ہونٹ ناز پرور کے

اس ناز پرور کے ہونٹ

جیسے کسی ماہر سنگ تراش نے نفاست سے تراشے ہوں

میں دن بھر جملوں کی ترا ش خراش میں مصروف رہتاہوں

کاش ان تراشیدہ ہونٹوں کو لفظوں کا پیراہن دے سکوں

جن پہ سرسوں کے پھولوں کی طرح مسکراہٹ پھوٹتی ہے

تو صبح کی پو پھوٹنے کا گمان ہوتا ہے

بہار نکہتوں کا کاسہ لیے اُن کی دریوزہ گری کرتی ہے

لفظ ان کی حلاوت سے رعنائی پا کر نکلتے ہیں

مگر ان ہونٹوں پر خزاں رسیدگی

ایک بے نام سے افسردگی

ایک بے مایا سی تشنگی

جیسے پت جھڑ میں شبنم کے منتظر پژمردہ پتے

جیسے ویرانہ کسی صدا کو پکارے

دیوانہ خدا کو پکارے

مگر ایسے میں اچانک کوئی سرسراہٹ

ویرانہ کے بدن میں بجلی سی کوند جائے

وہ آمد۔۔۔ وہ سرسراہٹ۔۔۔میں کیوں نہیں۔۔۔؟

کاش ایسا ہو

ہونٹ ناز پرور کے

میری آمد پہ کھلیں

میرے لیے مسکرائیں

میرے لیے گویا ہوں