سنتو رانی

بیل گاڑی پہ بیٹھی سنتو،پستان سے اپنے ننھا لٹکائے

کچی سڑک پر دھول جگاتی، بیل گاڑی بھگاتی جائے

گہری سوچ میں ڈوبی

دور آسمانوں میں تکتی

کبھی کبھی درانتی سے سر کو کھجاتی

ہوا کو دکھڑے سناتی

’’رُلدو کا بابا، میرا پریمی

نجانے کس دیس چلا گیا

جہاں سے سندیس بھی نہ آوے

یہ کیسی پرکشا ہے رادھا دیوی!

سریر کا بندھن تو ٹوٹ چکا

پر اب بھی یاد پیا کی آئے

جی رہی ہوں من میں آگ لگائے

سارا سماج مجھ کو دسشی ٹھہراوے

سنسار کو میرا پریمی نہ بھاوے

اب تو آ جا سانوریا پیارے

ہو ۔۔ہو۔۔۔۔۔۔۔!

میرے سوہنے رام پیارے

کسی من میں موہ کی اگن نہ لاگے

کسی کا پریمی پردیس نہ جاوے

جہاں سے کبھی سندیس نہ آوے‘‘