیا اے۔ اوہ چالاکی نال آکھدا اے کہ روز مکئی دی روٹی مکھن نال تے پین نوں دودھ دینا اے۔ اوہدی زنانی اوس نوں ایہہ چیزاں دیندی رہندی اے۔ جنہاں نوں کھا کے گدڑ موٹا تازہ ہو جادنا اے۔ اوس اپنی گھر والی کولوں گدڑ دی خوراک بارے پچھیا۔ اوہنے ساری گل دس دتی۔ گل سن کے اوس نوں گدڑ اتے بہت غصہ آیا۔ اوس نے گدڑ نوں بہت ماریا۔ گدڑ اوس نوں آکھدا اے کہ میں انج نہیں مرنا۔ مینوں مرچاں دیو، میں آپے مر جاواں گا۔ اوہ بندہ گدڑ دیاں گلاں وچ آ کے اوہنوں مرچا دیون دی کوشش کردا اے۔ گدڑ اوہدے کولوں مرچاں والا ڈبہ کھو کے بُک بھر کے مرچاں اوہدیاں اکھاں وچ پاء دیندا اے تے آپ اوتھوں نس جاندا اے۔