اعتراف

میں دو دیوتائوں کا بھگت

جنھوں نے میرا بخت چمکایا

پہلا دیوتا جس کا مندر

جیسا باہر ویسا اندر

جہاں محبت کی شمعیں جلتی ہیں

درد کے سنکھ بجتے ہیں

جس کی کشتِ سخن زرخیز ہے

جس میں گلاب و سمن مہکتے ہیں

اور مرغانِ خوش نوا چہکتے ہیں

میرے اندر کے تار بجتے ہیں

مجھے ذوقِ ادب کا خزانہ دیا

لکھنا، پڑھنا، بولنا سکھایا

اظہار و بیان کا سلیقہ سمجھایا

پھر میں ایک ایسے دیوتا کے سپرد ہوا

جس کا مندر دیوتائوں کاعجائب گھر

جہاں شعور و فکر کے دیپ جلتے ہیں

جہاں علم و سخن کے گَجر بجتے ہیں

جس نے میری تپسیا کو بھاگ لگائے

میرے لفظ و معانی کو راگ دیے

میری سوچ کو پر لگائے

لفظوں کے جنگل سے خیال و معنی کے پھول چننے کا سلیقہ سکھایا

مجھے تو دوئی راس آگئی

یعنی مجھے پیاس بھا گئی