منان لطیفؔ۔۔۔ نئی نظم کا ہم مزاج

                نثری نظم اپنے تشکیلی دور سے نکل آئی ہے اور اب ایک زرخیز روایت کی مالک ہے ۔اس روایت میں فکر و خیال اور شاعرانہ اسلوب کے مظہر کئی تخلیق کار نثری نظم کے معمار ہیں اور انہی معتبر نثری نظم نگاروں کا فیض ہے کہ اکیسویں صدی میں نثری نظم میں جدید حسیات کی عکاسی ملتی ہے اور اب اسے ایک سنجیدہ اظہاریے کی سند مل چکی ہے ۔نثری نظم تخلیقی اور شعری اسلوب میں منفرد اور تازہ خیال کی شاعری ہے۔انہی صفات کی بنا پر یہ نثر کے مزاج سے مختلف ہونے پر اصرار کرتی ہے ۔یہ انفراد نثری نظم کا جواز بھی ہے ۔اسی لیے غزل اور موزوں نظم میں پہچان بنانے والے شعرا بھی نظم کو اپنا چکے ہیں ۔نثری نظم کی روایت کے لیے خوش آئند امر یہ ہے کہ نئے تخلیق کار بھی اس صنف کی روایت سے وابستہ ہو رہے ہیں ۔جن کو یہ شعور ہے کہ شاعری کے لیے وزن نہیں بلکہ شعریت شرط ہے ۔منان لطیفؔ بھی ان تازہ دم ،جواں سال و جواں فکر شعرا کی صف میں شامل ہیں جو نثری نظم کے ہم مزاج تخلیق کار ہیں اور اس نازک صنف کے تقاضوں کا ادراک رکھتے ہیں ۔ان کا تخلیقی وفور نثری نظم کے اسلوب کے سانچے میں اپنی حسیات کو شاعرانہ لہجے میں اظہارنے کی طلسم کاری سے منور ہے ۔ان کی نظمیں شعری بصیرت سے لے کر شعری اسلوب کی تشکیل کے رویوں کی عمدہ مثالیں ہیں ۔اس لیے ان نظموں کی قرأ ت کے دوران میں قاری کی ذہنی کیفیت احساس کی نئی بستیوں سے آشنا ہوتی ہے ۔یہ وہ ہنر مندی جو نثری نظم کا جواز ہے ۔اس لیے مجھے یقین ہے کہ مذکورہ اوصاف کی اساس پر منان لطیفؔ کا مجموعہ ’’گردشِ خاک‘‘نثری نظم کو ایک نئے ذائقے اور اعتبار سے آشنا کرے گا ۔

                                                                                ڈاکٹر اسحاق وردگ (صدرِ شعبہ اردو)

                                                                گورنمنٹ پوسٹ گریجوایٹ کالج،تیمر گرہ                                                                                                              ضلع دیر پائیں، خیبر پختونخواہ