حزیں حرف گر (۳)

اے آدم گر!

میں تیرے وصل کی خواہش کا مارا ہوا

ازل سے کاندھوں پہ روشنی کا بوجھ اٹھائے

جو کبھی میرے سامنے جھکی تھی

اب میرے ہر عمل کی گواہ ہے

میں سوچتا ہوں

وصل کیسے ممکن ہو

ہمارے درمیان ایک آتشیں دیوار ہے

وہ آگ جو مانندِ خوں مجھ میں رواں ہے

لمحہ بھر بھی اپنے کارِ پیہم سے بے خبر نہیں

جس کے سائے میں خواہشیں بھڑک رہی ہیں

یہ روشنی یہ آگ دراصل واہمے ہی تو ہیں

میرے ہونے سے یہ واہمے تصویر بنتے ہیں

وہ تصویر جو ہر لمحہ بدل رہی ہے

اے رہنمائے ابد !

تو بھی آدم زاد کو الجھائے رکھتا ہے

محبت کے لالچ میں ،رشتوں کی بھول بھلیوں میں

سفر کی الجھنوں اور منزل کی ہوس میں

مگر جب حسد اور نفاق کی آندھیاں چلتی ہیں

رشتے اپنی لگائی آگ میں جھلستے ہیں

بچھتاوے کی راکھ کے سوا کچھ باقی نہیں رہتا

یہ آدم زاد حقیقتوں کے سب آئینہ توڑ چکا ہے

خود فریبی کے عوارض میں مبتلا

حقیقت سے نظریں چراتا ہوا

سفرِ ابد پر گامزن

اے آدم ساز!

اب ایسی مٹی سے کوئی آدم تخلیق کر

جس میں خواہشوں کی بو نہ ہو

حسد کی آگ نہ ہو

فریب کی باس نہ ہو