دروازہ

دہلیز پہ بیٹھی ایک بڑھیا چہرے کی جھریاں سہلا رہی تھی

اس کی دھندلائی آنکھیں بیتے دنوں پہ نوحہ کناں تھیں

جیسے یادوں کی آگ آنسوئوں سے بجھا رہی ہو

نحیف ہاتھوں میں وقت کا تحفہ تھامے

ڈھلکتے آنچل سے بے خبر نجانے کن دنیائوں میں گم تھی

اپنی صدا سے دور کئی صدائوں میں گم

دھندلی آنکھوں سے ماضی میں جھانک رہی تھی

وہ دل کش چہرے اور حسین منظر

کچی دیواریںاور کھلے در

روشن طاقچے اور جھلملاتی چلمنیں

بچوں کی اٹھکیلیوں سے مہکتے آنگن

چاندنی میں نہائے مسکراتے چہرے

پیپل کے پتوں کی سرسراہٹ اور جھولوںکی آوازیں

کیاریوں میں پھولوں پر بیٹھی مکھیوں کی بھنبھناہٹ

کچی دیوار کے طاقچے میں بیٹھی ایک گڑیا

بابا کے شانوں پہ بیٹھی ہوا میں جھومتی ہوئی ایک بچی

بڑھیا کو دیکھ کرسوال کرتی ہے

’’یہ گڑیا طاقچے میں اکیلی کیوں ہے؟

اس کا گڈا ، اس کا سانوریا کہاں گیا؟‘‘

بڑھیا داہنے ہاتھ سے جھریاں صاف کرتے ہوئے کہتی ہے

’’بٹیا۔۔۔! زندگی بچھڑنے کا نام ہے

کبھی گڈا پہلے بچھڑ جاتا ہے ،کبھی گڑیا

یہ میرے سفید ژولیدہ بالوں کو دیکھتی ہو

نجانے کتنے پھول ان میں سجنے کو بے تاب رہتے تھے

اب حالات کی سیاہ چادر میں دبکے رہتے ہیں

یہ کلائیاں دیکھو جن پہ لوہے کے کنگن رہ گئے ہیں

کبھی پھولوں کے گجرے ہوتے تھے

کانچ کی چوڑیاں بھی ان کو بار لگتی تھیں

یہ خمیدہ کمر دیکھ رہی ہو

کبھی شاعر اس کے قصیدے بیان کرتے تھے

انسان بھی کتنا بے بس پجاری ہے

تمام عمر خواہشوں کو پوجتا ہے

یہ مٹی کا پتلاجسے اذیتوں بھرے ساٹھ ستر برس دے کر

اوندھے منہ زمین پر گرا دیا گیا

جن میں سے آدھے خواہشیں نگل جاتی ہیں

کچھ بھوکے بھیڑیے بھی ہیں جو خواہشوں کا بدن نوچ کھاتے ہیں

بٹیا۔۔! یہاں ہر نفس گم ہے

کوئی فضائوں میں کوئی سزائوں میں

کوئی وفائوں میں، کوئی جفائوں میں

تم سے اگر ہو سکے تودروازے کے اُس پار ہی رہنا

اِس پار تو اذیتوں کے سوا کچھ نہیں

اس طرف درد ہیں، چھبن ہے

صحرا ہے، دہشت ہے ،وحشت ہے‘‘