سوچن دیاں گلاں

                سجنو تے مترو اک واری اک وڈھی عمر دا بندہ کسے راہ توں لنگھ رہیا سی۔ اوہدا لک جھک کے کمان وانگوں کبا ہو گیا سی۔ کسے اتھرے جوان نے بابے دے نال ٹھٹھا کردیاں آکھیا۔ بابا اے کمان کتھوں لئی جے تے کنے پیسے دتے سن۔ بابے نے منڈے دی گل نوں بڑے پیار نال جواب دے کے ٹال دتا۔ بابے نے آکھیا بچیا ایہہ کمان وقت دیندا اے تے ایسی دی قیمت صرف ذمہ داری اے۔ جیہڑی رسید بن کے باقی دی حیاتی نال جڑ جاندی اے مقصد ایہہ کہ تھوڑی دیر دے ای بعد ایہہ کمان تینوں وی پیسیاں توں بغیر ای لبھ جاوے گی۔

                ویرو تے بھراؤ کدی کسے دے نال اوہ ٹھٹھانہ کرے۔ جہدے نال اوہدے دل دا شیشہ ٹٹ جاوے۔ تے ناں کدی اپنے توں امیر نوں ویکھ کے تے سڑجایئے کہ اوہ حسد بن جاوے۔ تے ساڈے ستھرے عملاں نوں وی تباہ کردیوے۔

                اج دا زمانہ سائنس تے کمپیوٹر دا زمانہ اے۔ اہدے وچ انسان دی قیمت پاکستان روپیہ وانگوں گھٹ ہوگئی اے۔ جتھے زمینداراکرن لگیاں اک بندہ ہل چلاؤن لئی تے دوجا سہاگے لئی تے تیسرا بندہ ایہناں ساریاں بندیاں تے ڈنگراں دی خوراک لئی لوڑی دا سی۔ اوتھے ہن اک بندہ اپنے گھر وچوں کھانا کھاکے تسلی نال کھیتاں وچ جاندا اے تے ٹریکٹر نال اک گھنٹے وچ اگے نالوں ودھ کم کرکے پچھے مڑ آندا اے۔

                رب نے ایہہ ساریاں چیزاں انسان دے فائدے لئی بنائیاں نیں۔ پر حضرت انسان اوہناں چیزاں نال بڑا غلط ورتارا کردا اے بجلی نوں لے لو ایہہ تے بنی پئی گھراں وچ چانن کرے گی کارخانے ترقی کرن گے تے ساڈی سوچ وچار اگے ودھے گی۔ پر بجلی بناون والے نے ایہہ تے سوچیا وی نئیں ہوناں پئی ایدھے نال بندیاں نوں ماریا جاوے گا ایہدی سہولت توں پٹھا فائدہ لے کے لوگ بے ہودہ تے گندی فلم دے رواج نوں عام کردین گے۔

                دوستوں ایہناں کماں توں بچن لئی کون تدبیراں سوچے گا۔ کنے آن کے ساڈے بے چین دماغ بدلنے نیں۔ تے کون ساڈے اکھڑ معاشرے تے زبان نوں سدھیاں کرے گا۔

                جے اج وی اسی اپنے گھر محلے تے ملک واسطے چنگانہ سوچیا تے دنیا سانوں پیراں ہیٹھا دے کے بہت اگے ودھ جاوے گی۔ وقت صرف اوس بندے  دا ساتھ دیندا اے جیہڑا وقت دے نال نال چلے۔ بے وقت چلن والیاں نوں وقت بے وقت مار دیندا اے۔ اوہ اپنی رہتل نوں قیامت تک نئیں بدل سکدا۔

                اسی اپنی برادری وچ پڑھے لکھے جانے جاندے آں تے سانوں وی ایہہ سوچنا چاہید ااے پئی ایہہ برادری ساڈے کولوں کیہ امیداں لائی بیٹھی اے بھائیو ایہہ لوگ ساڈے کولوں اخلاقی تے سوہنے ورتارے دے امیداوار نیں۔ تے ساڈا ایہہ فرض بندا اے کہ اک پڑھے لکھے انسان دے ناتے اسی لوکاں نال چنگے اخلاق نال پیش آئیے بزرگاں نال کدی ٹھٹھانہ کریے۔ کدی بے ایمانی دا پلہ پھڑ کے کامیابی تک جان دا چارانہ کریے۔

                جسے اسی وی چوری چکاری تے مار تاڑ دے کھنڈ کاربن جایئے تے انپڑھ بندہ تے ساڈے نالوں لکھاں درجے چنگا اے۔ جیہڑا ماں نوں جنت جان کے سیوا کردا اے جیہڑا نہ تے شہراوندا اے تے ناں اوہ روز دے روز کنڈیکٹرا تے ہاکراں نال پھڈے پاندا اے۔

                سجنوں تے مترو خدا تعالیٰ دے اگے ہتھ بن کے عرض اے کہ اوہ ساہنوں ماڑیاں کماں توں بچن دی ہمت تے سوچ دیوے تے ایمان دی مضبوطی دیوے۔ آمین!