دھوکہ

                اج میں تہانوں اپنی آپ بیتی سناناں واں میں میٹرک دا امتحان بڑے چنگے نمبراں نال پاس کیتا۔ میں ابے ہوراں کولوں داخلے لئی پیسے منگے تے اوہناں مینوں آکھیا ’’پتر‘‘ کل مینوں تنخواہ ملن والی اے میں تینوں کل داخلے جوگے پیسے دیواں گا۔ ایہہ گل سن کے میں بڑا خوش ہویا۔ پئی کل مینوں ابے ہوراں نے داخلے لئی فیس دینی اے۔ کیوں جے مینوں پڑھن دا بڑا شوق سی پر گھر دی مالی حالت  کجھ بہتی چنگی نہیں سی۔ ابے ہوراں دی تنخواہ نال ا ی گھر دا خرچ ٹر رہیا سی۔ فیس ملن دی خشی وچ راتیں مینوں نیندر نہ آئی۔ رب رب کردیاں رات لنگھی تے سویرے ابے ہوراں وعدے موجب مینوں کالج وچ داخلہ  لین لئی فیس دتی۔ فیس ملن دی مینوں ا ینی خوشی ہوئی جنی کسے بال نوں ضد کرن پچھوں پسند دا کھیڈونا ملن دی ہوندی اے۔ میں کالج جان دی تیاری اینی کاہلی نال کیتی کہ گھر دے جی میریاں پھرتیاں تے حیران سن۔

                کالج جاندیاں ہویاں رستے وچ کجھ لوک کھڑے نظریں پئے۔ لوکائی دے اکٹھ وچ اک بندہ بانہواں اڈھ کے کہہ رہیا سی کہ میرے پتر دا ایکسیڈنٹ ہوگیا اے۔ دوا دارو لئی مینوں کچھ روپیاں دی لوڑ اے۔ پر اینے وڈے اکٹھ اگے ہاڑے پاون دے باوجود کوئی وی بندہ اوس دی مدد لئی تیار نہ ہویا، اوس دے رون ھاکے انداز نے میرے دل نوں موم وانگوں پگھلا دتا تے میں اپنی ات دی نرم طبیعت پاروں اوس دی مدد کرن لئی تیار ہوگیا تے اپنے داخلے دے پیسے اوس دی تلی اتے دھر دتے گھر پرتن سمے مینوں اوس دکھیار دی مدد کرکے ڈاہڈی خشی محسوس ہورہی سی تے میں پھل وانگوں ہولا ہوکے پینڈا چھیتی چھیتی مکارہیاں ساں کیوں جے میں گھر جا کے ایہہ کارنامہ سب نوں دسنا چاہندا ساں۔ گھر اپڑ کے میں سب نوں اپنے نیکی دے کم بارے دسیا تے اوہناں نے میرے جذبے دی تعریف کیتی۔

                کجھ دیہاڑے گزرے میں اک دوکان تے بیٹھا اخبار پڑھ رہیا ساں تے اچن چیت میری نظر اک فوٹو تے جاپئی میں پچھانن دی کوشش کیتی تاں چیتے آیا ایہہ تاں اوسے بندے دا فوٹو سی جس دی میں مدد کیتی سی۔ پر ایہہ کیہ؟ کیوں جے اوس بندے دی فوٹو وچ اوس توں وکھ دو پلس والے وی کھڑے سن تے اوس فوٹو دے تھلے کھیا ہویا سی کہ ایہہ بندہ فراڈیا اے جس نوں پلس نے لوکاں کولوں جھوٹ بول کے پیسے ٹھگن تے پھڑیا اے جد میں ایہہ خبر دی تفصیل پڑھی تاں ہور وی حیرانی ہوئی کیوں جے اخبار وچ لکھیا ہویا سی کہ ایہہ بندہ آکھ رہیا سی کہ اوس دے گھر والی مرگئی ای اوس دے کفن دفن لئی اوہ لوکاں توں پیسے منگ رہیا سی کہ اچانک اک بندے نے اکٹھ وچوں آکھیا کہ ایہ بندہ کل وی ایہو آکھ کے لوکاں کولوں پیسے منگدا پیا سی جد اکٹھ نے ایہ گل سنی تاں اوس منگتے نوں پھڑ کے پلس دے حوالے کردتا۔

                خبر پڑھ کے میں سوچ دے ڈونگھے پانیاں وچ جا ڈبا۔ کیوں جے ایہو جیہے لوکاں نے اصل ضرورت منداں دا حق وی کھولیا اے  ساڈیاں اخلاقی قدراں ایس حد تک وگڑ گئیاں نیں کہ اسیں اپنے سکیاں نوں وی مارن نوں دریغ نئیں کردے۔ حالانکہ اسلام وچ منگن دی سختی نال مناہی کیتی گئی اے۔ پر اج تے ہر بندہ روپے پیسے دی لالچ وچ انھا ہو کے اخلاقی قدراں نوں پیراں ہیٹھ مدھول رہیا اے۔ مکدی گل ایہہ کہ ساہنوں مدد تاں کرنی چاہی دی اے پر ذرا ویکھ چاکھ کے کتے میرے وانگوں دھوکہ ای نہ کھا جانا۔