عیدی

جب لوگ آسمان کی وسعتوں میں

ایک خم دار دھندلی سی لکیر تلاش کر رہے تھے

جو سب کے لیے باعث ِ مسرت تھی

مگر کسے خبر تھی

وہ شام میرے لیے غموں کے طوفان لانے والی ہے

اس لکیر کو دیکھتے ہوئے

میرے تصور میں بھی ایک نقطہ سا پھیلنے لگا

جو ایک مانوس صورت کا روپ دھار رہا تھا

چند قیمتی اذیت دہ لمحات میں ڈھلتی صورت

آخر یہ کس کی صورت  ہے؟

اُس شخص کی جو مجھے ادھورا چھوڑ گیا؟

اُس مصور کی طرح

جو منزل کو چھونے کی لگن میں

اپنی تخلیق ادھوری چھوڑ کر چل دے

میں ایک نامکمل تصویر ہوں

میرا مصور کہاں چلا گیا؟

جو مجھے نامکمل چھوڑ گیا،میرے کھلونے توڑ گیا

یہ کھلونے کب مزدوری کے اوزار بن گئے پتا نہیں چلا

میرے خیالات کی دنیا کیوں بکھیر دی گئی

شامِ الم شبِ ملول میں کیوں بدلتی چلی گئی

میں آزردگی کے عالم میں سرِ فلک ابھرتی ہوئی خمیدہ لکیر کو دیکھ رہا ہوں

مجھے بھی اس شخص کو عیدی بھیجنی ہے

سنا ہے اس پار بادِ صبا کے قافلے جاتے ہیں

محرومیوں کی ٹوکری میں دریدہ صبحوں کی کلیاں

محزون شاموں کی تنہا کونپلیں

رنجور راتوں کے سرمئی خواب

غمزدہ لمحوں کے زردانے

یادوں کے تازہ گلاب سجائے منتظر ہوں

اے بادِ صبا میری عیدی اس تک پہنچا دینا

اسے یہ بھی بتا دینا

اب میں کسی سے ضد نہیں کرتا

اب میں کھلونے ٹوٹنے پر روتا نہیں ہوں

اب میں خود کھلونا ہو گیا ہوں

میرے آنسو پلکوں کی دیواروں کے سائے میںبیٹھے رہتے ہیں

میرا ضبط انھیں باہر نہیں آ نے دیتا