لا تفسدو فی الارض

گاڑی کے سائیلنسر سے کرپشن کا دھواں نکلتا ہے

ٹائروں سے چمٹی بے ایمانی کی دھول اڑتی ہے

 گاڑی ٹھہرتی ہے

سیاہ شیشوں میں آنکھیں چھپائے

چہرے پر رعونت کے ماسک لگائے

سر پہ شرافت کی دستار سجائے

نفاق کی تسبیح پر سنگ دلی کے دانے پھینکتے

شیطان باہر آتے ہیں

مسجدوں میں تقویٰ کی نمائش ہوتی ہے

پرہیز گاری کے خول میں چھپے یہ بھیڑیے

خدائی فو جدار

گدھ کی مانند بنی آدم کے جذبات نوچتے ہیں

رگِ احساس کاٹنے کی ترغیب دیتے ہیں

اصلاح کے پردے میں چھپے ہوئے یہ فسادی فرعون

ہمیں ’’میں‘‘ اور ’’ تو‘‘ میں بانٹتے یہ اشتراکی کوچہ گرد

ازل سے عصائے مذہب تھامے

بنی آدم کو ہانک رہے ہیں