دست ِ فراخ

میں وہ تیرگی ہوں

 جس کے واسطے

آسماںکو چیرتے

اک نورِ عظیم سے

دشت کی وسعتیں چمک اٹھیں

پہاڑوں کو چوٹیاں دمک اٹھیں

میں وجہِ قیام ِطویل ہوں

کہ شب بھی رو پڑے

 خدا بھی پکار اٹھے

 بس کیجیے !بس کیجیے

میں وہ خاکِ خوش نصیب ہوں

جس پہ تحائفِ سماوی کا نزول ہے

میں آنسوئوں سے تروہ دعا ہوں

جسے ازل سے اندیشہ ٔ رد نہیں

جو فقط قبول ہے،قبول ہے

 میں وہ غم ِ بختیار ہوں

جسے دلِ اطہر کی پناہ ملی

 وہ راہ نور ہوں

جسے روشن نگاہ ملی

بس اب اتنی ہے آرزو

پاک فضا میں سانس لوں

زمزم میرا مشروب ہو

سایۂ سبز تلے پڑا رہوں

اور جب ہو عالمِ تشنگی

 ساقیِ دو جہاں کے دستِ فراخ سے

وہ جامِ تمنا نصیب ہو

جس کی سدا تمنا رہی