سلطان کھاروی دی نعت نگاری

نعت بھانویں کہ عربی زبان دا شبد ہے تے ایس دے معنے تعریف کرنایاں وصف بیان کرن دے نیں۔ عربی وچ ایس مقصدلئی مدح شبد دی ورتوں کیتی جاندی اے۔ پر ادبی اصطلاح وچ لفظ نعت ،رسول اکرم ﷺ دی مدح تے تعریف واسطے ورتیا جاندا اے۔

نعت وچ رسول ﷺ دی ذات تے ذات نال سمبندھ رکھن والیاں شیواں نال عقیدت، محبت تے ارادت دے نال نال آپ ؐ دے ارشادات ، پیغامات، نبوت دے مقصدنبیؐپاک دی بعثت نوں وی موضوع بنایا جاندا ے۔ ایہناں سرنانویاں اتے نعت لکھن لئی نعت نگار دا اسلامی اتہاس اتے عبورہونا، قرآن و احادیث اتے ڈونگھی نظر، سیرت رسولﷺ بارے جانکاری تے علم عمرانیات دا ماہر ہونا ات ضروری اے۔فیر ای اوہدی نعت وچ ڈونگھیائی تے اثر پیدا ہوسکدا اے۔ کیوں جے نعت وچ سیرت دا جے کوئی واقعہ بیان کیتا جاوے تے اوہدی سند یاحوالہ نہایت احترام نال پیش کیتاجاوے، پئی نعت دی روح پھٹر نہ ہووے تے تاثیر وی دونی ہوجاوے۔

نعت و چ لفظاں دی ورتوں بہوں سوچ سمجھ کے کیتی جاندی اے ، ایس لئی نعت وچ اک اک شبد اُتے غور کیتا جاندا اے پئی اوہ جذبے تے خیال دے نال نال موزوں تے مناسب وی اے یاں نہیں، کدھرے اوہدی ور توں نال لغت وچ بے ادبی یاں گستاخی دا کوئی پہلو تاں نہیں نکلدا۔ اجہیا اک وی شبد پوری لغت دے تقدس نوں پھٹر کر دیندا اے تے ثواب دی تھاں گناہ جھولی وچ پہ جاندے نیں ۔ ایس لئی کئی کوی ہرقسم دیاں شعری صلاحیتاں رکھن دے باوجود نعت آکھن توں کنب جاندے نیں ۔ پئی کدھرے کوئی بے ادبی دے مرتکب نہ ہوجاون، کیوں جے نعت آکھنا کوئی سوکھا کم نہیں سگوں والوں نکی پل صراط توں لنگھن دے برابر اے۔ جتھے بڑی احتیاط نال ٹریا جاندا اے متاں بھورا جئی بھل نال دوزخ دیاں تھاہ ڈونگھیایاں وچ ڈگ پین۔

سلطان کھاروی اک سچے عاشق رسولﷺ نیں، آپؐ دی پاک ذات نال محبت نعتیہ کوتارا ہیں ڈلھ ڈلھ پیندی اے۔ آکھدے نیں کہ جگ وچ ہزاراں سوہنے آئے پر اوہنا ں دا کوئی جوڑ آپ دے نال نہیں جیویں دے اخلاق حسنہ رب نے آپؐ  نوں بخشے نیں ۔ انج دی بلاری کسے ہور دی نہیں ہوسکدی۔

ہزاراں ہون گے سوہنے پر اوہدا جوڑ نہیں ہونا

نبیؐ دے وانگ کوئی دوجا خدا دی لوڑ نہیں ہونا

کوئی وی پیار دی بولی ترے جہی بول نہیں سکدا

کسے توں ظلم دا بازو وی انج مچکوڑ نہیں ہونا

(۱)

مدینے سدن دا ترلاپا ندے نیں۔ جے انج ہوجاوے تاں میں مدینہ شہر تے جالیاں ویکھ لاں گا۔

سد لے مدینے اک وار سوہنیا

ویکھ لواں تیرا میں مینار سوہنیا

ویکھاں تیرے شہر نوں میں گھم گھم کے

تھکاں گا نہ جالیاں نوں چم چم کے

ہووے جے نصیب ایہہ دیدار سوہنیا

(۲)

اے نبیؐ  محترم آپ ؐ نوں رب نے عرشاں دی سیر لئی بلایا آپ نوں دنیا دا سلطان آکھدے نیں مینوں وی مدینے سدلو۔

عرشاں دا تینوں مہمان آکھدے

دنیا دا نالے سلطان آکھدے

مینوں وی نواز سردار سوہنیا

سدلے مدینے اک وار سوہنیا

(۳)

حوالہ جات

۱۔            ولگن سلطان کھاروی، لاہور ، گلشن ادب 6خیبر پارک، 2012ئ،ص71

۲۔            ہن سلطان کھاروی، گلشن ادب خیبر پارک لاہور ، 2021ئ، ص۵

۳۔            ہن سلطان کھاروی، گلشن ادب خیبر پارک لاہور ، 2021ئ، ص6

٭٭٭٭٭٭٭