فلمیریا

                پرانی اکھان اے بھئی گدڑ دی موٹ آوے تے اوہ شہر ول نسدا اے۔ خورے ایہو گل سی یاں کجھ ہور اک رات روٹی ٹکر توں بعد ساڈی مطالعے دی حس اچن چیتی جاگ کھلوتی رات دے ویلے سارے لوکی سوندے نیں ایس لئی سانوں ایس حس دے جاگن تے ڈاڈھی حیرانی ہوئی۔ بہوں تھپیاں تے لوریاں دیتاں پر ایہہ کالے ناگ وانگوں شوکراں مار دی ای رہی۔ اخیر سانوں تاکڑی وچہ لمیاں پیئاں کتاباں وچوں اک کتاب نوں تکلیف دینی پئی۔ کتاب دا گھٹا جھاڑ کے دوچار ورقے پھرولے تے ساڈی نظراں اک مضمون نوں گھٹ کے انج جپھا پالیا جویں کوڑ کرلی چھیتر نوں پاندی اے اجے دوچار سطراں ای پڑھیاں سن کہ اچن چیتی سادی نظراں ایہناں شبداں تے چاٹی اُتے مکھن وانگر جم گئیاں۔ لکھیا ہویا سی ’’دنیا اک سٹیج اے تے ایس جگ دے سارے بندے ایہدے کردار۔ اک دیہاڑے پردہ ڈگ پوسی تے فیر ۔۔۔۔۔‘‘ تے فیر ایس توں اگلا منظر اسیں ویکھنا وی نئیں چاہندے ساں۔ ساڈی دلچسپی تے بس ایتھے تیکر ای سی۔ کتاب دی پوتھی اپنا کم وکھا چکی سی۔ مطلب ایہہ بھئی ساڈی مطالعے آلی حس خراٹے خراٹا پئی لیندی سی۔

                جد اساں آپ خراٹے لین لئی منجی اتے لمے پئے تاں خورے کتھوں ساڈے دل، دماغ، کلیجی، گردیاں، پھیپھریاں تے آندراں اک جلوس دی شکل وچہ ساڈے اگے گھیرا پالیا۔ ایہہ جلوس نعرے  لالا کے سانوں طعنے معنے ماررہیا سی پئی جگ وچہ آکے ہن تیکر کجھ نئیں کھٹیا۔ اوڑک اساں ایہہ سوچن تے مجبورہوگئے جو ایہہ دنیا اک اسٹیج اے تے جگ دے لوکی ایہدے کردار۔ مطلب ایہہ پئی اسیں سارے اداکار آں۔ ایہہ سوچدیاں ای اساں اک لمی تاری لائی تے تخیل دے دریا وچ ڈونگیاں ڈونگیاں ٹوبیاں مارن ڈہ پئے۔۔۔ اداکار، ہیرو، گھبرو، زور آور تے ٹلاں والا سوہنا جوان مرد۔ ہیرو دا خیال آندے ای مکھ وچہ چونڈیاں وڈھدا اک ہورناں ڈھلکاں مارن لگ پیا۔۔۔ ہیروئن، گنے دی پوری، مصری دی ڈھیلی، شیشے ورگا جثہ، سڑکاں توں لمیاں زلفاں، تے ایس توں اگے اسیں کجھ نہ سوچ سکے کیوں جے دھمی دا ککڑ بانگاں پیا دیندا سی تے ہن سانوں نہانا وی سی۔

                پر اوہ سویر ساڈی پھوہڑ تے کوجھی حیاتی وچ اک نواں تے نویکلا چانن لے کے آئی سی۔ اسیں ہن ہیرو بناں گے آؤندی بھلک دے ٹم ٹم کردے تارے۔ ہن ساڈی ساری جند سگوں ایہہ ساری خدائی اک فلم بن چکی سی تے اسیں ایہدے ہیرو۔

                اساں اپنا کلم کلا بہترین سوٹ کڈھ کے گل پایا تے شیشے اگے کھلوکے اک خاص پوز دتا شیشے دے اندروں اک واج جیہی آئی جویں کسے نے آکھیا ہووے دھر پھٹے منہ پر اسیں ایہہ واج سنی ان سنی کردتی۔

                گھر دے وسنیک ساڈے ایہناں طور طریقیاں تے ڈاہڈھے حیران تے پریشان سن۔ اساں جیہڑے بے ڈھنگ لیڑیاں وچ بہوں پھبدے ساں ہن ڈھنگ نال رہن لگ پئے نے ایہدے نال کئی تمیز دار لوکی ساڈے نال خوا مخواہ دی کاؤڑکھان لگ پئے جویںجد کوئی سودائی اپنا گلماں سی لیندا اے تاں اچے شملے والیاں نوں اپنے پگڑاں دی پے جاندی اے۔ ہن ساڈی مت وچہ ساڈی شخصیت دا ایہہ ویروا سی:

                ہیئرا سٹائل۔۔۔ وحید مراد جیہا، ٹور تے واج۔۔۔ محمد علی جیہی، نک تے اکھاں۔۔۔ ندیم جیہیاں، بڑھکاں تے ڈھلکاں ۔۔۔ سلطان راہی جیہیاں، بدمعاشی تے برچھا گردی۔۔۔ اسلم پرویز جیہی، بول چال دا لہجہ۔۔۔ مصطفی قریشی ورگا تے ہاسا مخول (شکل نئیں)۔۔۔ رنگیلے ورگا۔ تے فیر اسیں ایہہ خوبیاں حاصل کرن لئی سردھڑ دی بازی لادتی۔

                اوہناں دناں وچ ساڈی ٹنڈ سی۔ جویں ہاڑ دی تازی فصل کئی ہوندی اے۔ ایہہ ٹنڈ منڈ جیہا میدان ویکھ کے ساڈا دل خون دے ہنجو روندا۔ پر اگلے ای سمے جدوں اسیں اپنی دھون اتے ہتھ پھیر دے تے کتکتاریاں ہون لگ پیندیاں تے اسیں فیر ہسن لگ پوندے۔ والاں دی بڑھوتی لئی ہن اساں دیہاڑی وچہ پنج واری تیل وچہ عرق گلاب ملا کے سردی مالش کردے ہاں۔ اساں اجے تیکر کوئی اجیہا کم نئیں کیتا بھئی جدے نال نک کٹیندی ہووے۔ پر فیر وی خورے کیوں ساڈے چہرے اتے نک بس اینی کو اے کہ بہوں گھوہ نال ویکھئے تے دسدی اے یا فیر ٹوہ ٹوہ کے لبھنی پوندی اے۔ خیر ایہدے نال کوئی خاص فرق نئیں پوندا کیوں جے سلطان راہی تے ادیب دا ہتھ وی نک ولوں تنگ ای اے۔ پر کیوں جے اسیں نک ولوں ندیم دسنا چاہندے آں ایس لئی وڈے چراں تیک اک چمٹے نال صبح شام نک کھچدے رہے۔ انج کیتیاں نک تے تاں کوئی اثر نہ ہویا ہاں اوہ چمٹا گھسیاں گھسدیاں چمٹی ضرور بن گیا۔ اخیر بڑے وچاراں پچھوں اسیں اک سنگی بیلی نوں ایس گل تے راضی کرلیا بھئی اوہ ساڈی نک وچ نکیل پاکے روز اک دو کوہاں تیک کھچیا کرے گا۔ اسیں اوہنوں ایہہ لالچ دتا سی کہ ہیرو بنن مگروں اسیں اہنوں اپنی ہر فلم وچ ہیروئن دا بھرا رکھیا کراں گے۔ نکیل پاکے کھچن نال نک کجھ لمبی ہوتے جاندی پر اگلے ہی دیہاڑے جماعت وچ ماستر جی دے حکم تے لکیراں کڈھن نال فیر اوسے قد تے جابہندی۔ مطلب ایہہ پئی فیر پکوڑے جیہی نک۔

                ساڈی واج فن لئی بس ایتھے تیکر ای کم سکدی اے جو ایہنوں ڈریکولا دے کسے سین لئی ساؤنڈ ایفکٹ  (Sound Effect) دے طور تے وجایا جاسکے۔ ایس کرکے اساں اپنی واج نوں مٹھی تے تکھی بناون لئی نمک دے غرارے شروع کردتے۔ اک دو واری انج ہویا کہ نمک دی تھاں بھل کے سرف پا بیٹھے۔ پر ایہدے نال نقصان نئیں سگوں فیدہ ہویا۔ کیوں جے انج پھیپھڑے چنگی طرحاں دھل کے صاف ہوگئے تے واج وی نکھر گئی۔ واج نوں سریلا کرن لئی اسی روز اک کورے گھڑے وچہ منہ پاکے انگریزی راگ وچ بابا بلھے شاہ دی کافی گاؤندے ساں اک دو واری کم کسوتا ہوگیا۔ اوہ ایس طرحاں کہ اسیں اپنا سر گھڑے وچہ پھنسا بیٹھے برادری دے اک سیانے بندے ٹوکہ پھڑیا تے سارے گھر آلیاں نوں پچھن لگا بھئی بندہ۔ بچاؤنا اے یاں گھڑا؟ اسیں اک چیک ماری تے گھڑے سمیت اوتھوں نٹھ کے جنگل وچ جاوڑے۔ تد توں اساں ہن گھڑے وچہ نئیں اتھے کھوہ وچہ منہ پاکے روندے۔۔۔ ساڈا مطلب اے گاؤندے ہاں۔

                سانوں اپنی ٹور تے دھیان دین دی کوئی خاص لوڑ نئیں کیوں جے ساڈی کچھاں وچ پھوڑے تے تلویاں وچ کنڈیاں دے پھٹ نیں ایس واسطے ٹور بہوں چنچل تے باوقار اے۔

                ساڈا پنڈا اجیہا بے ڈول اے پئی ڈاچی وانگوں ایہدی وی کوئی کل سدھی نئیں۔ جثّے دی بے ڈولی دا اندازہ ایتھوں ای کرلو جو ہن تیکر کسے درزی ساڈی تسلی نئیں کرائی۔ کدے جھگا بوری ورگا کھلا ہوندا اے تے کدے ستھن میانی توں اینی سوڑی کہ دو پیر چلن لئی تن واری ڈگنا پیندا اے۔ ایہناں ای گلاں توں روز دیہاڑے درزی نال سیاپا پیا رہندا اے۔ اوہ مسکین نمانی جئی صورت بنا کے آکھدا اے ’’حضور! نہ تے تہاڈا کپڑا گھٹیا ہوندا اے تے نہ ای اساں گھٹ تجربے کار آں۔ بس جناب ہوراں دا بدن ای کجھ اجیہا کولا اے پئی سیندے ہوئے اسیں وی گھمن گھیری وچہ پے جاندے آں کہ اسیں سوٹ سیندے پئے آں یاں کھوہ وچہ موٹرسائیکل چلا رہے آں‘‘ کیوں جے ہیرو کلین شیوای چنگے لگدے نیں ایس لئی اساں مچھاں تے وی استرا پھرا دتا اے ہن ساڈے نقشے اتے پلکاں تے بھنواں توں اڈ کوئی وال نیئوں دسدا تے دوروں انج جاپدا اے جویں چھلے ہوئے تیرے تے کشیدہ کاری کیتی ہووے۔

                اج کل دیاں فلماں وچ ہیرو نوں وی ہیروئن دے نال نال نچنا پوندا اے۔ پر ساہنوں ناچ سکھن لئی کوئی استاد پھڑن دی لوڑ نئیں کیوں جے ساڈے گھر دے ویہڑے وچہ کھلوتے ہوئے توت دے درخت اتے ڈیمو آں دا اک چھتہ اے ایہہ سمجھو کہ ایہہ ڈیموای ساڈے استاد نیں۔ روز اک بھونڈ پھڑ کے اوہنوں شلوار وچ سٹ لیندے آں تے فیر ڈانس ہوندا اے پئی کوئی کلاسیکل یا ڈسکوڈانسر وی کیہ کردا ہووے گا!

                اسیں ایس گل تے ڈاڈھے خوش آں جو ساڈے اندر ہیرو شپ دا جذبہ تے ساری صلاحیتاں موجود نیں جیہڑے لوکی سانوں اج ٹوکاں تے ٹچکراں مار دے نیں اوہو اک دیہنہ ساڈیاں فلماں ویکھن لئی لمیاں لمیاں لیناں وچ لگ کے دھکے کھاون گے۔ ایہہ جیہڑیاں خامیاں اسیں ایتھے دسیاں نیں اوہ بہوں معمولی نیں۔ تساں آپے ای سوچو پئی جدوں اک ہیرو لمیاں لمیاں مچھاں آلے تے فری سٹائل دے ماہر ولن نوں اوہدے چمچیاں سمیٹ مارکٹ کے نسا سکدا اے تے فیر اوہ اجیہیاں نکیاں نکیاں خامیاں دی پرواہ کیوں کرے۔ اسیں آؤندے ویلے توں مایوس نئیں آں۔ اجے سانوں کوئی آفر نئیں ہوئی تے جس دیہنہ سانوں کوئی چانس مل گیا اوہ دیہنہ مالن برانڈو، گریگری پیک، راجر مور، چرڈ برٹن تے عمر شریف دے عروج دا آخری دیہنہ ہوسی۔