حق دی گل

                ’’ہائے ہائے‘‘ تے ’’اوئی اوئی‘‘ دیاں کوکاں سن کے، متھے تے چٹی پٹی بنھی ویکھ کے، سجا ہویا منہ سامنے والے دو دند ٹتے ہوئے تے لت اتے پلتر بنھیا ہویا ویکھ کے تسیں میرے کولوں ایہہ ضرور پچھو گے جے مینوں ہویا کیہ اے۔ کل تک تے چنگا بھلا ساں۔

                میرے بھراؤ! ہویا کجھ وی نئیں تہاڈیاں ساریاں گلاں دا جواب ایہہ وے پئی ہویا صرف اینا جے پچھلے کچھ دناں توں ساڈے اتے ایہہ گل ظاہر ہوئی۔ پئی ساڈے وچ اک اچا تے سچا لیڈر بنن دیاں ساریاں خوبیاں موجود نیں ایہناں وچوں ساریاں توں چنگی خوبی ساڈے اپنے خیال وچ ایہہ سی بھئی ساڈے وچ حق دی گل کہن دی صلاحیت اﷲ میاں نے لوڑ توں ودھ بھردتی اے۔ اسیں اپنی ایس خوبی نوں بڑا ای گھٹ ورتیا سی۔ اسیں ایہہ فیصلہ کیتا جے اگوں توں جدوں ویلا لبھیا اپنی ایس خوبی نوں جی داراں وانگوں ورتاں گے۔

                ساریاں توں پہلاں تے سانوں اپنی ایہہ خو بی جگ نوں وکھاون د اموقعہ اک سینما وچ ملیا۔ فلم نویں سی تے بھیڑ بہتی سی۔ اسیں ٹکٹ لے کے اک پاسے کھلو گئے کیوں جے ہالی پہلا شو نئیں سی ٹٹیا۔ اینی دیر وچ اک ہٹا کٹا بندہ میرے نال ای کھلوتے ہوئے اک بندے ول آیا تے آکھن لگا۔

                ’’کیوں باؤ جی ٹکٹ چاہیدا اے؟‘‘ ’’ضرور چاہیدا اے‘‘ میرے نال دے بندے نے آکھیا۔ لیا کڈھ اٹھاراں روپے‘‘ پہلوان ورگے بندے نے اپنی دھوتی دی ڈب کھولدیاں ہویاں آکھیا۔

                تسیں آپو ای دسو جے اوہ کیہڑا بندہ ہووے گا جیہڑا ایس طرح دیاں ’’نوروپیاں دی ٹکٹ اٹھاراں روپیاں دی‘‘ آپو ای آپ ساڈے منہ وچوں نکلیا میری ایہہ گل سن کے اوہنے میرے دل تکیا جویں بلی اپنے بلونگڑیاں نوں چھیڑن والے دل تکدی اے۔ اخیر اسیں وی تے حق دل گل کہن دی سونہہ کھاہدی ہوئی سی چپ کیوں رہندے ’’بھلیا مانسا ٹکٹاں بلیک کرنا ایں، ایہہ قانون دے خلاف کم اے‘‘ اسیں اپنے ولوں اوہنوں سمجھاندیاں ہویاں آکھیا۔

                ’’او باؤ چپ کرکے کھلو نئیں تے تنی منٹی ضائع کرادیاں گا۔ توں قانون دا ماما لگنا ایں‘‘ پہلوان ہوراں نے سانوں التی میٹم دے دتا۔

                ’’پہلوان جی! قانون تساڈا ساریاں دا۔۔۔‘‘ اسیں ہالی پوری گل وی نئیں سی کیتی جے پہلوان ہوراں نے آواز دتی ’’اوئے پھیکیا ذرا اُراں آ‘‘

                تے فیر سانوں گوشت پوست دا ٹردا پھردا پہاڑ پھیکے دے روپ وچ آندا دسیا تے اوہنے آندیا ای پہلوان ہوراں کولوں پچھیا ’’کیہ گل اے استاد جی؟‘‘

                پہلوان ہوراں نے میرے ول اشارہ کرکے آکھیا ’’اوئے ایس باؤ نوں بہتی ای مستی چڑھی ہوئی اے اوہ ایہدی مستی‘‘ جیویں مستی نئیں ساڈے پنڈے تے کیڑیاں چرھیاں ہون۔

                پھیکے ہوریں اپنے ادھے تھان وچ بنے ہوئے کرتے دیاں بانہواں ٹنگدے ہوئے میرے ول ودھے۔

                مینوں اینا ای دسیا جے اوہناں نے مکا چکیا۔ تے فیر پتا نئیں کیہ ہویا مینوں انج لگا جیویں میں ہواواں وچ اڈدا پیاواں تے فیر اک دم کسے نے زمین تے سٹ دتا۔ مینوں دن ویلے وی تارے دس پئے (مینوں ایناں یاد اے جے اوس ویلے دن ای سی) تے فیر انج لگا جیویں فوٹو گرافر، فلش گناں نال میریاں فوٹو لاہندے پئے نیں۔ تے فیر جس ویلے مینوں ہوش آئی تے میرے سر اتے پٹیاں بجھیاں سن۔ نک چوں لہو وگ کے منہ تے جمیا ہویا سی۔ میں بڑا ای حیران ہویا جے میں گھر کس طراں اپڑ گیا ساں۔ بھیڑیاں گلاں سن کے وی چپ رہوے گا۔

                میں دل وچ سوچیا جے ارسطو حق دی گل کہن دے جرم وچ زہر دا پیالہ بلھاں نال ہس کے لالتا سی تے اسیں تاں ہالی کجھ وی نئیں کیتا۔ حق دی گل ایتھے آکھنا ات ضرورت اے بھانویں ایس دی سزا کجھ میں بھگتنی پوے۔

                دوجی وری ساڈی حق دل گل کہن دے جرم دی سزا اوس ویلے ملی جدوں سانوں اپنے اک بیلی دے گھر جانا سی تے اوہدا گھر ساڈے گھر توں بوہت دور سی۔ بس سٹاپ تے کچھ چرکھلون مگروں بس آگئی تے اسیں بس وچ وڑ گئے۔ بس بندیاں نال نکونک بھری ہوئی سی۔ اوہدے وچ انج مہس ہویا ہویا سی جیویں دھیر سارے چوچے پھڑ کے ٹوکرے ہیٹھ ڈکے ہون۔ بس اک سٹاپ تے کھلوتی اک زنانی بس وچ چڑھی، اوہنے کچھڑ نیانا چکیا ہویا سی۔۔۔ کوئی سیٹ وی خالی نئیں سی۔ ساڈے اندر دا لیڈربولیا جے ایہہ کڈی نا انصافی دی گل اے جے ایہہ ہٹا کٹا تے سیٹ اتے بیٹھا ہوے تے اوہ وچاری بال چک کے وی کھلوتی رہوے۔ اسیں بڑی شرافت نال اوہنوں آکھیا جے توں کھلو جاوے تے اپنی سیٹ ایس زنانی نوں دے دے۔

                اوہ سیٹ توں اٹھ کھلوتا۔ اسیں سمجھے جے کیڈا بھلا مانس بندا اے اکو وری آکھن نال ای اٹھ کھلوتا اے پر سانوں کیہ پتہ سی جے ایس باؤ نئیں ہے ساڈی شامت اٹھ کھلوتی اے۔

                بدقسمتی نال ایہہ سیٹ گیٹ دے نال ای سی۔ اوہنے سانوں ایس طرح دھکا دتا جیویں اسیں اوہدے جدی پشتی ویری ساں۔ تے فیر ایہہ معاملہ وی انج ہویا جیویں پہلاں ہویا سی۔ نک چوں نکسیر منہ سجیا ہویا، گٹا نکلا ہویا۔ تیجی وار ساڈے اندر دے لیڈر نے ایہہ انعام جے اک واری ساہنوں کالج توں دیر پئی ہندی سی۔ اسیں چھیتی قدم چکدے ٹرے جاندے ساں۔ اسیں ویکھیا پئی تن چار ساڈے اپنے ای کالج دے فیشناں مارے منڈے کڑیاں مگر ٹردے جاندے۔ ایس طرں دیاں آواز لاندے پئے سن۔

                ’’سویٹ ہارٹ‘‘۔۔۔ اف یہ حال۔

                میں پچھوں دی اوہناں نون آواز دتی ’’اے مسٹر ذرا گل سننا‘‘ او رکھلو گئے تے بِٹر بِٹر میرا منہ ویکھن لگ پئے۔

                ’’دیکھنا جناب! میں تہاڈے اگے۔۔۔ کیہ گل اے۔ ووٹ لینا ای‘‘ میری گل سنیوں بغیر ای اک نے آکھیا۔

                ’’بھئی گل ایہہ وے جے پڑھیا لکھیا ہوکے تسیں کوئی چنگا کم نئیں پئے کردے۔‘‘

                ’’کیہڑ‘‘ اک نے پچھیا۔

                راہ جاندیاں کڑیاں نوں چھیڑنا کوئی چنگا کم نئیں اسیں اپنا فلسفہ جھاڑیا۔

                "O Mr. Mind your own Business" اک نے انگریزی وچ آکھیا ’’ذرا منہ سنبھال کے گل کر‘‘ سانوں وی جوش آگیا۔

                ’’توں چاہنا کیہ ایں اوئے‘‘ اک میرے دل ودھیا تے میرا گریبان پھڑ لیا ساڈے وچ پتہ نئیں کتھوں اینی ہمت آگئی جے اسیں اوہنوں اک مکا کڈھ ماریا۔ میرے مکا مارن دی دیر سی جے اوہ تن میرے مگر انج پئے گئے جیویں کتے چھیچھڑیاں نوں پئے جاندے نیں۔ ایس وری وی ایہو ای ہویا۔ جیہڑا پہلاں دو واری میرے تے بیت چکیاسی۔

                ہن میں کل دا منجی تے پیا ہویا ایہہ سوچناں پیاں جے پہلیاں سٹاں نوں آرام آلوے تے نویں سٹاں کھان جوگا زور ہولوے تے اسیں حق دی گل کہن دی ہمت اک واری فیر کرلئے۔