تلاشی کوٹ دی

                چاچا اﷲ دتہ نے اپنے ہرے رنگ دے کوٹ دا اپر والا بٹن بند کردے آکھیا ’’انور پتر! شام نوں بازار توں پرتدے ہویاں میرے لئی دلیے دا اک ڈبہ تے لے آویں‘‘ ایہہ کہہ کے اوہناں دو پرانے دس دس والے نوٹ میرے ول وادھائے ’’چاچا! ایس دی کیہہ لوڑ اے؟ میں لے آواں گا‘‘ میں رسماً آکھیا۔

                ’’او نئیں پتر! میرے کول نہ ہوون تاں ہورگل اے‘‘ میں چاچے کولوں پیسے پھڑے تے بازار ٹرگیا، چاچا اﷲ دتہ ساڈے پنڈدے بزرگاں وچوں سن۔ ساڈے گھر توں اوہ تن گھر چھڈ اک کلی ورگے گھر وچ رہندے سن جس دا صرف اک ای کمرہ سی۔ بچے ہے نئیں سن تے گھر والی کدوں دی اﷲ کول ٹرگئی ہوئی سی۔ عمر وچ اوہ سٹھ دے لگ بھگ ہوون گے۔ جدوں وی اوہناں نوں کوئی بازار دا کم ہوندا تاں اوہ کسے وی بازار جارہے ہوندے بندے نوں آکھ دیندے۔ ہر بندہ ہس کے اوہناں دا کم کردا سی۔ اج مینوں بازار جاندے ویکھ کے اوہناں مینوں اپنے کم دا آکھ دتا۔ میں شامیں دلیا اوہناں نوں لیا کے دے دتا۔ چاچا اﷲ دتہ نوں سارے پنڈ والے وڈے چھوٹے چاچا ای آکھدے سن۔ اوہناں دی شخصیت بہت گنبھل دار سی تے اوہناں دا ہرے رنگ دا کوٹ جس نوں اوہ ہر ویلے پائی رکھدے اوہناں دی شخصیت نوں ہور گھنجل دار بنا دیندا سی۔ کوٹ اتے دو چوڑیاں لکیراں سن گرمی ہووے بھانویں سردی کوٹ ہر ویلے اوہناں دے جثے اتے رہندا۔ مینوں یاد نئیں کہ میں کدے اوہناں نوں بغیر کوٹ دے ویکھیا ہووے۔ چاچا نوں کئی لوک مذاق وچ کہہ دیندے سن ’’بھئی ایس کوٹ اند رکیہڑا خزانہ اے جو ایس نوں ہر ویلے پائی پھر دا ایں‘‘ پر چاچا اتے کسے گل دا اثر نہ ہوندا۔ ایہو وجہ سی کہ اکثر لوک ایہ سمجھن لگ پئے کہ شاید چاچے نے کوٹ اندر اپنی کل جمع پونجی رکھی ہووے تے اوہ چوراں توں ڈردا ایس نوں اپنے گھر وچ نہ رکھدا ہووے جے کر کوئی چاچے نال کوٹ بارے گل کردا تاں چاچا بڑے سوہنے طریقے  نال ٹال دیندا۔ دن بدن لوکاں دا شک وادھدا جارہیا سی۔ ساریاں دا ایہہ خیال سی کہ چاچے جوانی وارے بہت ساری دولت کمائی ہووے گی۔ دنیا وچ اگے پچھے کوئی ہے نئیں ایس لئی سینے نال لائی پھردا اے۔ پر میرا خیال ایس دے الٹ سی۔ کہ جے ایہہ گل ہوندی تاں چاچے نوں ایس عمرے محنت دی کیہڑی لوڑ سی۔ پر ایس سوال دا جواب میرے بیلی ناصر نے مینوں دے دتا جیہڑا چاچے نوں کوٹ وچ ویکھ کے کوٹ دا راز جانن لئی ہر ویلے بے چین رہندا سی چاچا جے کر محنت مزدوری نہ کرے تاں لوکاں نوں پکا یقین ہوجاوے کہ واقعی ایس کول کافی دولت اے۔ سچی گل تاں ایہہ وے کہ میں وی کوٹ دی دولت مندی اتے یقین کرلیا۔ دو دناں بعد ناصر ملیا جو چاچے گھر سودا چھڈ کے آرہیا سی۔ مینوں پکا یقین اے کہ چاچے نے کوئی وڈی دولت کوٹ اندر لکائی ہوئی اے۔ ناصر نے آوندیاں ای آکھیا۔ ’’تینوں ایس گل دا کیویں یقین ہویا‘‘ میں پچھیا اوس دسیا کہ جدوں چاچے مینوں سودے لئی کوٹ دی کسے خفیہ جیب وچوں رقم کڈھ کے دتی۔ پر میں اوس دی گل نال اتفاق نہ کیتا کیوں جے ایہہ رقم اوہناں نے محنت مزدوری کرکے حاصل کیتی ہووے گی۔ ’’مزدوری دی تھوڑی جیہی رقم تے اوہ قمیض وچ وی رکھ سکدے سن‘‘ ناصر اپنی گل اتے اڑیا ہویا سی ’’خیر ساہنوں ایس گل نال کیہ؟‘‘ میں بیزار ہوندے آکھیا ’’تینوں نہ سہی مطلب مینوں مطلب اے‘‘ اوہ خوش ہوگیا تے اپنا منصوبہ مینوں دسن لگ پیا۔ میں اوس دی گل سن آکھیا ’’ویکھ ناصر جے کوٹ دی تلاشی دے دوران پھڑے گے تاں خوامخواہ چور بن جاواں گے، پر اوس دی اڑی دے سامنے میں ایس شرط اتے حامی بھری کہ میں مکان توں باہر رہوانگا اوہ اندر جا کے کوٹ لیاوے گا تے تلاشی توں بعد اوتھے ای رکھ آوے گا۔ میرا کم صرف اوس نال بوہے تک جانا اے۔ تلاشی دا مقصد صرف اصلیت دیکھنا سی کہ واقعی کوٹ اندر دولت ہے یاں ایویں لوکاں گلاں بنائیاں ہوئیاں نیں۔ ایس لئی میں وی ناصر نال اوس دے منصوبے وچ بھائی وال بن گیا۔

                منصوبے دے مطابق دوجی رات باراں وجے دے لگ بھگ میں تے ناصر چاچے دے مکان اندر اپڑ گئے چاچا گوڑھی نیندر ستا ہویا سی۔ ساڈی خوش قسمتی کہ چاچا گھوڑے ویچ سوں رہیا سی۔ ناصر نے ہمت کرکے ساری باری کھولی جیہڑی چاچے نے گرمی پاروں ادھی کھولی ہوئی سی۔ ناصر ہولی ہولی اندر کمرے وچ گیا تے بڑی احتیاط نال کوٹ چک ہولی ہولی برآمدے وچ آگیا۔ میں ایتھے اپنا ساہ روکی کھلوتا سی خوف نال پسینے آرہے سن تے دل تیزی نال دھڑک رہیا سی۔ میں جدوں ناصر دے ہتھ وچ کوت دٹھا تاں ایس توں پہلے کہ اوہ میرے کول آوے میں اوہدے ول ٹرپیاں۔ کول اپڑکے اوس آکھیا کہ ساہنوں کسے ویران تھاں اتے جاکے آرام نال کوٹ دی تلاشی لینی چاہیدی اے، ساہنوں چھیتی نال ساری کارروائی کرلینی چاہیدی اے متاں چاچے دی اکھ کھل جاوے۔ میں اوس دی گل منی تے چھیتی نال کوٹ نوں لے کے مکان توں باہر جھاڑیاں اوہلے آگئے تے ٹارچ دی روشنی وچ کوٹ دا معائنہ شروع کیتا۔ لگدا سی ورھیاں توں کوٹ نوں پانی نئیں سی وکھایا گیا۔ فیر کئی تھاواں توں رنب بدل کے کالاہوچکیا سی۔ میرا دل دھک دھک کررہیا سی تے ناصر بڑی بے چینی نال کوت دی تلاشی لے رہیا سی میں سوچ رہیا سی کہ وڈی رقم ویکھ کے ساڈی نیت وچ فتور ای نہ آجاوے۔ میں ایس گل دا اظہار ناصر نال کیتا۔ اوس خوشی نال آکھیا جے کر مال مل گیا تاں ’‘ففٹی ففٹی‘‘ میں ہنیرے وچ ناصر دیاں چمکدیاں اکھاں ویکھیاں اوہ اپنے نال مینوں وی پھنساون دے چکراں وچ سی، ناصر چھیتی چھیتی کوٹ دی تلاشی لے رہیا سی۔ میں ٹارچ نال اوس دے کم نوں سوکھا بنا رہیا سی۔ سب توں پہلے اوہنے سامنے والیاں دونواں جیباں دی تلاشی لی جتھوں سکھے گھاہ توں وکھ کجھ وی برآمد نہ ہویا۔ ایس توں بعد سائیڈ والیاں جیباں دی تلاشی لئی پر مایوسی دا منہ ویکھنا پیا۔ ناصر نوں فیر وی یقین نہ آیا کہ کوٹ اندر کوئی نہ کوئی خفیہ جیب ضرور ہووے گی اوس نے چادر وانگ کوٹ نوں زمین اتے وچھا دتا میں اپنے دل تے ٹارچ نوں گھٹ کے پھڑیا ہویا سی۔ اوس نے کوٹ دیاں وکھ وکھا تھاواں اتے ہتھ پھیرنا شروع کردتا۔ اوہ کوٹ دی اپر والی تہہ کھول کے اندر والی جیب اندر اپڑیا پر اوتھوں وی کجھ برآمد نہ ہویا۔ اوہ میرے ول پر تیا شاید اوس ٹارچ دی روشنی وچ مینوں ہسدے ویکھ لیا سی۔ اوس غصے نال کوٹ نوں جھاڑیاں دے اتے سٹ دتا۔ ’’تھن‘‘ دی آواز نال کوئی دھات دی چیز نال ٹکرا کے اک پاسے ہوگئی۔ میں ٹارچ دی روشنی اوسے ول کردتی۔ ایہہ تاں اک روپے دا سکہ سی جیہڑا پتہ نئیں کوٹ دے کیہڑے حصے وچوں نکل کے زمین اتے آپیا سی!