تاشی تصویر گر

میں اذیت ناک لمحوں کی گود میں سر رکھے رو رہا ہوں

بچپن کی یادوں کے کچے رنگ

تصویر کے کینوس پر پکے رنگوں میں ڈھلتے جا رہے ہیں

یہ رنگ میرا قیمتی اثاثہ ہیں

دھنک تتلیوں کے دیس سے یہ رنگ چرانے آتی ہے

یہ سب میرے تصور کی پیدا وار ہیں

کسی تصویر میں امن کہلاتے ہیں

کسی میں محبت کے دکھ بن جاتے ہیں

چند تصویریں مجھے آزردہ کر دیتی ہیں

جن کے رنگ کچے ہیں

رخساروں پر جھریاں نمایاں ہیں

کبھی کبھی دل کر تا ہے

ان کو جمع کر کے یادوں کے آتش دان میں جھونک دوں

اور پھر نئے اذیت پاروں کی نمائش لگائوں

مگر یہ دکھ اپنی جگہ سلامت رہتا ہے

میری اذیت تصویر کیسے ہو سکتی ہے

کوئی صاحبِ نظر ہو

جو ان تصویروں سے باتیں کرنے کا ہنر جانتا ہو

میرے رنگوں سے مکالمہ کرے

میری تصویروں کے دکھ بانٹے

مگر میں تو خود بھی ان تصویروں کی مانند ہوں

جو بے رنگ کینوس پر ساکت کھڑی ہیں

میں ان گنت صورتوں کا خالق،اپنی پہچان سے نا آشنا

کوئی تو ہو جو مجھے تصویر کرے

مجھ میں زندگی کے رنگ بھرے

نمائش میں ہی سہی لوگ مجھ سے باتیں کریں

میں اپنی بے جان مخلوق کا دیوتا

ان تصویروں سے ہم کلام ہوتا ہوں

جو میری کم مائیگی پر آنسو بہاتی ہیں

سارا کینوس رنگین آنسوئوں سے بھر جاتا ہے

میری تخلیق پر انگلی اٹھانے والے یہ ذہنی مفلوج

روشن چہروں والے بے بصر

شوخ لباسوں والے پتھر دل

احساس سے عاری دولت گر

ریا اور مکاری کے کچے رنگوں سے چمکتی مخلوق

میرے پکے رنگوں کی اہمیت کیا سمجھے گی

یہ نو بلوغیت کے دائرے میں قید عفونت زدہ تنگ ذہن

ان رنگوں کی وسعت کا اندازہ کیا کریں گے

جن کی خوشبو تک پہنچتے زندگی کا سورج ڈھل جاتا ہے