مڈھلی گل

                پندھ ورتی دی گڑھتی مینوں اپنے ابا جی ولوں ملی جو کہ اک اُچ پدھر دے یاتری سن۔ دنیا دے وکھ وکھ دیساں دی یاترا توں وکھ اپنے شوق نوں پورا کرن لئی 1958وچ پنڈ قندیل تحصیل بحرین ضلع سوات وچ گھر وی بنوایا۔ جتھے ہر سال گرمیاں دی رُتے اپنے متراں نال جاندے سن۔ فیر جدوں میں ہوش سنبھالی تاں کدے کدے ضد کر کے اوہناں دے نال ٹر جاندا ساں۔ انج مینوں ربی قدرت (پہاڑ، دریا، چشمے، مینہ،برف تے لینڈ سلائنڈنگ) نوں بہوں نیڑیوں ویکھن دا موقع ملیا۔ سمے دے نال نال میری ایہہ دل چسپی ودھ دی گئی تے میں پنجویں جماعت وچ پہلی وار اپنے سکول دے استاد دی چھتر چھانویں تریموں ہیڈ ضلع جھنگ دی یاترا کیتی۔ ایس توں پچھوں چھیویں جماعت وچ مڑ استاداں نال چنیوٹ شہر (شاہی مسیت تے احمد ھیات دا محل) تے دریا ویکھن دا موقع ملیا۔ میں اکلا نویں جماعت وچ ساں جدوں اپنے جماعتی خالد محمود (اوہدوں اوہناں دیاں چھ بساں کوہستان کمپنی وچ چل دیاں سن)نال پنڈی یاترا لئی گیا۔ ایس یاترا وچ راول پنڈی ،اسلام آباد توں وکھ ٹیکسلا، حسن ابدال، واہ کینٹ تے مری گھمن دا موقع ملیا جس دا مینوں رج کے آنند آیا۔ ایس توں مگروں اک لما ٹور اوہدوں ہویا جدوں اپنے نکے ویر محمود احمد نوں ٹی بی دے روگ وجھوں ڈاڈر سے آرمی سینی ٹوریم وچ بھرتی کروایاتے انج مینوں مانسہرہ، شنکیاری تے شاراں وادی نوں بہوں اندر جا کے ویکھن دا موقع ملیا۔ تن مہینے ایس وادی وچ رہن مگروں ہر سال دو وار ویر دے چیک اپ لئی جناح روڈ ایبٹ آباد ڈاکٹر تاج محمد دے کلینک جانا ہوندا سی۔ جے کر ڈاکٹر صاحب نے ویر نوں اپنے کلینک گھٹ ہسپتال وچ کجھ دیہاڑیاں لئی بھرتی کر لیناں تاں ایبٹ آباد دا آل دوال گھمن دا موقع ملنا۔ ایہناں نکیاں یاترواں وچ مینوں نتھیا گلی، ایوبیہ تے حویلیاں ویکھن دا موقع ملیا۔ پر ایس دے نال سوات یاترا ابا جی نال جاری رہی۔

                1984حیاتی دا اوہ سوہنا ورھا سی جدوں میں اپنے نکے ویراں نال پہلی واری کاغان وادی دی یاترا لئی گیا۔ ایبٹ آباد تے مانسہرہ توں ہوندے ہوئے رات والد صاحب دے اک متر عارف خان دے گھر گزاری تے ایس اتہاسک شہر دیاں وکھ وکھ تھاواں ویکھیاں تے اگلے دن بس راہیں سویرے دس وجے ناران لئی سفر شروع کیتا جو شام نوں مکیا تے رات لاہور ہوٹل ناران وچ قیام کیتا۔اوس توں مگروں 2018تائیں ان گنت وار ایس جنت ورگی وادی نوں ویکھن دا موقع ملیا۔ جنی وار وی ناران گیاں ہر وار خوب صورت یاداں نال واپسی ہوئی۔ کجھ پرانیاں یاداں دی تہاڈے نال سانجھ پاون لئی ایہہ پندھ ورتی لکھ رہیاں آں۔

                ایس پندھ ورتی نوں تن کانڈاں وچ ونڈیا گیا اے۔ پہلے حصے وچ ایس علاقے دے اتہاس بارے گل کیتی گئی اے جو کہ وکھو وکھ اتہاس لکھتاں توں پنجابی وچ ترجمہ اے۔ پورا حوالہ دتا گیا اے۔ جے کوئی پاٹھک ودھیرے پڑھنا چاہوے تاں ایہناں لکھتاں توں راہ چک سکدا اے۔ دوجے حصے وچ ویکھن یوگ تھاواں دی گل کیتی گئی اے۔ تے تیجے باب وچ سیر سپاٹے تے کجھ پرانیاں یاداں بارے لکھیا گیا اے۔ تہانوں ایہہ پندھ ورتی کیہو جئی لگی پڑھ کے ضرور دسیا جے۔

                                                                                تہاڈے وچاراں دا اڈیکن ہار

                                                                                ڈاکٹر محمد ایوب