زہر رگوں میںاتارنا پڑتا ہے

تپتے سورج کی کرنوں کے نوکیلے پتھر

فگار دن کے برہنہ سر پر برس رہے تھے

ریل کی پٹری کو کاٹتی ہوئی کہنہ سڑک پر

انبوہِ آدم رواں دواں

قریب ہی پُل کے نیچے بیٹھے دھوئیں میں پریشاں حال

اپنے وجود کو تلاشتے چند انسان

موت کی آغوش میں پلتے ہوئے

دشت نما چہروں پر بے خوابی کی جھریاں

بد قسمتی کی دھول میں اٹے ہوئے بال

بوسیدہ پیراہن سے جھانکتا استخواں

آنکھوں میں خمارِ آشفتگی

جس میں ٹھکرائے جانے کا غمِ جاوداں پنہاں

 اس ہجومِ آشفتگاں سے ایک ژولیدہ مو

اپنی رگوں میں زہر اتارنے لگتا ہے

 زندگی بے اختیار چیخنے لگتی ہے

اے دشمنِ جاں یہ کیا۔۔۔؟

آشفتہ نوا گویا ہوا

سن اے زندگی!

’’خدا نے فقط تجھے عطا کر کے

بدلے میں مجھ سے کیا کچھ نہیں چھینا

اُس کے بے اماں جہان میں

رشتے بکتے ہیں

جذبات کا بیوپار ہوتا ہے

محبت بھیک مانگتی، تلوے چاٹتی ہے

جھوٹ مسکراتا ہے

سچ دریوزہ گر ہے

ہر کوئی نفرت کا خریدار ہے

اپنے بیگانے ہیں

یہ سب دیکھنے اور سہنے کے لیے

زہر رگوں میں اتارنا پڑتا ہے‘‘