بابو٭

بابو!کس دیس چلا گیا تو

تیرے بعد اداس ہے بام کُو

نجانے کن پردوں کے پیچھے جا چھپا

کن ان دیکھی دیواروں کے پار اتر گیا

میری صدائیں ٹکڑا کر واپس پلٹ آتی ہیں

مگر تو نہیں آتا

کبھی دیوار سے جھانک تو سہی

تیرے بنا ہر پل ،ہر گھڑی

سرو و سمن اور کلی

چاند اور چاندنی سب اداس ہیں

نہ پھول مہکتے ہیں ،نہ جگنو چمکتے ہیں

بابو! آواز تو دے

یہ کیسی خاموشی ہے ؟

میرے نغمے کو ساز تو دے

جنگل جنگل،صحرا صحرا ،نگر نگر

ڈھونڈ چکا ہوں

بابو! کس پار چلا گیا تُو؟

بابو! یہ دیوار گرا دے

یا خود واپس آجا

یا مجھ کو پا س بلا لے